Mesaj Premye Prezidans lan, Out 2015
Kanpe kòm yon limyè
Mwen te gen privilèj pou m te asiste anpil selebrasyon kiltirèl ki toujou fèt lè tanp yo pral konsakre. Mwen te renmen yo tout, enkli sa ki pi resan m te asiste nan Phoenix la, nan Arizona nan Etazini, nan mwa Novanm ki sot pase a.
Jèn Sen yo nan legliz la ki patisipe nan selebrasyon kiltirèl yo prepare bèl pwogram ki memorab. Ane pase nan Phoenix la, jis anvan selebrasyon an, mwen te di patisipan yo: “Nou se pitit limyè.”
Mwen ta renmen tout jèn yo nan Legliz la konnen ke yo se pitit limyè. Epi, antanke sa, yo gen responsablite pou yo rete “tankou limyè nan mond lan” (Filip 2:15). Yo gen devwa pou yo pataje verite levanjil yo. Yo gen yon apèl pou kanpe kòm yon limyè tanp, ki reflete limyè levanjil la devan yon mond ki plis anplis ap tonbe nan fènwa. Yo gen yon tach pou yo kenbe limyè yo klere pou l briye byen klè.
Pou nou ka vin “yon egzanp pou kwayan yo” (1 Timote 4:12), nou menm nou dwe kwè toudabò. Nou dwe gen lafwa ki nesesè pou nou ka siviv espirityèlman an epi pwojte yon limyè sou lòt moun. Nou dwe nouri temwayaj nou jiskaske li vin tounen yon ankraj nan lavi nou.
Pami fason ki pi efikas pou nou akeri ak kenbe lafwa nou bezwen jodia, nou gen li ak etidye ekriti yo epi priye tout tan san rete. Nou menm jèn yo nan legliz la, m ap di nou, si nou potko fè sa, kòmanse devlope yon abitid etid ekriti ak lapriyè kounyeya menm. San de abitid enpòtan sa yo, enfliyans deyò yo ak reyalite pafwa difisil lavi yo kapab bese limyè nou oubyen menm etenn ni.
Ane adolesans yo pa fasil. Yo se ane kote Satan ap ba nou tantasyon e fè tout sa l kapab pou rale nou soti ale lwen chemen ki ka mennen nou retounen al nan fwaye selès nou an. Men, si nou li epi nou priye epi nou sèvi epi nou obeyi, n ap vin pi byen konnen “limyè ki klere nan fènwa a” (D&A 6:21), Egzanp nou ak fòs nou an—Senyè a, Jezikri. Li se Limyè pou nou leve anlè pou dispèse fènwa k ap rasanble a (gade 3 Nefi 18:24).
Avèk yon temwayaj sou Sovè a ak sou levanjil retabli a, nou gen opòtinite san konte pou n briye. Yo antoure nou chak jou, nan kèlkeswa sitiyasyon nou twouve nou. Si nou suiv egzanp Sovè a, n ap gen opòtinite pou nou tounen yon limyè nan lavi moun bò kote nou—keseswa yo se manm fanmi nou, oubyen kanmarad lekòl, zanmi nan travay, senp relasyon, oubyen total etranje.
Lè nou se yon limyè nan mond lan, moun bò kote nou ap santi yon espri espesyal ki ap fè yo anvi vin zanmi nou ak suiv egzanp nou.
Mwen priye paran yo ak dirijan jèn yo pou ede yo kanpe fèm pou laverite ak lajistis. Ede yo elaji vizyon yo sou aprann, sou konprann, ak sou sèvi nan wayòm Bondye a. Ankre nan yo yon fòs pou reziste devan tantasyon mond lan. Ba yo volonte pou yo mache nan lavèti ak lafwa, pou yo toujou priye, epi pou yo toujou konsidere syèl la kòm ankraj konstan yo.
Nou menm jèn yo, m ap di nou, Pè Selès la renmen nou. Se pou nou toujou santi amou dirijan legliz yo genyen pou nou. Se pou nou toujou gen dezi pou nou sèvi Pè Selès la ak Pitit Gason l lan. Epi, se pou nou toujou mache nan laverite epi kanpe kòm yon limyè pami pitit Bondye yo.
Ansèyman nan Mesaj Sa a
Panse pou ou pale avèk moun w ap anseye yo sou kisa sa vledi pou yo se “yon [pitit] limyè.” Ki responsablite sa mete sou yo? Ou gen dwa pale sou moman kote limyè yo te patikilyèman briye ak sou kisa ki te fè l briye a. Sonje mande yo pou yo panse sou yon moun byen espesifik, tankou yon jèn, yon kòlèg travay, oswa yon manm fanmi yo, ki ka petèt bezwen limyè. Epi nou ka priye ansanm pou jwenn yon fason pou pataje limyè yo avèk moun sa a.
© 2015 pay Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/15. Apwobasyon tradiksyon: 6/15. Tradiksyon First Presidency Message, August 2015. Haitian Creole 12588 036