Cov Mus Saib Xyuas Tom Tsev tsab Xov, Kaum Hli Ntuj 2015
Tej Cwj Pwm ntawm Yexus Khetos: Muaj Kev Siab Hlub thiab Kev Hlub Puv Npo
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej tej cwj pwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj mus saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Phau Guide to the Scriptures hais tias kev siab hlub yog txoj kev hlub uas siab, thiab zoo, thiab muaj zog tshaj plaws (saib “Charity”). Kev siab hlub yog Yexus Khetos txoj kev hlub dawb paug. Thaum peb kawm txog Yexus Khetos thiab siv zog coj zoo li Nws, peb yuav pib muaj Nws txoj kev hlub dawb paug nyob hauv peb lub neej thiab yuav txais kev tshoov siab kom hlub thiab pab lwm tus ib yam li Nws. Thawj Tswj Hwm Thomas S. Monson hais tias, “Kev siab hlub yog ua siab ntev rau ib tug neeg uas tau ua rau peb tu siab. Yog thaum peb tsis kam tu siab ceev. Yog lees tias lwm tus neeg muaj tej qhov tsis muaj zog los yog tej yam uas lawv ua tau zoo dua. Yog lees txais lwm tus neeg raws li lawv coj ua. Yog saib dhau ntawm lub cev sab nraud mus nrhiav kom tau tej xeeb ceem uas yuav tsis ploj mus ib txhis li. Yog thaum yus tsis kam hais dav dav txog lwm tus neeg.”1
Nyob hauv Phau Ntawv Maumoos, peb kawm qhov tseeb tseem ceeb hais tias peb “thov Vajtswv kawg siab kawg ntsws kom peb yuav muaj Khetos txoj kev hlub dawb huv, uas nws tau muab rau tag nrho cov uas coj raws nraim li nws Leej Tub, Yexus Khetos; xwv kom [peb] yuav rais tau los mus ua Vajtswv tej tub [thiab ntxhais]; kom thaum nws yuav tshwm los peb yuav zoo li nws, vim peb yuav pom [tias nws zoo li cas]; kom peb yuav muaj txoj kev cia siab no; kom peb yuav raug ua kom dawb huv tib yam li nws twb dawb huv” (Maulaunais 7:48).
Vaj Lug Kub Ntxiv
Yauhas 13:34–35; 1 Kauleethaus 13:1–13; 1 Nifais 11:21–23; Ethaws 12:33–34
Los ntawm Peb zaj Keeb Kwm
“Muaj ib tug viv ncaus uas ris ob tug mus saib xyuas tom tsev txiaj vim nkawd tuaj nyuaj siab nrog nws thiab nplij nws lub siab tsis ntev tom qab nws tus txiv tau tso lub ntiaj teb no tseg. Nws hais tias: ‘Kuv xav tau ib tug uas yuav ncav tes pab kv; ib tug uas yuav mloog kuv hais. … Thiab nkawd mloog kuv hais. Nkawd nplij kuv lub siab. Nkawd quaj nrog kuv. Thiab nkawd khawm kuv … [thiab] pab kuv kom tsis txhob poob siab thiab nyuaj siab uas kuv muaj ob peb hlis thaum kuv kho siab heev.’
“Ib tug poj niam ntxiv hais txog qhov uas nws xav li cas thaum nws txais kev pab los ntawm ib tug mus saib xyuas tom tsev hais tias: ‘Kuv paub tias kuv tsis yog tus naj npawb uas sau rau phau ntawv ceev xwm txheej uas nws yuav tsum tuaj xyuas xwb. Kuv paub tias nws hlub kuv.’”2
Ib yam li cov viv ncaus no, ntau tus Neeg Ntseeg hauv Hnub Nyoog Kawg nyob thoob plaws lub ntiaj teb ua tim khawv txog qhov uas Thawj Tswj Hwm Boyd K. Packer (1924–2015), tus Thawj Tswj Hwm ntawm Pawg Kaum Ob tug Thwj Tim hais tias: “Qhov uas muaj tsev neeg ntawm lub Koom Txoos tos txais peb txawm peb mus qhov twg los, yog ib qho uas nplij peb lub siab. Txij thaum lawv tuaj txog, tus txiv neej yuav koom nrog ib pawg pov thawj hwj thiab tus poj niam yuav koom nrog Koom Haum Niam Tsev.”3
© 2015 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/15. Pub txhais ua lus Hmoob: 6/15. Kev txhais Visiting Teaching Message, Kaum Hli Ntuj 2015. Hmong. 12590 295
Xav Txog Qhov No
Yexus Khetos coj yam ntxwv zoo tag nrho muaj kev hlub thiab kev siab hlub li cas rau peb?