Mesaj Premye Prezidans, Oktòb 2015
Fini avèk tòch ou toujou limen
Pa Prezidan Dieter F. Uchtdorf
Dezyèm Konseye nan Premye Prezidans lan
Nan ansyen peyi la Grès la, atlèt yo te konn fè konpetisyon nan yon kous relè yo te lampadedromia.1 Nan kous la, atlèt yo te konn kenbe yon tòch nan men yo epi yo pase l bay atlèt apre a jiskaske dènye manm nan ekip la te franchi liy final la.
Se pa t ekip ki te kouri pi vit la ki te ranpòte pri a—men, sete premye ekip ki te franchi liy final la avèk tòch li toujou limen an ki te ranpòte pri a.
Gen yon gwo leson la a, yon leson ansyen pwofèt yo ak pwofèt aktyèl yo anseye: pandan ke li enpòtan pou nou kòmanse kous la, li pi enpòtan toujou pou nou fini avèk tòch nou toujou limen.
Salomon te derape solid
Gran Wa Salomon se yon egzanp sou yon moun ki te derape solid. Lè l te jèn, li te “renmen Senyè a, epi li te mache daprè lòd papa li, David, te ba li” 1 Wa 3:3. Bondye te kontan avèk li epi l te di: “Kisa ou ta vle m ba ou” 1 Wa 3:5.
Olye l te mande richès oswa yon lavi long, Salomon te mande “yon lespri veyatif pou m te ka gouvène pèp la, pou m konn sa ki byen ak sa ki mal” 1 Wa 3:9.
Sa te sitèlman fè Senyè a plezi ke l te bay Salomon non sèlman benediksyon lasajès men richès ki te depase mezi ak yon lavi long tou.
Malgre Salomon te trè saj, epi li te reyalize anpil gwo bagay, li pa t fini solid. Sa tris pou n di ke, apre nan lavi li, “Salomon te tanmen fè sa ki mal devan Senyè a, epi li pa t sèvi l ak tout kè l 1 Wa 11:6.
Fini pwòp kous pa nou an
Konbyen fwa nou kòmanse yon bagay epi nou pa fini li? Rejim? Aktivite spòtif? Angajman pou nou li ekriti yo chak jou? Desizyon pou nou vin pi bon disip Jezikri?
Konbyen fwa nou pran rezolisyon nan mwa Janvye epi nou pousuiv yo avèk gwo detèminasyon pandan kèlke jou, kèlke semèn, oubyen menm pandan kèk mwa epi rive Oktòb, flanm angajman nou an bese anpil jiskaske l prèske etenn?
Yon jou, m te wè yon foto komik ki te montre yon chyen ki te kouche bò kot yon moso papye li te dechire. Foto a te ekri: “Sètifika Fòmasyon chyen-Obeyisans.”
Nou menmjan ak chyen sa a pafwa.
Nou gen bon entansyon; nou derape solid; nou vle fè pi byen nou kapab. Men alafen, nou kite rezolisyon nou yo kreze, detwi, epi nou bliye yo.
Sa fè pati nati imèn nan, pou nou bite, echwe, e pafwa anvi abandone kous la. Men, antanke disip Jezikri, nou te pran angajman pou nou non sèlman kòmanse kous la men pou nou fini l tou—epi pou nou fini li avèk tòch nou toujou limen. Sovè a te pwomèt disip li yo: “Moun ki pèsevere jiskalafen, y ap sove” (Matye 24:13).
Kite m parafraze sa Sovè a pwomèt nou nan epòk nou an: Si nou respekte kòmandman yo epi nou fini kous la avèk tòch nou toujou limen, n ap gen lavi etènèl, ki se pi gwo nan tout don yo (2 Nefi 31:20).
Limyè ki pa janm etenn nan
Pafwa, apre nou fin bite, echwe, oubyen menm lage sa, nou vin dekouraje epi nou panse ke limyè nou an etenn epi nou pèdi kous la. Men, mwen temwaye ke Limyè Kris la pa ka etenn. Li briye nan fènwa lannuit la epi l ap relimen kè nou si sèlman nou lage kè nou ba li (gade 1 Wa 8:58).
Kèlkeswa kantite fwa nou tonbe oubyen nan ki pwofondè nou tonbe, Limyè Kris la toujou klere byen klè. Epi, menm nan lannuit ki pi pwofon an, si nou fè yon pa al jwenn ni, limyè li ap chase tenèb yo e l ap relimen nanm nou.
Kous sa a kòm disip Kris la se pa yon senp kous li ye; se yon marathon. Epi, vitès nou pran an pa fè anpil diferans. Anfèt, sèl fason nou ka pèdi kous la se si nou tonbe anba tantasyon oubyen nou lage sa.
Osi lontan nou kontinye kenbe epi nou avanse al jwenn Sovè nou an, n ap genyen kous la avèk tòch nou k ap briye byen klè.
Paske, tòch la se pa osijè nou menm oubyen kisa n ap fè.
Se osijè Sovè mond lan.
Epi sa, se yon Limyè ki pa ka janm etenn. Se yon Limyè ki chase fènwa, ki geri blese, e ki limen menm nan mitan doulè ki pi pwofon ak fènwa ki pi ekstrèm nan.
Se yon Limyè ki depase konpreyansyon.
Se pou nou chak fini chemen an nou te kòmanse a. Epi avèk èd Sovè nou ak Redanmtè nou an, Jezikri, n ap fini jwayezman epi avèk tòch nou toujou limen.
© 2015 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/15. Apwobasyon tradiksyon: 6/15. Tradiksyon First Presidency Message, October 2015 Haitian Creole 12590 036
Ansèyman nan Mesaj Sa a
Panse pou w ankouraje moun w ap anseye yo pou yo reflechi sou kote yo rive nan “kous” lavi yo a. èske tòch yo a klere byen klè? Ou gen dwa li fraz ki di ke Limyè Kris la se “yon Limyè ki chase fènwa, ki geri blese, e ki limen menm nan mitan doulè ki pi pwofon ak fènwa ki pi ekstrèm nan.” Apresa, panse pou w pale avèk moun w ap anseye yo sou fason Limyè Kris la te enfliyanse lavi yo nan lepase ak fason li enfliyanse lavi yo kounyeya.