Dau Nanuma Voli Ga e Yaloqu

Noveba 2015

Dau Nanuma Voli ga E Yaloqu

Mai vei Devin G. Durrant

Matai ni Daunivakasala ena Mataveiliutaki Raraba ni Wilivola ni Sigatabu

Sa noqu masu vakaidina ni ko ni na digitaka mo ni vakananuma vakatitobu ka vakalevu sara na vosa ni Kalou.

Ena buturara vakacakacaka, au dau vakatubu ilavo. Ena buturara ni vakabauta, au tisaipeli i Jisu Karisito, na Luvena na Kalou.¹ Ena noqu kila vakabisinisi au vakayagataka na kila ni vakavuvuli ni veika vakailavo. Niu bulataka noqu vakabauta, au tovolea meu vakamuria na ivakavuvuli vakayalo ka na vukei au meu veiucui kei na iVakabula.

Na Veisureti ena Kauta Mai na Kalougata

Levu na ka vinaka au sa sotava ena noqu bula e yaco baleta ni sureti au e dua meu cakava e dua na ka e dredre toka. Ena yalo vata ga o ya, au na sureti kemuni mo ni cakava e rua na ka. Na imatai e tara na veika vakailavo. Na ikarua ni veisureti, ena tara na veika vakayalo. Kevaka me na ciqomi na veisureti ruarua oqo, ena vinakati kina na igu ni bula vakaivakarau ena dua na gauna balavu me qai tamusuki na kena isau.

Na iMatai ni Veisureti

E rawarawa sara na imatai ni veisureti: Au sureti kemuni mo ni maroroi ilavo ena veimacawa. Na levu ni ilavo o maroroya e sega soti ni bibi; sa na vakatau ga vei kemuni. Ni ko sa tekivu bucina na ivakarau ni mamaroroi, ena vukea na nomu bula vakai iko. Ena rawa kina ni o vukea vakailavo e so tale ena nomu gugumatua. Vakasamataka mada na vinaka ni veika ena yaco ena nomu na maroroi ilavo ena veimacawa me ono na vula, dua na yabaki, 10 na yabaki, se me sivia. Na sasaga lalai e tokoni tikoga ena rawa me vakayaco-ka vakalevu sara.²

Na iKarua ni Veisureti

Na ikarua ni noqu veisureti e duidui toka mai na kena imatai ka na via bibi toka vei rau. Sa ikoya qo: Au sureti kemuni mo ni “vakananuma titobu”³ e dua na tiki ni ivolanikalou ena veimacawa. Na vosa vakananuma titobu ena sega ni kune ena ivolanivosa, ia e sa kunea e dua na kena rumu e yaloqu. Ia, na cava na ibalebale ni vakananuma titobu? Au taleitaka meu kaya ni cokoti vata kina me 80 na pasede na kena vakananumi ka 20 na pasede na kena wiligusutaki.

E rua ga na kena ikabakaba rawarawa:

iMatai, digitaka e dua na tiki ni ivolanikalou ena veimacawa ka qai biuta toka ena dua na vanua mo na rawa ni raica ena veisiga.

iKarua, wilika se vakasamataka vakawasoma na tikina qori ena veisiga ka vakananuma vakatitobu na kena ibalebale kei na vu ni malanivosa eso ena loma ni macawa.

Vakasamataka mada na veilaveti ena yaco mai ni caka na ka oqo ena veimacawa me ono na vula, 1 na yabaki, 10 na yabaki, se sivia.

Ni ko sa vakayacora oqo, ko na vakila na tubu vakayalo. Ena qai rawa talega mo vakavulica ka laveti ira ko dau lomana ena sala e vakaibalebale cake.

Ke o sa digitaka mo vakananuma titobu ena veimacawa, ko na vakila ni ko sa vaka e dua na tamata dau taleitaka na nunu dela ni wai ena veigauna sa oti, ia oqo sa digitaka me sa na laki nunu sobu kina boto ni sauloa. Ena lewa o ya, ena yaco me titobu nomu kila deivaki na ivakavuvuli ni kosipeli ka yaco na rai vou vakayalo me vakalougatataka na nomu bula.

Ni ko sa vakananuma tiko na veitikina digitaki ena veimacawa, na vosa kei na malanivosa sa na tekivu volai tu e yalomu.⁴ Na vosa kei na malanivosa sa na volai tale tu ga ena nomu vakasama. Dua na kena ivosavosa, ni wiligusu sa na tekivu me yaco vakarawarawa ka vakaivakarau. Ia na inaki levu duadua ni vakananuma titobu sa ikoya me na laveta cake na vanua mena laki tiko kina na nomu vakanananu—na vanua mo na laki tiko voleka vua na Yalo ni Turaga.

E kaya na iVakabula, “Ia, mo dou vulica ka nanuma matua tiko na noqu ivakavuvuli.”⁵ Na vakananuma titobu sa ka rawarawa sara ka na veivakauqeti ki na kena qaravi.

Au vakabauta ni o Nifai e dua na dau vakanananu titobu. E a kaya, “Au sa dau taleitaka na ivolanikalou ka vakananuma [tikoga] e lomaqu, kau sa vola me ivakavuvuli mera vinaka kina na noqu kawa.”⁶ O koya e nanumi ira vakalevu na nona kawa ena nona vakananuma ka vola na ivolanikalou. Ena kalougata vakacava na nomu matavuvale ni ko tomana tikoga mo vakasinaita na nomu vakasama ena vosa ni Kalou?

Noqu Tikina

Wale tikoga oqo, au a vakananuma vakatitobu na Alama 5:16. E vakaoqo, “Au sa kaya vei kemudou, dou kakua sara ni nanuma ena gauna oqo ni na vosa vei kemudou na Turaga ena siga ko ya ka kaya: Dou lako mai vei au koi kemudou sa yalododonu mo dou vakalougatataki?”

Ena mua ni macawa, oqo na veika sa volai tu ena noqu vakanananu: Vakasamataka mada mo rogoca na domo ni Turaga ni kaya, “Dou lako mai vei au koi kemudou sa yalododonu mo dou vakalougatataki” (Alama 5:16).

Ko sa na raica, au sega ni wiligusutaka na tikini ivola taucoko ena veivosa yadua. Ia au sa vakananuma ga vakawasoma na vosa e bibi kei na vanua me na laurai kina. Ia na tikina ka bibi duadua sa ikoya na vanua cecere kau vinakata me gole kina na noqu vakanananu. Ena loma ni macawa taucoko, au raitayaloyalotaka na iVakabula ni kaya tiko na veivosa ni veivakayarayarataki vei au. Na irairai o ya e tara na yaloqu ka vakauqeti au meu vakayacora na “cakacaka ni yalododonu.” O ya na ka ena rawa ni yaco ni da sa “rai tiko vei [Karisito] ena noda nanuma kecega.”⁷

Dodonu meda na Valu Lesu

Ko na taroga beka, “Na cava meu cakava kina na ka oqo?” Au na sauma ka kaya ni da sa bula donuya tiko na gauna ni tubucake na ivalavala ca. Ena sega ni rawa meda na ciqoma tu ga ka laiva meda vakani ena veivosa dukadukali ni basika mai na veivanua kecega eda rai yani kina ka qai sega ni cakava e dua na ka. Dodonu meda valu lesu. Ni sa vakasinati na noda vakasama ena veivakanananu kei na ivakaraitaki e veilaveti, ni da sa “dau nanumi koya tikoga,”⁸ sa na sega tale na rumu ena rawa ni curu mai kina na ca kei na benu.

Ena iVola i Momani, e veisureti kina vei keda kece o Jisu Karisito, mo dou “vakasamataka e lomamudou na veika sa kaya [o Koya].”⁹ Raica me veitomani kei na nomu wili ivolanikalou vakai-iko kei na nomu matavuvale na vakanananu titobu, ia me kakua ni vakaisosomitaki sara. Na vakanananu titobu ena vaka na vitamini vou ka se qai tovolei wale tikoga oqo me ikuri ni kakana vakayalo o vakayagataka.

Sa Dredre Sara Ga

Ko na rairai kaya beka ni “Vakanananu titobu sa dredre sara ga vei au.” Kakua ni yalolailai. Na dredre ena rawa ni vinaka. E sureti keda o Karisito meda cakava e levu na ka e dredre, baleta ni kila o Koya ni da na vakalougatataki me vua ni noda sasaga.¹⁰

E dua na neitou neiba gone e a kunea e dua na sala me vakanananu titobu kina. A biuta o koya na nona tiki ni ivolanikalou ni macawa ena sikirini ni nona talevoni. Dua tale na ka e rawa ni o tovolea mo wasea na nomu tikina vua e dua na tacimu, dua na gone, se dua na nomu itokani. Na watiqu o Julie keirau dau veivukei sara. Keirau dau digitaka na neirau tiki-ni volatabu ena Sigatabu. Dau biuta o koya na nona ena neitou kato ni wai liliwa. Au biuta na noqu ena noqu Lori. Keirau sa qai dau veiwaseitaka neirau vakasama me baleta na neirau veitikina ena macawa taucoko. Keirau dau veiwasei talega kei ira na luvei keirau. Ni keirau cakava vaka o ya, sa na vakalogalogavinakataki ira mera wasea nodra vakasama vata kei keirau baleta na vosa ni Kalou.

E vakabira o Sister Durrant na ivolanikalou ena katoniwaililiwa

E biuta o Brother Durrant na ivolanikalou ena lori

O au kei Julie keirau tiki ni dua na ilawalawa ka dau veitaratara ena initaneti vata kei ira na lewe ni matavuvale, itokani, kei na daukaulotu e rawa ni ra wasea nodra ivolanikalou ni veimacawa ka ra dau vakacuruma tu mai kina e so na vakasama se ivakadinadina. Ni da lewe ni dua na ilawalawa ena vakarawarawataka na kena vakayacori tikoga. Na luvei keirau yalewa e vuli tiko ena koronivuli torocake e tiko talega na nona ilawalawa ka ra dau veitaratara ena text kei na sala ni vakau ivolanikalou.

E wasea tiko o goneyalewa na ivolanikalou ena itukutuku raraba

Yalovinaka mo kakua ni tarova nodra vakaitavi na lewe ni so tale na matalotu ena nomu ilawalawa. Era sa vaqara tale tikoga na sala mera laveti cake kina na nodra vakanananu mera voleka vua na Kalou.

Cava So na Kena Yaga?

E vulica tiko o Sister Durrant na ivolanikalou

Cava so na kena yaga? Keirau sa dau vakananuma vakatitobu tiko kei Julie e yadua na tiki ni volatabu ena dua na macawa ka sa sivia e tolu na yabaki oqo. Keirau a navuca taumada me 20 na yabaki na neirau ituvatuva. Se qai tukuna oti ga oqo vei au: “Ena nomu a tukuna vei au me daru vakananuma vakatitobu e dua na tikina ena dua na macawa me 20 na yabaki, au a vakasamataka seu rawa ni na cakava me dua na vula. Sa sega tale ni tiko qo vei au na vakatitiqa o ya. Au sega ni vakabauta ni na taleitaki na kena na biu e dua na tikina ena kato ni wai liliwa ena veimacawa, ka mai vakananuma vakatitobu tu yani ena veigauna au raica kina, sa laveta sara ga na yaloqu.”

Ni oti na vakanananu titobu me ono na macawa, e qai kaya e dua na marama mai Texas, Amerika: “Sa vaqaqacotaki sara ga na noqu ivakadinadina, … kau sa vakila niu sa voleka sara vua na Tamaqu Vakalomalagi. … au taleitaka na kena sa moici au na vosa ni Kalou meu vinaka cake kina.”

Dua na itokani itabagone e vola: “Au sa taleitaka dina niu rawa ni [vakananuma titobu] baleta ni sa vukei au meu vakanamata ki na veika e bibi cake.”

Dua na neitou daukaulotu e wasea mai vakaoqo: “Au sa dau vakananuma titobu tu mai ena veimacawa e yadua na tikina me tekivu mai na June 2014, kau sa taleitaka sara ga. … Na veitiki ni ivolanikalou oqo, sa ra vaka na noqu itokani meu rawa ni na vakararavi kina ena gauna au gadreva kina na veivuke.”

Vei au, au vakila na Yalotabu ena noqu bula niu vakanananu titobu ena veimacawa. Na noqu lomana na ivolanikalou sa laveti cake talega niu sa sasagataka tiko meu “qarauna me savasava tikoga na [noqu] vakanananu ena veigauna kece.”¹¹

Vakasamataka na veisureti kei na veivakalougatataki cecere oqo mai vei Nifai: “Ia, mo dou toso ki liu ka tudei vei Karisito, ena nomudou vakanuinui taucoko sara me yacova na ivakataotioti, raica sa kaya vakaoqo na Tamada; Dou na rawata na bulatawamudu.”¹² Ena yalo ni “kana mai na vosa i Karisito,” na vakanananu titobu e vaka na kena laukana vakalailai e dua na kakana talei, oti sa qai mai mama tu yani vakamalua ena nomu sa rui taleitaka me yacova sara ni ko sa tiloma oti.

E vakaikanakana ki na marama oqo na salad

Na Cava Na Nomu Tikina?

Ko na laki vakananuma titobu beka e dua na tiki ni ivolanikalou ena veimacawa, ena vula taucoko oqo? ena yabaki taucoko oqo? Se me na balavu sara yani? O au kei Julie keirau sa sureti ira kece na daukaulotu qaqa mai Texas Dallas me keimami vakananuma vakatitobu me 20 na yabaki. Keimami na takosova na itinitini ni laini ena loma ni 17 na yabaki mai oqo. Keimami sa na qai tuvanaka tale e dua na lalawa vou me laveta na neimami vakasama ka kauti keimami voleka yani vei Karisito.

Sa na rawa mo ni tarogi keimami mai vaqo, “Na cava na nomu tikina?” Ia kevaka ko na cakava o ya, vakarau mo wasea na nomu tikina me kena isau. Keimami kece keimami na laveti cake ni sa vua ni veisolisoli oqori.

Rawa li ni ko vakasamataka na veisau ena yaco vei iko kei na nomu matavuvale kevaka mo vola e dua na tiki ni ivolanikalou vou e yalomu kei na nomu vakasama ena veimacawa ena vica na vula mai oqo se vica na yabaki se balavu sara?

Sa Noda iVakaraitaki o Jisu Karisito

Rairai a taleitaka sara na ivolanikalou o Jisu Karisito ni se gone lailai sara. Rairai a dau wilika ka vakasamataka na ivolanikalou ni a se gone ka rawa kina vua me veivosaki vakatitobu kei ira na vuku ena valetabu ni se qai yabaki 12.¹³ A tekivutaka na Nona kaulotu ni sa yabaki 30,¹⁴ ka dau vakayagataka na ivolanikalou ni se qai tekivu kei na gauna kece e kaulotu tiko kina o Koya.¹⁵ Ena rawa beka meda tukuna ni o Jisu e taura e 20 na yabaki ena nona vulica ka vakananuma vakatitobu na ivolanikalou me tiki ni Nona vakavakarau ni laki kaulotu? E tiko beka e dua na ka ena gadrevi mo qarava nikua mo vakarau kina vakayalo baleta na madigi ka na vakalougatataka na nomu matavuvale kei ira na tamata?

Bulataka Nomu Vakabauta ka Cakava Sara

Ni raicilesu, au nuitaka ni ko na maroroi ilavo ena veimacawa. Bulataka nomu vakabauta, vakaivakarautaka nomu bula, ka cakava sara. Sa noqu masu vakaidina ni ko ni na digitaka mo ni vakananuma vakatitobu ka vakalevu sara na vosa ni Kalou ena veimacawa. Bulataka nomu vakabauta, vakaivakarautaka nomu bula ka cakava sara.

Sega ni vaka noqu imatai ni veisureti ni maroroi ilavo, na yaga ni kena ikarua na veisureti ni vakabula yalo sa na nomuni me tawamudu—galala mai na sarasara kei na veveka ni vuravura oqo.¹⁶

O Elder D. Todd Christofferson e a veivakasalataki ka yalataka: “Vulica vakavinaka na ivolanikalou, me vakainaki. Vakasamataka vakatitobu ka masulaka. Na ivolanikalou era ivakatakila ka ra na qai kauta mai e so tale na ivakatakila.”¹⁷

iTinitini

Au yalataka ni ko na sega ni vakacauoca ni vola e dua na tiki ni ivolanikalou ena yalomu kei na nomu vakasama ena veimacawa. Ko na vakila na inakinaki, tataqomaki, kei na kaukauwa vakayalo e tudei.

Nanuma na vosa i Jisu Karisito ni a kaya, “Cakava ga na ka o ni raica niu a cakava.”¹⁸ Meda sa qai bulataka vakataucoko na Nona vosa ki na noda bula, sa noqu masu ena yaca i Jisu Karisito, emeni.