Me Sa Rogo Mai na Biukila

Mai vei Elder Gregory A. Schwitzer

Ena Vitusagavulu

E gadreva o vuravura na tisaipeli eso i Karisito ka rawa ni vakadewataka vakamatata na itukutuku ni kosipeli mai na lomana.

Ena vulaikatakata se qai oti ga oqo a mai tiko voli vata kei keirau e rua na makubui keirau tagane, ni rau laki vakaitavi na nodrau itubutubu ena dua na itaviqaravi taubale ni ivuvu ena nodratou iteki. A vinakata matua na luvei keirau yalewa me rau na vakatovotovotaka na taba piano o rau na gone ni rau yali voli mai vale. A kila o koya ni na guilecavi rawarawa na vakatovotovo ena vica na siga vata kei na tubudrau. Dua na yakavi au a dabe kei na makubuqu yabaki 13, o Andrew, ka vakarogoci koya.

E mamakutu sara na gonetagane oqo ka taleitaka na tiko e tautuba. Sa rawa vua me na vakayagataka taucoko na nona gauna ena vakasasa kei na siwa. Ena nona vakatovotovo taba piano voli, au rawa ni vakila ni a vinaka cake vua me siwa voli ena dua na uciwai voleka ga. Au vakarorogo tu ni tabaka voraki toka na ivakatagi yadua ni dua na sere kilai levu. Na veirorogo kece e tabaka a duavata tu ga na kena inaki kei na irogorogo, ka vakavuna me dredre ni vakatakilai vinaka kina na kena memela. Au a dabe tikivi koya ena teveli ka vakamacalataka na bibi ni kena tabaki vakaukauwa toka na veiki memela ka vakalailai sobu ena veirorogo ka salamuria na memela. Keirau veitalanoataka na veivakurabuitaki levu ni ivakatagi na piano. E sa rawa ni dua na itomo ni domona vakaikoya kei na ka e vakila ka yaco me dua na iyaya totoka ni veitaratara. Me vaka ga e vosa ka toso malua na tamata mai na dua na vosa ki na dua tale, sa dodonu me vakakina na drodro ni memela ni da toso mai na dua na rorogo ki na dua tale.

Keirau a veidredrevaki ni a tovolea se baci tovolea tale. A tosocake na nona matadredredre ni sa tekivu rogo vakamalua mai na memela kilai levu mai na rorogo a vakasaurarataki taumada. Sa yaco me matata sara na itukutuku: “Au luve ni Kalou, e a talai au mai.”¹ Au a tarogi Andrew ke a rawa ni vakila na duidui ena itukutuku. A sauma o koya, “Io, Tukaqu, au rawa ni vakila!”

A vakatavulici keda na iApositolo o Paula me baleta na veidutaitaki ni veivosaki ki na iyaya ni vakatagi eso ni a volavola kivei ira mai Korinica:

“Ia na veika sa sega ni bula ka sa dau rorogo, se na bitu ni vakatagi se na api, kevaka sa sega ni duidui na kena rorogo, ena kilai vakaevei se sa cava nai balebale ni ka sa laga ena bitu ni vakatagi se na api?

“Ia kevaka ena rorogo na davui ni valu ka sega ni kilai na kena rorogo, o cei ena vakarautaki koya me laki valu?”²

Ke tiko e dua na gauna e gadreva kina o vuravura na tisaipeli eso i Karisito ka rawa ni vakadewataka vakamatata na itukutuku ni kosipeli mai na lomana, sa ikoya oqo. Eda sa gadreva na kaci matata ni biukila.

E sa noda ivakaraitaki vinaka sara o Karisito. A dau vakaraitaka tu ga o Koya na yaloqaqa me tutaka na ka e dina. E voqa yani na Nona vosa ki na veisenituri ni sureti keda meda nanuma ni lomana na Kalou kei ira na wekada, ni muria taucoko na ivunau ni Kalou ka da bula rarama voli ena vuravura. A sega ni rere o Koya me vosa saqata na kaukauwa vakavuravura se o ira na daunilewa ena Nona gauna, dina ga ni ra a saqata voli na Nona ilesilesi ka solia Vua na Tamana Vakalomalagi. A sega ni vakarautaki na Nona vosa me veivakasevai ia me vakayarayarataka ga na loma ni tamata. E kila vakamatata o Koya na lomai Tamana ena ka taucoko a kaya ka cakava.

Au taleitaka talega na ivakaraitaki nei Pita, ka a tu doudou e matadra na tamata ni vuravura ena yaloqaqa kei na duavata ena siga ni Penitiko. Ena siga oya era a vakasoqoni vata na tamata mai na vuqa na vanua ni vakasewasewani voli na Yalododonu eliu baleta ni ra rogoci ira ni vosataka na vosa tani eso ka nanuma era sa mateni. O Pita, ni vakatawani na lomana ena Yalotabu, a tucake me taqomaka na Lotu kei ira na lewena. A vakadinadina o koya ena veivosa oqo: “Oi kemudou na kai Jutia, kei kemudou kecega sa tiko e Jerusalemi, mo dou kila na ka oqo, ka rogoca na noqu vosa.”³

A qai veivakaroti mai na ivolanikalou o koya ka tu kina na parofisai i Karisito ka tukuna vakadodonu na ivakadinadina oqo: “O koya oqo me kila sara kina na mataqali taucoko nei Isireli, ko Jisu oqo, ko koya dou a vakota ki na kauveilatai, sa lesia na Kalou me Turaga ka Karisito talega.”⁴

Vuqa era rogoca nona vosa ka vakila na Yalotabu, ka lewena e 3,000 na tamata na ilawalawa ni Lotu eliu. Oqo e sa ivakadinadina bula ni dua na turaga se marama ka sa lomana voli me vakadinadinataka ni sa vaka me gole tiko ena mua veibasai o vuravura, ni sa rawa ni vakayaco veisau.

Ni da sa caka vakatulewa vakalewenilotu meda tucake ka vakadinadinataka vakaukauwa na ivunau ni Kalou kei na Nona Lotu, e dua na ka e veisau e lomada. Eda sa vakararamataki ena iserau ni Matana, eda sa vakavolekati ki na Nona Yalotabu. O Koya sa na qai liu vei keda ka tiko ena “[yasada] imatau kei na [yasada] imawi, ia na [Nona] Yalotabu ena tiko e [lomada], ka vakavolivoliti [keda] na [Nona] agilosi, ka laveti [keda] cake.”⁵

Na tisaipeli dina i Karisito era sega ni dau vakaulubaletaka na ivunau ni sega ni veirauti kei na ivakavuvuli oqo ni vuravura. O Paula e dua tale na tisaipeli yaloqaqa, ka tukuna vakadoudou ni o koya e “sega ni maduataka nai tukutuku vinaka kei Karisito: ni sai koya oqo na kaukauwa ni Kalou me vakabulai kina ko ira yadua era sa vakabauta.”⁶ O ira na tisaipeli dina era dau matataka na Turaga ni sega madaga ni kena gauna veiganiti me vakayacori vakakina. Era gadreva na tisaipeli dina mera vakauqeta na loma ni tamata, sega ni vakalomavinakataki ira ga.

E dau sega ni vakavuqa se veivakacegui soti meda tutaki Karisito. Au vakabauta ni a vakakina vei Paula ni a kacivi ena matai Tui Akaripa ka tukuni me vakadodonutaki koya ka wasea na nona itukutuku. O Paula, ni sega tale ni wawa, a tukuna vakadoudou saraga na nona vakabauta me vakadinadinataka kina na tui veivakatotogani oqo ni a “volailai sara” ni rawai me lotu va-Karisito.

A vakadinadinataka na vosa nei Paula na nona gagadre me rawa ni ra kila vakamatata na tamata na ka ena tukuna. A tukuna o koya vei Tui Akaripa ni sa nona gagadre o ira kece na rogoci koya era na sega ni “volailai” mera lotu va-Karisito ia mera yaco “vakatautauvata” ni tisaipeli i Karisito.⁷ O ira ka vosa vakamatata e rawa ni vakayacora oqo.

Ena vuqa na yabaki noqu vulica voli mai kina na italanoa ni tadra nei Liai ena iVola i Momani,⁸ au dau vakananuma tu ga na vale levu me dua na itikotiko era vakatawana walega na dauvakacaca. A vakasinaiti tu na vale ena tamata era veivakalialiai ka dusi ira tiko na yalododonu ka sa kukube tu ki na ititoko kaukamea, ka matataka na vosa ni Kalou, ka sa yacova yani na vunikau ni bula, ka matataka na loloma ni Kalou. Eso e sega ni taqea rawa na kaukauwa ni nodra vakacacani mai vei ira na tamata ka ra sikalutu. So tale era navuca me tomani ira na veivakalialiai tiko ena vale levu. E sega li ni tiko vei ira na yaloqaqa mera vosa doudou kina ni saqata na veivakalewai se itukutuku eso ni vuravura?

Ni’u vakasarava voli na toso tani ni vuravura oqo mai vua na Kalou, au vakasamataka na vale oqo e sa tubu tiko vakaiwiliwili. Vuqa e raici ira ni veigoleyaki voli nikua ena buturara ni vale levu oya, ka sega ni vakila ni ra sa tiki tiko ni kena itovo vakavanua. Era dau rawai vakavuqa ki na veitemaki kei na veitukutuku. Eda kunei ira vakaoti ni ra veivakalialiai se veitokoni voli kei ira na dauveivakacacani.

Ena veiyabaki au a dau nanuma ni ra veiwalitaka voli na ilawalawa veivakacacani na ivakarau ni nodra tutaka na nodra bula na yalododonu, ia na veidomo mai na vale oya edai e sa veisautaka na kena rorogo kei na ivakarau. O ira na veivakacacani era dau tovolea wasoma mera vakurabuitaka na itukutuku rawarawa ni kosipeli ena bololaki ni so na usutu makawa ni Lotu se ena nona dusi vakasewasewani e dua na parofita se iliuliu. Era sa bololaka tale tikoga na uto saraga ni noda ivunau kei na lawa ni Kalou, ka a soli mai ena Buli kei vuravura. O keda, vaka na tisaipeli i Karisito ka lewe ni Nona Lotu, meda kakua sara ni sorova na ititoko kaukamea oya. Sa dodonu meda vakila ni rogo voli na domo ni biukila mai na vu ni lomada vakaikeda.

Na itukutuku rawarawa oya ni Kalou e sa Tamada Vakalomalagi dauloloma ka sa Luvena o Jisu Karisito. Sa vakalesui mai na kosipeli ena gauna oqo mai vei ira na parofita bula, ka sa ivakadinadina na iVola i Momani. Na salatu ki na bula marau e sa mai na maucokona ni matavuvale me vaka a yavutaki ka vakatakilai taumada mai vua na Tamada Vakalomalagi. Oqo na memela kilai levu ni tukutuku e rawa ni ra vakila e vuqa baleta era a rogoca mai na nodra bula taumada.

Sa kena gauna vei keda, na Yalododonu Edaidai, meda tucake ka vakadinadinataka. Sa kena gauna oqo me ulabaleta kina na rorogo ni vuravura na duidui ni memela ni kosipeli. Au kuria na noqu ivakadinadina ki na itukutuku ni iVakabula kei na Dauveivueti ni vuravura oqo. E bula o Koya! Sa vakalesui mai na Nona kosipeli, ka sa rawa ni veivakadeitaki na veivakalougatataki ni bula marau kei na vakacegu ena bula oqo mai na bulataki ni Nona ivunau kei na muri ni Nona salatu. Oqo na noqu ivakadinadina ena yaca i Jisu Karisito, emeni.