Ni ra na Daunanumi Koya Tikoga

Mai vei Elder Claudio R. M. Costa

Ena Vitusagavulu

Au taleitaka meu vulica ka vakananuma vakatitobu na bula nei Koya ka solia na nona ka kecega ena vukuqu kei keda kece sara.

Au dau taleitaka na sere ni Lalai ka kaya:

Talanoataka vei au na italanoa kei Jisu au dau taleitaka na rogoca
Veika au na kerea me tukuna vei au ke a tiko eke.
Na bati ni salatu, tukuni ni wasawasa,
iTalanoa kei Jisu, Tukuna mai vei au1

Au vakabauta na kena tekivutaki me dua na ivalavala tudei na kena talanoataki na italanoa kei Jisu vei ira na luveda kei na noda matavuvale e dua na sala digitaki me da vakatabuya kina na Siga ni Vakacecegu ena noda veivale.

Oqori ena kauta dina mai e dua na yalo vinaka ki na noda vale ka vakarautaka ki na noda matavuvale na ivakaraitaki eso mai vua na iVakabula vakataki Koya.

Au taleitaka meu vulica ka vakananuma vakatitobu na bula nei Koya ka solia na nona ka kecega ena vukuqu kei keda kece sara.

Au taleitaka meu wilika na ivolanikalou me baleta na Nona bula tawa cala, ni oti na kena wiliki na ivolanikalou ka tukuna na veika a sotava o Koya, a bobo na mataqu kau tovolea meu raitayaloyalotaka na veigauna tabu oqo kau vakavulici ka vaqaqacotaki kina.

Na gauna me vaka:

Na nona kasivi ena qele ka, ni sa wakia rawa na soso mai na kasivi, a boroya e matana na tamata mataboko ka kaya vua, “Laki tavoi ki na isilisili ko Sailoama.” A sa lako yani ka “tavoi ka lako tale mai ka rai rawa.”²
Na nona vakabula na yalewa sa turidrabalavu ka a tara na tutu ni Nona isulu, ni vakabauta ena nona tara ga na Nona isulu ena bula kina.³
Ena nona rairai vei ira na Nona tisaipeli, ka taubale e dela ni wai.⁴
Ni lako vata kei ira na tisaipeli ena gaunisala ki Emeo ka dolava na ivolanikalou ki na mata ni nodrau kila ka.⁵
Ena nona rairai vei ira na tamata e Amerika ka tukuna vei ira me ra lako mai Vua ka curumaka na ligadra ki sarisarina ka tara talega na we ni ivako ena Ligana kei na Yavana, me rawa ni ra kila ni sai Koya ga “na Kalou ni Isireli, kei na Kalou ni vuravura kecega, [ka] sa mate ena vuku ni nodra ivalavala ca na kai vuravura.”⁶

Au reki niu kila ni tu eso na itubutubu era dau talanoataka na italanoa kei Karisito vei ira na luvedra. Au kila oqo ena noqu vakaraici ira toka na gone lalai ena Lotu ena nodra vakaitavi ena veituvatuva ni Lalai, vakakina ena veisoqoni tale eso.

Au vakavinavinaka vei rau na noqu itubutubu ena nodrau vakavuvulitaki Karisito vei au. Au raica tiko ga na nona ivakaraitaki na iVakabula e vukei keirau kina kei na watiqu lomani ena neirau vakavulici ira na luvei keirau.

E vakasinaiti ena reki na yaloqu ena noqu raici ira na luvequ ni ra talanoataka na italanoa kei Karisito vei ira na makubuqu. E vakananuma vei au e dua na ivolanikalou taleitaki, e tiko ena 3 Joni, wase 1, tikina 4, ka vaoqo na kena rorogo, “Sa ka levu na noqu reki ena vuku ni ka e duabau ga oqo, niu sa rogoca era muria na dina ko ira na luvequ.” Na cava me kua kina o ira talega na makubuqu?

Au vakavinavinaka vei ira na noda iliuliu, era sa vakavuvulitaki Karisito tiko ga vei keda, me baleta na vakarokorokotaki ni Siga ni Vakacecegu, ka vakakina na vakayagataki ni sakaramede ena Vei-Sigatabu yadua me vakarokorokotaki kina na iVakabula.

Na Siga ni Vakacecegu kei na sakaramede ena marautaki vakalevu ni da vulica na italanoa eso kei Karisito. Ni da vakayacora vakakina, eda sa tauyavutaka na ivakarau tudei ena tara cake na noda vakabauta kei na noda ivakadinadina ka taqomaka talega na noda matavuvale.

Ena vica na macawa sa oti, ena kena vulici tale tiko na itukutuku nei Peresitedi Russell M. Nelson ena koniferedi raraba sa oti, kei na noqu vakananuma tiko vakatitobu na siga ni Vakacecegu, au vakila e dua na vakavinavinaka titobu me baleta na veivakalougatataki kei na galala me rawa ni da vakaivotavota ena sakaramede. Vei au, oqo e dua na gauna bibi sara, tabu, ka vakayalo. Au taleitaka vakalevu na soqoni ni sakaramede.

Ena noqu vakanananu vakatitobu, au vulica vakamalua sara na vakalougatataki ni madrai kei na wai. Au wilika ka vakasamataka vakatitobu na masu ni sakaramede kei na cakacaka vakalotu ni sakaramede. Sa tekivu meu vakasamataka vakabibi ka taleva ena noqu vakasama kei na yaloqu na veika a yaco era semati ki na sakaramede.

Ena yalo ni vakasama titobu, au vakananuma lesu tale, na imatai ni siga ni kanavata ni madrai sega ni vakaleveni, ni sauma ko Jisu na nodratou taro na Nona tisaipeli ena vanua me vakarautaki kina na Lakosivia, a sauma ka kaya, “Lako vua na tamata ko ya ki na koro, ka kaya vua, Sa kaya na iVakavuvuli, Sa voleka na noqu siga; koi Au kei ira na noqu tisaipeli, keitou na ia na kanavata ni lakosivia ena nomu vale.”⁷

Au tovolea meu raitayaloyalotaka ena noqu vakasama na nodratou voli kakana ka vakarautaka vakamaqosa na teveli me ratou kanavata Kaya ena siga bibi ko ya: na teveli me rauta e 13 na tamata, o Koya kei ira na tinikarua Nona tisaipeli, sa dau lomana ko Koya.

Au tagi niu raitayaloyalotaka na Karisito ni kana vata kei iratou, qai kaya cake, “Au sa kaya vakaidina vei kemudou ni na soli au yani e dua vei kemudou.”⁸

Au vakasamataki iratou na tisaipeli yalorarawa ena nodratou tarogi Koya, “Noqu Turaga koi au beka?”⁹

Ni tarogi Koya o Jutasa ena taro vata oya, a sauma vakamalua, “O sa kaya dina mai.”¹⁰

Au rawa ni raitayaloyalotaka na liga oya ni sa veivakabulai, veivakacegui, veivakatataki cake, ka veivakalougatataki ni dovia na madrai ka kaya ko Jisu, “Taura, kania oqo na yagoqu.”¹¹

Sa qai taura ko Koya e dua na bilo sa tu kina na waini, sa vakavinavinaka ka solia vei ira na bilo, ka kaya, “Dou gunu kece kina; oqo na noqu dra ni veiyalayalati vou sa liviraki ena vukudra e lewevuqa me bokoci na ivalavala ca.”¹²

Ena noqu vakasama, au raici ira na tisaipeli, yadudua, ka kunea e matadra na nodra lomaleqataka na iVakavuvuli, era dau lomana vakalevu. E vaka ga niu dabe sara tikoga vata kei iratou, ka sarava tiko na veika kece. Au vakila e dua na mosi kaukauwa e yaloqu, vakasinaiti ena yaluma kei na rarawa ena veika sa vakarau me sotava o Koya ena vukuqu.

Sa sinai na yaloqu ena gagadre meu tamata vinaka cake. Ena veivutuni kei na rarawa, au diva vakaukauwa sara ke rawa niu vakamamacataka se levea na tuturu ni vica mada ga na turu ni Nona dra ka vakadavei mai Kecisemani.

Au qai vakananuma na sakaramede eda dau vakaivotavota kina e veimacawa me da vakananumi Koya. Niu kitaka tiko vakakina, au vakananuma na veivosa yadua ni masu ni madrai kei na wai. Au vakananuma vakatitobu na vosa “ka dau nanumi Koya” ena masulaki ni madrai, vakakina “ni ra na dau nanaumi Koya” ena masulaki ni wai.¹³

Au vakananuma na ibalebale ni “dau nanumi Koya tikoga.”

Vei au na kena ibalebale:

Me nanumi na Nona bula taumada, ena gauna a cakava kina ko Koya na vuravura totoka oqo.¹⁴
Me nanumi na nona sucu vakaloloma ena valenimanumanu, mai Peceliema e Jutia.¹⁵
Me nanumi ni se qai cauravou yabaki 12 mada ga, sa veivakavulici o Koya ka vunau vei ira na vuniwai ena valetabu.¹⁶
Me nanumi na Nona lako vakatikitiki taudua ena dua na vanua lala, me vakavakarau ki na Nona veiqaravi vakalotu ena bula oqo.¹⁷
Me nanumi na Nona vakamataliataki e matadratou na Nona tisaipeli.¹⁸
Me nanumi na nona vakatekivuna na sakaramede, ena iOtioti ni iVakayakavi kei iratou.¹⁹
Me nanumi Nona lako ki na Were mai Kecisemani ka vakararawataki vakalevu kina me baleta na noda ivalavala ca, na mosi, na rarawa, kei na tauvimate ka bunotaka kina na dra mai na qara kecega ni yagona.²⁰
Me nanumi ni oti na veivakararawataki levu kei na mosi, ia mai Kecisemani tikoga, a soli koya yani ena dua na iregu e dua vei ira na tisaipeli ka dau vakatoka ko Koya me itokani.²¹
Me nanumi Nona kau yani vei Pailato kei Eroti me lewai.²²
Me nanumi ni sa vakalialiai, vakanakuitataki, kasiviti, lausabi, ka warolaki ena dali ka sea na lewe ni Yagona.²³
Me nanumi na kena vakaisalataki na Uluna ena wa vakavotona.²⁴
Me nanumi ni a colata ga na Nona kauveilatai ki Kolikoca ka vakoti ki na kauveilatai mai kea, ka sotava na mosi kecega vakayago ka vakayalo.²⁵
Me nanumi mai na kauveilatai, ni sa sinai na Lomana ena loloma cecere, a raici ira era vakoti Koya tiko ki na kauveilatai, sa rai cake ko Koya ki lomalagi, ka vakatakekere vei Tamana, “I Tamaqu, kakua ni cudruvi ira, ni ra sa sega ni kila na ka era sa kitaka.”²⁶
Me nanumi ni kila o Koya, ni sa vakacavara na Nona itavi ena nodra vakabulai na kawatamata, sa solia yani na Yalona ki na ligai Tamana, na Tamada.²⁷
Me nanumi na Nona Tucake tale, ka sa vakadeitaka na noda tucaketale kei na kena rawa me da laki bula vata kei Koya me tawamudu, vakatau ena noda digidigi.²⁸

Ka kena ikuri, niu vakasamataka vakatitobu na masu ni sakaramede kei na kena ibalebale bibi, e vakananuma vei au na kena vakasakiti me da ciqoma na veika e yalataki, ena gauna e masulaki kina na sakaramede, ka ni da na dau nanumi Koya tikoga, ena dau tiko ga vata kei keda na Yalona.²⁹

Au vakabauta ni sa tu ga na Nona gauna na Turaga me solia kina vei keda na ivakatakila. Au qai kila vakamatata sara oqo niu vulica tiko na Na Dauvunau 3:1, 6, ka kaya vaqo:

“Sa dui vagauna na ka kecega, ka sa dui vakasiga na ka kece sa caka e rukui lomalagi: …

“Na siga me rawa kina na iyau, kei na siga me yali kina na iyau, na siga me maninitaka na ka, kei na siga me dausoli kina na ka.”

Na sakaramede talega na gauna me vakavulici keda kina na Tamada Vakalomalagi me baleta na Veisorovaki ni Luvena Daulomani na noda iVakabula o Jisu Karisito me da ciqoma kina na kena ivakatakila. Sa gauna me da “Tukituki ka na dolavi vei kemudou,”³⁰ me da kerea ka ciqoma na kilaka oqo. Sa gauna me da kerea kina ena vakarokoroko vua na Kalou na kila ka oqo, ke da cakava vakakina, au sega ni vakabekataka ni da na rawata na kilaka oqo, ka na vakalougatataka na noda bula me sega ni yalani.

Au taleitaka na Siga ni Vakacecegu, na sakaramede, kei na kedrau ibalebale. Au lomana na iVakabula ena yaloqu taucoko. Ena yaca i Jisu Karisito, emeni.