Cov Mus Saib Xyuas Tom Tsev tsab Xov, Kaum Ob Hlis Ntuj 2015
Tej Cwj Pwm ntawm Yexus Khetos: Kev Hlub Tshua thiab Kev Ua Siab Zoo
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej tej cwj pwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj mus saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
“Nyob hauv vaj lug kub, kev khuv leej txhais hais tias ‘yus raug txom nyem nrog lwm tus.’ Kev khuv leej txhais hais tias yus pab lwm tus tu siab, thiab hlub lwm tus.”1
Thawj Tswj Hwm Thomas S. Monson hais tias, “Yexus coj yam ntxwv kom peb paub hlub lwm tus. “Tus txiv neej ceg tawv nyob ntawm lub pas dej Npexathas; tus poj niam uas lawv ntes thaum nws tab tom deev hluas nraug; tus poj niam nyob ntawm Yakhauj lub qhov dej; Yailus tus ntxhais; Laxalus, Maivliag thiab Mathas tus nus—txhua tus yog ib tug uas raug txom nyem nyob ntawm txoj kev mus rau Yelikaus. Txhua tus xav tau kev pab.
Rau tus uas ceg tawv nyob ntawm lub pas dej Npexathas, Yexus hais tias, ‘Koj cia li sawv, yaws koj daim lev thiab mus.’ Rau tus poj niam uas ua txhaum Yexus ntuas hais tias, ‘Koj cia li mus tsev thiab tsis txhob ua txhaum ntxiv lawm.’ Kom pab tus poj niam uas los hais dej, Nws muab cov dej uas ‘yuav txhawv hauv nws lub siab thiab cawm nws.’ Rau Yailus tus ntxhais uas twb xiam lawm, Yexus txib hais tias, ‘Me ntxhais, kuv hais rau koj hais tias koj cia li sawv tsees.’ Nws hais rau Laxalus uas nyob hauv lub ntxa hais tias, ‘Koj cia li tawm los.’
“Tus Cawm Seej yeej txaus siab muaj kev khuv leej mus ib txhis li. … Thov kom peb qhib peb lub siab, cia Nws—tus uas coj yam ntxwv txog kev khuv leej—yuav nkag mus hauv.”2
Vaj Lug Kub Ntxiv
Phau Ntawv Nkauj 145:8; Xakhaliyas 7:9; 1 Petus 3:8; Mauxiyas 15:1, 9; 3 Nifais 17:5–7
Los ntawm cov Vaj Lug Kub
Linda S. Reeves, tus pab cuam thib ob hauv lub Koom Haum Niam Tsev tuam pawg thawj tswj hwm hais tias, “Kuv tus txiv wb txhos caug thov kom cawm wb tus ntxhais uas muaj 17 xyoo. Zaum no tsis tau, tiam sis . … peb thiaj li paub zoo … tias … [tus Cawm Seej] muaj kev hlub tshua rau peb tej kev tu siab thiab kev raug mob.”3
“Ib zaj dab neeg ua kuv nyiam heev txog tus Cawm Seej lub neej yog zaj uas hais txog Laxalaus. Vaj lug kub qhia peb hais tias ‘Yexus hlub Mathas, … Mathas tus niam hluas [Maivliag], thiab [nkawd tus nus] Laxalus heev.’”4 Thaum Laxalus mob heev, nkawd xa xov rau Yexus, tiam sis thaum Nws tuaj txog Laxalus twb xiam lawm. Maivliag khiav mus cuag Yexus, txhos caug ntawm Nws ko taw, thiab quaj. Thaum Yexus pom Maivliag quaj, “nws nyuaj siab kawg, thiab … nws txawm quaj” (Yauhas 11:33, 35).”
“Nov yog hais rau peb. Peb yuav tsum paub thiab pom rau peb tus kheej ces peb mam li pab tag nrho Leej Txiv Saum Ntuj Ceeb Tsheej cov me nyuam kom paub thiab pom thiab paub tias Nws tau ris peb tej kev txhaum, kev raug mob, thiab kev txom nyem kom nws thiaj li paub nplij peb tej siab.”5
© 2015 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/15. Pub txhais ua lus Hmoob: 6/15. Kev txhais Visiting Teaching Message, December 2015. Hmong. 12592 295
Xav Txog Qhov No
Leej twg yuav tau koob hmoov los ntawm koj txoj kev khuv leej?