Thawj Pawg Thawj Tswj Hwm tsab Xov, Kaum Ob Hlis Ntuj 2015
Siv Sij Hawm rau tus Cawm Seej
Los ntawm Thawj Tswj Hwm Thomas S. Monson
Twb txog ib lub caij Christmas dua thiab yuav pib xyoo tshiab. Zoo nkaus li nag hmo xwb peb twb ua koob tsheej txog tus Cawm Seej txoj kev yug los thiab cuab hom phiaj tshiab.
Xyoo no peb puas tau cuab hom phiaj kom siv sij hawm nyob hauv peb lub neej thiab kho ib qho chaw nyob hauv peb lub siab rau tus Cawm Seej? Txawm peb ua zoo npaum li cas ua raws li peb tej hom phiaj los, kuv paub tias peb sawv daws xav ua zoo dua. Lub caij Christmas yog ib lub sij hawm zoo tshaj plaws ntsuam xyuas thiab rov qab sib zog ua raws li peb tej hom phiaj.
Nyob hauv peb lub neej uas muaj hauj lwm ntau ua, yeej muaj ntau yam uas peb tsom ntsoov rau, peb yuav tsum ua tib zoo rau siab ua hauj lwm kom coj Yexus Khetos los rau hauv peb lub neej thiab nyob hauv peb lub tsev. Thiab peb yuav tsum ua zoo li cov Neeg Txawj Ntse los ntawm Sab Hnub Tuaj, tsom ntsoov rau Nws lub hnub qub thiab “tuaj pe hawm nws.”1
Txij thaum ub los txog lub sij hawm no, Yexus txoj moo yeej tsis tau hloov. Rau Petus thiab Adales nyob ntawm ntug dej Kalilais, Nws hais tias “Cia li nrog kuv mus.”2 Rau Filipis nws hais tias, “Cia li nrog kuv mus.”3 Rau tus Neeg Levis uas zaum ntawm lub rooj sau se Nws hais tias, “Cia li nrog kuv mus.”4 Thiab rau nej thiab rau kuv, yog peb yuav mloog lus, Nws yuav caw peb zoo ib yam thiab: “Cia li nrog kuv mus.”5
Thaum peb xyaum ua raws li Nws ua niaj hnub no thiab thaum peb coj raws li Nws tus yam ntxwv, peb yuav muaj cib fim foom koob hmoov rau lwm tus lub neej. Yexus caw peb los pub peb tus kheej rau lwm tus thaum Nws hais tias tus Tswv kom neeg yuav tsum muaj lub siab thiab kev txaus siab ua.6
Puas muaj leej twg uas nej yuav tsum pab thaum lub caij Christmas no? Puas muaj leej twg uas tos nej mus xyuas nws?
Ntau xyoo tas los kuv tau mus xyuas ib tug poj ntsuam laus thaum lub caij Christmas. Thaum kuv nyob ntawd, lub tswb ntawm qhov rooj nrov. Nyob ntawd muaj ib tug kws kho mob uas muaj npe nto moo thiab muaj hauj lwm ntau ua. Tsis tau muaj leej twg hu kom nws tuaj; tiam sis, nws txais kev tshoov siab mus xyuas ib tug neeg mob uas kho siab heev.
Nyob hauv lub caij Christmas no, cov neeg uas mus tsis tau qhov twg xav tau tib neeg tuaj xyuas lawv. Muaj ib hnub Christmas thaum kuv mus xyuas ib qhov chaw rau neeg laus nyob, kuv zaum thiab sib tham nrog tsib tug poj laug, tus laus tshaj muaj 101 xyoos. Nws dig muag, tiam sis nws paub kuv lub suab.
Nws hais tias, “Npisov, xyoo no koj tuaj lig me ntsis! Kuv xav tias koj yeej yuav tsis tuaj.”
Peb zoo siab sib tham ua ke. Tiam sis muaj ib tug neeg laus uas saib ntsoov ntawm qhov rais thiab pheej rov qab hais tias, “Kuv paub tias kuv tus tub yuav tuaj xyuas kuv hnub no.” Kuv xav paub seb nws puas tuaj tiag tiag vim twb muaj lwm lub caij Christmas es nws tsis tau tuaj.
Tseem tshuav sij hawm xyoo no kom ncav tes mus pab lwm tus, muaj siab hlub, thiab lub siab xav pab—tseem tshuav sij hawm ua raws li peb tus Cawm Seej tus yam ntxwv thiab pab lwm tus ib yam li Nws xav kom peb ua. Thaum peb ua hauj lwm rau Nws, peb yuav tsis tso lub cib fim tseg, zoo li tus tswv tsev thaum ub,7 lub cib fim uas peb muaj kom siv sij hawm rau Nws nyob hauv peb lub neej thiab npaj chaw rau Nws nyob hauv peb lub siab.
Peb puas muaj peev xwm to taub cov lus cog tseg zoo kawg uas tus tsim tswv hais rau cov tswv yug yaj nyob hauv tshav zaub hais tias: “Kuv … coj txoj moo zoo uas yog txoj kev zoo siab kawg nkaus. … Hnub no nej tus Cawm Seej twb yug los … [ib tug Cawm Dim], nws yog Khetos uas yog tus Tswv”?8
Thaum peb ib leeg pub khoom plig rau ib leeg thaum lub caij Christmas, thov kom peb nco ntsoov, ris Vajtswv txiaj, thiab txais lub txiaj ntsim zoo tshaj plaws—lub txiaj ntsim los ntawm peb tus Cawm Seej thiab tus Txhiv Dim kom peb yuav muaj txoj sia nyob mus ib txhis.
“Yog tias muab ib lub txiaj ntsim rau ib tug neeg, tiam sis nws tsis kam txais lub txiaj ntsim ntawd, ces yuav muaj nqi dab tsi rau nws? Saib seb, nws tsis zoo siab rau qhov uas tau muab rau nws, yeej tsis zoo siab rau tus uas tau muab lub txiaj ntsim ntawd rau nws.”9
Thov kom peb yuav nrog Nws mus, ua hauj lwm rau Nws, hwm Nws, thiab txais Nws tej txiaj ntsim nyob hauv peb lub neej, kom peb yuav muaj raws li Lihais hais tias, “nws txhais caj npab ntawm nws txoj kev hlub tab tom ua voj voog ncig kuv mus ib txhis li.”10
© 2015 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/15. Pub txhais ua lus Hmoob: 6/15. Kev txhais First Presidency Message, December 2015. Hmong. 12592 295
Qhia los ntawm tsab Xov No
Thawj Tswj Hwm Monson hais kom peb “yuav tsum ua tib zoo rau siab ua hauj lwm kom coj Yexus Khetos los rau hauv peb lub neej thiab nyob hauv peb lub tsev.” Cia li xav seb puas xav sib tham nrog cov uas koj qhia hais tias lawv txhua tus thiab lawv tsev neeg yuav ua li cas thiaj ua tib zoo ua hauj lwm li no. Tej zaum koj yuav xav hais kom lawv xav txog ib tug neeg los sis ib tsev neeg uas lawv yuav xav mus xyuas los sis mus pab thaum lub caij Christmas no. “Xyoo no tseem muaj sij hawm ncav tes pab lwm tus, muaj siab hlub, thiab lub siab xav pab.”