Mesaj Premye Prezidans lan, Fevriye 2016
Ateri Ansekiritenan Toubiyon
Sa pa gen twò lontan madanm mwen, Harriet, ansanm ak mwen te nan yon ayewopò ap gade avyon manyifik ateri. Se te yon jou ki te gen anpil van, epi gwo kout van fewòs te bat sou avyon ki tap pwoche a, sa ki te lakoz yo chak te fè eka ak sekwe pandan yo, t ap apwoche a.
Pandan nou t ap osève lit sa a ant lanati ak machin nan, lespri m te retounen sou pwòp antrènman vòl pa mwen ak prensip mwen te aprann ladan yo—ke m te anseye lòt pilòt nan fòmasyon apresa.
M te toujou konn di yo: “Pa goumen avèk kontwòl yo nan toubiyon an.” “Rete kalm; pa reyaji twòp. Kenbe zye ou fikse sou liy nan mitan pis aterisaj la. Si ou devye de chemen ou te vle a, fè koreksyon ki rapid men ki mezire. Fè potansyèl avyon ou lan konfyans. Woule avèk toubiyon an.”
Pilòt ki gen eksperyans konprann ke yo pa ka toujou kontwole bagay ki ap pase bò kote yo. Yo pa kapab annik etenn toubiyon an. Yo pa kapab annik fè lapli oubyen nèj la disparèt. Yo pa kapab fè van an sispann soufle oyben chanje direksyon li.
Men yo konprann tou ke se yon erè pou yo pè toubiyon oswa gwo van yo—espesyalman kite yo paralize yo. Fason pou ateri ansekirite lè kondisyon yo pa twò ideyal se rete sou bon chemen an epi glise osi pafètman sa posib.
Pandan m t ap gade on avyon apre lòt ki t ap fè dènye apwòch yo epi raple m prensip mwen te aprann nan ane m te yon pilòt yo, mwen te mande tèt mwen si pa t gen yon leson nan sa pou lavi chak jou nou.
Nou paka toujou kontwole tanpèt lavi a mete sou chemen nou yo. Pafwa bagay yo jis pa pase jan nou ta vle a. Nou kapab santi nou souke e nou kraze anba toubiyon desepsyon, dout, laperèz, tristès, oubyen strès.
Nan moman sa yo, li fasil pou nou rete chita sou tout sa ki pap mache yo epi fè pwoblèm nou yo vin sant panse nou. Tantasyon an se fokis sou eprèv n ap travèse yo olye ke nou fokis sou Sovè a ak temwanyaj nou sou laverite a.
Men sa a se pa pi bon fason pou nou navige atravè pwoblèm nou nan lavi a.
Menm jan yon pilòt ki gen eksperyans kenbe fokis li non pa sou tanpèt la men sou sant pis aterisaj la avèk pwen aterisaj korèk la, nou menm tou nou dwe kenbe fokis nou sou sant lafwa nou—Sovè nou an, levanjil Li a, ak plan Papa nou Ki nan Syèl La—ak sou objektif final nou—ki se retounen ansekirite nan destinasyon selès nou an. Nou ta dwe fè Bondye konfyans epi fè rete sou chemen disip la santral efò nou. Nou dwe kenbe zye nou, kè nou, ak lespri nou fokis sou viv nan fason nou konnen nou dwe viv.
Montre lafwa nou ak konfyans nou nan Papa Nou Ki Nan Syèl la nan respekte kòmandman L yo avèk jwa ap pote kontantman ak laglwa pou nou. Epi si nou rete sou chemen an, nou ap travèse nenpòt toubiyon—kèlkeswa jan li parèt fò—pou nou ka retounen nan fwaye selès nou an ansekirite.
Keseswa syèl bò kote nou an klè oubyen plen nyaj menasan, antanke disip Jezikri, nou dwe chèche wayòm Bondye a ak lajisits Li anpremye, konesan ke si nou fè sa, tout lòt bagay nou bezwen yo n ap vin finalman jwenn yo gade Matye 6:33
Ala yon leson lavi enpòtan!
Plis nou obsede pa pwoblèm nou yo, lit nou yo, dout nou yo, ak laperèz nou yo, se plis bagay yo kapab vin difisil. Men plis nou konsantre sou destinayon selès final nou an ak sou lajwa ki genyen nan suiv chemen disip la—pou nou renmen Bondye, sèvi pwochen nou—se plis n ap kapab rive travèse moman twoub ak toubiyon yo avèk siksè.
Chè zanmi m yo, kèlkeswa jan van egzistans mòtèl nou yo ta soufle fò bò kote nou, levanjil Jezikri a ap toujou ofri nou pi bon chemen pou nou ateri an sekirite nan wayòm Papa nou Ki nan syèl la.
© 2016 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/15. Apwobasyon Tradiksyon: 6/15. Tradiksyon First Presidency Message, February 2016. Haitian Creole 12862 036
Ansèyman nan mesaj sa a
Prezidan Uchtdorf konseye nou pou nou ”fè Bondye konfyans epi konsantre efò nou sou rete sou chemen disip la.’’ Panse pou w mande moun w ap ansenye yo kijan yo te arive rete fokis ’’sou destinasyon selès final nou ak sou lajwa ki genyen nan suiv chemen disip la’’ nan moman yo t ap travèse eprèv. Ou gen dwa envite yo pou yo reflechi sou fason yo kapab fokis sou temwanyaj yo sou Kris la nan moman difisil yo epi pou nan lapriyè yo deside kijan pou aplike youn oubyen plis nan ide sa yo nan lavi yo.