Cov Mus Saib Xyuas Tom Tsev tsab Xov, Ob Hlis Ntuj 2016
Vajtswv Tsa Kev Sib Yuav
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub “Tsev Neeg: Ib zaj Lus Tshaj Tawm rau lub Ntiaj Teb” yuav ua li cas kom koj txoj kev ntseeg Vajtswv loj zuj zus thiab foom koob hmoov rau cov uas koj mus saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Cov yaj saub, cov thwj tim, thiab cov thawj coj pheej qhia hais tias “txoj kev sib yuav ntawm ib tug txiv neej thiab ib tug poj niam yog raug tsa los ntawm Vajtswv thiab tias tsev neeg yog lub ntsiab ntawm tus Tsim lub tswv yim.”1
Txwj Laug D. Todd Christofferson los ntawm Pawg Kaum Ob tug Thwj Tim hais tias: “Ib tsev neeg uas muaj ib tug txiv neej thiab ib tug poj niam uas tau sib yuav yog qhov chaw zoo tshaj plaws rau Vajtswv txoj hau kev. …
“… Peb hloov tsis taus qhov uas Vajtswv tau pom zoo rau kev sib yuav zoo li no.”2
Bonnie L. Oscarson, Koom Haum Ntxhais Hluas tus tuam thawj tswj hwm, hais tias: “Txhua tus muaj peev xwm tiv thaiv tus Tswv txoj hau kev nyob hauv zaj lus tshaj tawm txog tsev neeg, tsis hais lawv muaj tus txiv los tsis muaj los yog. Yog tias nov yog tus Tswv txoj hau kev, ces tsim nyog uas nov yog peb txoj hau kev thiab!”3
Txwj Laug Christofferson hais ntxiv hais tias: Nej ib txhia tsis tau txais txoj koob hmoov ntawm kev sib yuav vim nej muaj mob, tsis muaj neeg uas nej yuav tau, nej yog txiv neej uas nyiam txiv neej, los yog nej txoj kev ntshai kov yeej nej txoj kev ntseeg tam sim no. … Los yog tej zaum nej twb sib yuav, tiam sis sib nrauj lawm. … Nej ib txhia uas sib yuav lawm muaj tsis taus me nyuam. …
“Txawm li ntawd los, … txhua tus pab tau kom muaj raws li Vajtswv txoj hau kev hauv txhua tiam neeg.”4
Vaj Lug Kub Ntxiv
Chiv Keeb 2:18–24; 1 Kauleethaus 11:11; Lus Qhuab Qhia thiab Kev Khi Lus 49:15–17
Zaj Dab Neeg uas Muaj Sia
Tij Laug Larry M. Gibson, ib tug pab cuam hauv Koom Haum Tub Hluas pawg tuam thawj tswj hwm dau los, nco txog thaum Shirley, uas yog nws tus poj niam tam sim no, hais tias:
“‘Kuv hlub koj vim kuv paub tias koj hlub tus Tswv tshaj koj hlub kuv.’ …
“Qhov uas nws teb li ntawd tshoov kuv lub siab. …
“… [Thiab] kuv yeej xav kom nws paub hais tias kuv hlub tus Tswv tshaj txhua tus.”5
Txwj Laug David A. Bednar, ntawm Pawg Kaum Ob tug Thwj Tim, qhia hais tias: “Ib khub niam txiv uas sib khi lus sib yuav yeej tsom ntsoov rau tus Tswv Yexus Khetos. … [Cia li xav tias] tus Cawm Seej nyob ntawm qhov siab tshaj plaws ntawm [ib daim duab] uas muaj peb sab, ib tug poj niam nyob ntawm ib ceg kaum thiab tus txiv neej nyob ntawm ib ceg kaum rau lub hauv paus. Cia li xav seb tus txiv neej thiab tus poj niam yuav sib raug zoo li cas thaum nkawd ob leeg ‘los cuag Khetos’ zuj zus thiab siv zog ‘ua kom zoo tshaj plaws nyob hauv Nws’ (Maulaunais 10:32). Vim dhau los ntawm tus Txhiv Dim, ib tug txiv neej thiab tus poj niam los nyob ze dua ntxiv.”6
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam ua lus Akiv: 6/15. Pub txhais ua lus Hmoob: 6/15. Kev txhais Visiting Teaching Message, February 2016. Hmong. 12862 295