Ako Nasayud Nga Akong Manunubos Buhi
Ang tagsulat nagpuyo sa Pilipinas.
Human kami biyai sa among mga ginikanan, kami nakakat-on nga si Jesukristo dili gayud mobiya.
Paghulagway pinaagi ni Brian Call; detilye gikan sa Kristo ug ang Adunahan nga Magmamando, ni Heinrich Hofmann
Sa dihang 14 pa ko, ang akong papa mibiya sa among pamilya, ug ang akong mama napugos sa paggawas sa nasud. Gibiyaan ko uban sa akong tulo ka manghud, si Ephraim, 9 anyos; Jonathan, 6; ug Grace, 3 (ang mga pangalan giusab). Walay butang nga nakapaandam namo niining kalit nga kausaban. Sa unang higayon, kami-kami na lang.
Ang mga paryente sa wala madugay mitanyag sa pagsagop namo, apan kon mopuyo mi uban kanila, magkabulag kami. Lisud kadto nga desisyon. Makasalikway ba kami sa maayong tumong nga pagtabang? Apan sa samang higayon, dili namo ikabaylo ang mga katuigan sa pagdula, pagkatawa, pag-amuma sa usag usa, ug pagtan-aw nga motubo ang usag usa?
Sa sinugdanan, ang akong mga igsoon ug ako mibalibad sa ilang tabang, naghunahuna nga ako makatrabaho aron sa pagsuporta namo ug kami magpabilin nga mag-uban. Apan nasayud mi nga dili kami makahatag sa gikinahanglan nga pag-amuma sa among kamanghuran nga babaye, ug busa, uban sa luha sa among mga mata, gihatag namo siya.
Sa misunod nga pipila ka bulan, nagtrabaho ko isip building painter aron makapalit og pagkaon alang sa akong mga igsoon ug kanako. Ang akong kinitaan dili igo sa pagbayad sa bayranan sa kuryente ug sa tubig, mao nga nagpuyo mi nga wala kini.
Bisan pa niini nga pagsulay ug sa pagpanglibak sa uban, ang among hugot nga pagtuo wala magduha-duha. Matag gabii, pundokon nako si Ephraim ug Jonathan libut sa usa ka lampara sa pagbasa sa Basahon ni Mormon. Akong putlan ang pabilo aron minus ang anuos, apan sa gihapon kinahanglan namong limpyohan ang among mga ilong nga miitom inig human namo og basa. Pero dili kini kabayran.
Ang pagbasa sa Basahon ni Mormon nakapaduol namo ngadto ni Kristo. Human kami mobasa, moluhod kami ug magpuli-puli sa pag-ampo. Nangayo mi og kahupayan sa among problema nga ingon og walay kasulbaran. Nahuman namo og basa ang basahon, ug ang among pagtuo ni Jesukristo mas milig-on.
Usa ka adlaw miuli ko gikan sa trabaho nga kapoy ug mihigda ko sa among ilawom sa double deck nga higdaanan. Paghangad nako, akong nakita ang usa ka papel nga gipapilit sa ilawom sa higdaanan nga ibabaw kanako. Kini nag-ingon: Ako Nasayud Nga Akong Manunubos Buhi Ang akong igsoon nga si Jonathan maoy nagbutang niini. Pagkasuod sa mga bata ngadto sa langit nga gani usa ka bata sa Primary mahimong instrumento sa pagpadala og mensahe gikan sa Dios aron sa paghupay sa usa ka gubot nga kasingkasing ug hunahuna!
Kini nga pagpamatuod nakapalig-on nako sa dihang ako nakaamgo nga ako dili gayud makahatag sa among panginahanglan ug kami kinahanglan nga mobiya sa among balay. Si Jonathan gikuha sa pamilya sa akong inahan aron mopuyo didto, apan si Ephraim ug ako mipili nga mopuyo sa among mga apohan tungod kay sila mga miyembro sa Simbahan. Sa ilang balay mobangon mi og sayo aron sa pagbuhat sa mga buluhaton sa dili pa moeskwela, dayon moatiman sa among lolo sa gabii. Makakapoy kaayo. Hinoon, ang Ginoo naghunahuna kanamo, ug kami pirme moadto sa Simbahan.
Matag higayon gibati nako nga kaundangon na, ako napahinumduman sa espesyal nga mga higayon uban sa akong mga igsoon samtang kami nagbasa sa Basahon ni Mormon nga naglibut sa usa ka lampara. Ako nasayud nga si Kristo nag-uban namo niadtong malisud nga mga panahon. Gikan sa higayon nga ang mga sakop sa pamilya nagkatibulaag sa usag usa, Siya wala mobiya kanamo. “Ako nasayud nga akong Manunubos buhi!”
Karon, mga tuig ang milabay, mahinumduman gihapon nako ang mga pulong sa ibabaw sa akong higdaanan diha sa akong kasingkasing ug hunahuna. Kana nga mensahe nakatabang sa akong igsoon nga si Ephraim ug kanako sa among pagserbisyo isip full-time nga mga misyonaryo ug karon naningkamot nga magpuyo og celestial nga kaminyoon.
Daghang unta ang mawala sa akong kinabuhi kon nagduha-duha pa ko sa pagsalig ni Kristo. Bisan unsa pa kalisud ang kinabuhi, dili kaayo kini lisud alang sa Manluluwas, kinsa nag-antus sa Getsemani. Siya makapalugway sa kinabuhi sa tawo sa usa ka sentence. Nasayud siya sa tanan gikan sa sinugdanan hangtud sa katapusan. Ang Iyang kahupayan labaw nga gamhanan kay sa bisan unsang kasakit nga ikahatag niini nga kinabuhi. Pinaagi sa Iyang Pag-ula, walay permanente nga problema—kon dili kanunay nga paglaum , grasya, kalinaw ug gugma. Tuo kanako, ako nasayud! Ako nasayud nga ang akong Manunubos buhi.