Kajjitōk ko im Uwaak ko
“Rekajoor kōm̧m̧an kōjak kōn n̄a kōnke ij juon LDS. Iaar jeļā bwe ij aikuj jutak kōn ta eo ij tōmak ie, ak eļap an pen! Ewi wāween bwe in peran?”
Ejim̧we am̧ ba kwoj aikuj peran bwe kwon maron̄ jelm̧ae menin. Ālkin aolep men kein, Jisōs Kraist eaar kakien, “Kom̧in jerkak im erromaakļo̧k, bwe meram eo ami en juon jon̄ok n̄an laļ ko” (K&B 115:5). Ak ilo ad peran bwe en romaak ami meram emaron̄ ak emaron̄ jab meļeļein jum̧ae ro rej kajirere.
Ilo jekjek kein jim̧or, komaron̄ kōtļo̧k bwe jum̧ae ko ren im̧we eok n̄an em̧m̧anļo̧k eo. Ilo am̧ kōkajoorļo̧k naan in kam̧ool ko am̧, komaron̄ ejaake kain peran rot in eo me enaaj jipan̄ eok kōnono ak wōnm̧aanļo̧k wōt im kōm̧m̧ane ta eo ejim̧we, men̄e ro jet rej kajirere.
Kakūtōtō emaron̄ kōm̧m̧an illu, ak keememej bwe komaron̄ jar bwe kwon obrak kōn iakwe bwe ro jet ren en̄jake iakwe eo an Kraist ilo kwe (lale Moronai 7:48). Kōnke aolep jekjek ko rejeņoļo̧k, kappukōt tōl an Jetōb n̄an jeļā wāween uwaak ilo wāween eo an Kraist.
Pedped ioon jekjek eo, emaron̄ em̧m̧an ļo̧k kōnono ittino ippān ro jet me rej kajirere kōn kwe ak kōjekdoon ro rej kajirere ilo am wōnm̧aanļo̧k wōt im mour kōn tōmak eo am̧. Eļan̄n̄e ro jet rejjab itok limoier n̄an ron̄jake ta eo kwoj ba, am̧ waanjon̄ak kōn jouj, jeorļo̧k bōd, im m̧ool emaron̄ enaan eo em̧m̧an tata komaron̄ kwaļo̧k.
Kwaļo̧k Peran Em̧ool
Ro rej kajirere kake eok remaron̄ bōjrak kōnke koperan n̄an kabōjrak er ilo am̧ kwaļo̧k peran kōn wōn kwe—Rekwojarjar ilo Raan–ko Āliktata. Mokta jān am̧ jeļā, kwonaaj jeraam̧m̧an n̄e Jemedwōj Ilan̄ enaaj kile jerbal ko am̧, kōjatdikdik enaaj jipan̄ er kile gospel in ilo mour eo am̧.
Bright U., iiō 17, Imo State, Nigeria
Pukōt Kajoor ilo Men ko Repidodo
Jar im jitlo̧k raorōk kōnke renaaj jipan̄ eok jelm̧ae kōm̧m̧an kōjak ko im apan̄ ko ilo jikuuļ, āinwōt Jisōs Kraist ke eaar jelm̧ae elōn̄ kajirere ke Eaar pād ioon laļ in. Renaaj jipan̄ eok ejaak eļap iakwe im kijenmej n̄an armej.
Walter C., iiō 15, Jaén, Peru
Bōk Tōl jān Jar
Eto an baj n̄a wōt membōr ilo jikuuļ en aō. Armej ro m̧ōtta repaake eō āinwōt remeļeļe kōn n̄a, ak ro jet m̧ōtta ilo jikuuļ rej kajirere kōn n̄a. Juon raan iaar jar im en̄jake aō aikuj kōnono ippān juon eo eaar rōjan̄ ro jet bwe ren kajirere kōn n̄a. Iaar kōmeļeļeiki bwe ijjab illu ippān, ak iaar kajjitōk n̄e emaron̄ kautiej eō āinwōt an kōņaan bwe ro jet ren kautiej e. Ālkin an ron̄ ekōnono ko am̧ro, juon iaan rūkaki ro me aolep iien ej jutak ilikū ej lo bwe elōn̄ oktak. Ijeļā bwe Irooj enaaj pād ippami ilo ami kōnono ippān armej rein.
Shanela S., iiō 14, Pangasinan, Philippines
Ejaake Naan in Kam̧ool eo Am̧
Mokta, bōk juon kam̧ool kōn m̧ool ko kokōņaan kwaļo̧k n̄an ro jet. Innām iakwe ro rej kajirere im jab kajjieon̄ po ilo akwāāl, kōnke jum̧ae ejjab jān Anij (lale 3 Nipai 11:29). Men eo eaorōk tata, kajjieon̄ bwe Jetōb en pād ippāmi aolep iien. Jetōb enaaj jipan̄ eok bwe en ļapļo̧k iakwe im peran, im E enaaj kōm̧m̧an bwe naan ko am̧ ren kajoor.
Julia F., iiō 19, Hesse, Germany
Iakwe ro Rikōjdat Kom̧
Emōj aō kar bar pād ilo jekjek rot ņe. Eļan̄n̄e kwoj tōmak im kōttāik eok, kwonaaj jeraam̧m̧an kōn kajoor im tōmak eo kwoj aikuji bwe “kwom̧in yokwe ro ri kōjdate kom̧, im jar kōn ro rej matōrtōr kom” (Matu 5:44). Ij rōjan̄ eok n̄an lale jeje ko rekwojarjar n̄an bōk uwaake ko kōn wāween am̧ kajoor. Jar n̄e kwoj en̄jake am̧ ajimakeke ilo tōmak eo am̧. Rom 8:31 ej ba, “Innām ta jenaaj ba n̄an men kein? Eļan̄n̄e Anij ej pād ippād, wōn enaaj jum̧aeik kōj?” Anij ej pād ilo side eo am̧! Emaron̄ e aolep men.
Reagan T., iiō 15, Utah, USA
Jab Mijak
Kōnono kōn kabun̄ eo am emakijkij ak bōk lōn̄ tak ilo ekōnono ko. Iaar bar pād ilo ejja jekjek rot in wōt im iaar je, “Imōnōnō āinwōt juon LDS” ilo backpack eo aō. Ilo aō kōm̧m̧ane menin, iaar kōpooj eō n̄an jet jerbal in mijinede im kwaļo̧k n̄an armej bwe Ijjab mijak in kwaļo̧k n̄an er ke N̄a juon LDS. Jekdoon ta eo kwoj kōm̧m̧ane, jab kōtļo̧k bwe ren kabōņōņōik eok. Jar kōn er im kōn eok make. Ebaak tok kwonaaj lo bwe eļan̄n̄e kwoj lōmnak wōt n̄an lo̧mo̧o̧ren mour an armej, kobban lukkuun mijak n̄an kwaļo̧k n̄an er m̧ool eo kōn gospel in an Jemād Ilan̄.
Savanna P., iiō 14, Texas, USA