Ilbōk, Būromōj, im Karōk eo an Anij
Rijeje eo ej jokwe ilo Albania.
Ilo juon en̄jake ekalulu ilo mour e aō, iaar en̄jake bwe Jemedwōj Ilan̄ ekar pād ippa ilo aolepān iaļ ko aō.
Kōmeļeļe jān David Curtis
Juon jibbon̄ ilo 2008 ke jino ej karūj eō bwe in etal im jikuuļ. Iaar lukkuun mōņōņō jibbon̄on eo, ak iaar jab jeļā ke en kar oktak n̄an juon raan eo enana ilo mour eo aō ak iien eo aō āliktata ippān. Iaar jab kam̧ōj kilaaj ko aō raan eo kōnke juon mōttam ilo baam̧le eo am eaar bōk eō im ba bwe emōj an jino mane e make. Ekar 12 aō iiō.
Iaar ļōmņak, “Ewi wāween aō mour n̄e ejako jinō?” Ekar juon m̧ōtta eo em̧m̧an tata.
Iaar jan̄ iumin elōn̄ allōn̄ ko. Iaar jab kōņaan etal im jikuuļ kōnke eoktak an ajri ro jet kōm̧m̧an n̄an n̄a im rekabūromōj eō. Iaar jab jeļā ta eo in kar kōm̧m̧ane; Iaar jeļā wōt ke ij aikuj kajoor n̄an aolep.
Juon raan, ļalem ak jijino allōn̄ jān iien eo jinō eaar mej, iaar make iaaō ilo ruum̧ eo kijeen wōt wintō eo, ij jan̄, kajjieon̄ in meļeļe ta unin aō mour ilo laļ in. Lak ilbōk ij ron̄ juon ainikien: “Kwoj neju; Iban kōtļo̧k bwe kwon en̄taan.” Iaar jeļā ke Anij. Ak iaar būlōn̄ kōnke eaar jako aō tōmak ilo E, eļaptata ke ij ļōmņak bwe Anij eo eaar bōk mour eo an jinō. Men̄e iaar jab jeļā ta meļeļein, iaar en̄jake jokane.
Jilu iiō tokālik iaar rool n̄an Rome, Italy, n̄an loļo̧k eo unleppa. Elakar ba n̄an n̄a kōn kabun̄ eo me ej jar ie. Juon Jabōt, eaar bōk eō ippān. Ij kememej wōt ke ij tin jino epaakeļo̧k kōjem eo kein kajuon im iaar en̄jake iakwe eo an Jemedwōj Ilan̄ ke ij deļo̧n̄. Āinwōt n̄e ij pād ilo m̧weo imō.
Iaar jino aō jar aolep Jabōt im ilo aolep m̧akūtkūt ko kajjojo wiik. Imōņōņō n̄e ij pād ippān jodikdik ro an Kabun̄ in. Rekamōņōņōik eō. Rej ļōmņak im tōmak ilo juon wōt men me iaar tōmake. Innām, ālkin jilu allōn̄, iien kakkije eo aō ilo jōmar eaar jem̧ļo̧k im iaar aikuj rool n̄an Albania.
Ke ij rool n̄an m̧weo, iaar ba n̄an jema kōn en̄jake ko me iaar en̄jaki im aō kar mōņōņō aolep iien. Eaar jab kōņaan. Eaar ba n̄an n̄a eban kōtļo̧k aō etal n̄an m̧ōnjar eo ak ekkatak eļapļo̧k kake. Kōn menin iaar aikuj kijenmej n̄an bar jilu tok iiō m̧ae iien ejjejet 18 aō iiō. Innām iaar aikuj kōm̧m̧an aō kālet im peptaij.
Ilo tōre in eļap aō kar jeraam̧m̧an kōn elōn̄ armej ro me rej jiron̄ eō kōn ta ko raar ekkatak kajjojo Jabōt ilo m̧ōnjar eo. Juon iaan armej ro eaar Stephanie. Eto an pād ilo Italy ke unleppa eaar jino erom uwaan Kabun̄ in, ak eaar jepļaak n̄an m̧weo im̧ōn ilo Amedka. Eo unleppa enaaj lukkuun em̧m̧an n̄e jej jeje n̄an doon, kōn menin iaar likūti āinwōt juon m̧ōtta ilo Facebook.
Men̄e kōm ejjan̄in kar iioon doon, eļap aō kam̧olool e kōn an jipan̄ eō kalōk tōmak eo aō im ekkatak eļapļo̧k kōn gospel eo an Jisōs Kraist. Eaar jeje tok n̄an n̄a eaten aolep Jabōt im ba aolep men ko eaar ekkatak ilo Kabun̄ in innām uwaaki kajjitōk ko aō. Ekar juon m̧ōtta eo em̧m̧an.
Āliktata, ālkin elōn̄ iiō in aō kijenmej, iaar peptaij ruo raan ālkin an kar jejjet 18 aō iiō. Im eaar jab to iaar kwaļo̧k gospel eo n̄an jinō kōn m̧ōņōņō eo iaar en̄jake ilo raan eo, kōnke inaaj peptaij ilo etan. Ijeļā enaaj m̧ōņōņō kōn kālōt eo aō.
Ij en̄jake jeraam̧m̧ān jān Jemedwōj Ilan̄ kōnke Eaar pād ippa ilo mour eo aō ilo elōn̄ wāween ko. Iaar aikuj in kōttar im kijenmej wōt kōnke Eaar wōr an karōk n̄an eō. E eo eaar letok n̄an eō kajoor n̄an jelm̧ae apan̄ ko ij iooni. Eaar pād ippa aolep iien, jipan̄ bwe in m̧ōņōņō.