Elder Weatherford T. Clayton

General Authority Seventy

Si Elder Weatherford T. Clayton labihan ka mapasalamaton sa oportunidad nga makaserbisyo. Ang buluhaton sa Ginoo maoy iyang prayoridad. Gibati niya ang talagsaong gugma para sa mga tawo ug lig-ong higot sa iyang pamilya.

“Pinaagi sa ebanghelyo ni Jesukristo, tanan kami magkapundok sa panimalay,” miingon si Elder Clayton. “Ang akong pamilya mibati sa impluwensya niadtong mga mitaliwan na. Sila daw og anaa gayud sama sa mga tawo nga ania karon.”

Natawo sa California, USA, niadtong Marso 1, 1952, ngadto kang Whitney Clayton Jr. ug Elizabeth Touchstone Clayton, si Elder Clayton nakaangkon og lig-ong pagpamatuod sa iyang pagkabatan-on gumikan sa home teaching. Tungod sa mga paningkamot sa usa ka home teacher, siya, sa edad nga 12, ug ang iyang pamilya midawat sa sagradong mga pakigsaad sa ebanghelyo ug na-seal sa Salt Lake Temple niadtong 1964 ni kanhi-Elder Harold B. Lee sa Korum sa Napulog Duha ka mga Apostoles.

Sa paghunahuna mahitungod sa mga pamaagi sa pag-andam kaniya sa Ginoo alang sa pagserbisyo, miingon si Elder Clayton nga kasagaran siyang madasig sa mga ehemplo sa uban: “Gitan-aw nako kon giunsa sa akong mga higala ug pamilya sa pagpahinungod ang ilang kinabuhi sa Ginoo ug nakita ang ilang kalipay sa pagserbisyo nga ilang gihalad sa Dios.”

Human makaserbisyo sa French Canadian Mission, nag-enrol siya sa University of Utah, diin iyang nahimamat si Lisa Thomas. Naminyo sila niadtong Marso 16, 1976, sa Salt Lake Temple. Mga ginikanan sila sa lima ka anak.

Nakakuha si Elder Clayton og degree sa psychology ug nakakompleto sa medical school sa University of Utah. Nagtrabaho siya sa pribadong tambalanan isip usa ka obstetrician-gynecologist sugod 1985 hangtud 2013, sa wala pa ang iyang tawag nga moserbisyo isip presidente sa Canada Toronto Mission.

Nakaserbisyo siya isip ward mission leader, magtutudlo sa Doktrina sa Ebanghelyo, Young Men president, family history consultant, magtutudlo sa youth Sunday School, bishop, high councilor, counselor sa stake presidency, ug stake president.