Mesaj Premye Prezidans lan, Jen 2016

Papa nou, Gid nou

Prezidan Dieter F. Uchtdorf

Dezyèm Konseye nan Premye Prezidans lan

Èske nou pa janm ouvri yon bwat ki gen pyès yon bagay pou monte, nou rale enstriksyon pou fè montaj la epi nou panse, “Sa pa gen sans ditou“?

Pafwa, malgre pi bon entansyon nou ak konfyans nou genyen nan tèt nou, nou rale yon pati epi nou mande: “Poukisa sa a ye?” oubyen “Kijan sa a antre nan montaj la?”

Kontraryete nou ogmante lè nou gade nan bwat la epi nou wè yon avètisman ki di: “Ou dwe monte pyès yo ansanm—pou moun ki gen omwen uitan.” Paske nou poko janm gen yon ide sou fason nou pral fè sa a, fraz sa a pa ranfòse konfyans nou ni amoupwòp nou.

Pafwa nou fè menm kalite eksperyans la avèk levanjil la tou. Lè n ap gade kèk pati ladan l, nou gen dwa grate tèt nou epi mande poukisa pati sa a ye. Oubyen, lè nou egzamine yon lòt pati, nou gen dwa reyalize menm apre nou fin eseye pou n konprann nèt, nou jis pa ka detèmine poukisa yo te mete pati sa a ladan.

Pè Selès la se Gid nou

Erezman, Li ba nou bon jan enstriksyon pou konstwi lavi nou e vin pi bon moun ki posib. Enstriksyon sa yo mache kèlkeswa laj nou ak sitiyasyon nou. Li ba nou levanjil la ak Legliz Jezikri a. Li ba nou plan redanmsyon an, plan sali a, ki se plan bonè a. Li pa kite nou poukont nou nan mitan tout ensètitid oswa pwoblèm lavi yo, pou l jis di “Men yo. Bòn chans. Debwouye nou.”

Si nou sèlman gen pasyans epi nou gade avèk yon kè enb ak yon espri dispoze, n ap wè Bondye ba nou anpil zouti pou nou ka pi byen konprann pil enstriksyon Li ba nou yo pou nou ka jwenn bonè nan lavi a:

Li ba nou don enkonparab Sentespri a, ki gen potansyalite pou l se gid selès pèsonèl nou pandan n ap etidye pawòl Bondye a epi eseye mete panse nou ak aksyon nou an amoni avèk pawòl Li a.
Li ba nou aksè pou nou jwenn Li nenpòt lè, atravè priyè lafwa ak siplikasyon nan bon entansyon.
Li ba nou pwofèt ak apot modèn, ki revele pawòl Bondye a nan epòk nou an epi ki gen otorite pou liye oubyen sele sou tè a ak nan syèl la.
Li ba nou Legliz retabli L la—yon òganizasyon kwayan k ap travay ansanm pou youn ede lòt pandan y ap travay pou sali yo avèk krent, ak tranbleman ak lajwa san parèy.¹
Li ba nou ekriti sakre yo—pawòl Li ki ekri pou nou.
Li ba nou yon kantite zouti teknoloji modèn pou ede nou mache sou chemen disip la. N ap jwenn anpil nan enstriman ekstraòdinè sa yo nan LDS.org.

Poukisa Pè Selès la ba nou si tèlman èd konsa? Paske Li renmen nou. Epi paske, jan Li di apwopo tèt Li: “Gade, sa a se travay mwen ak laglwa mwen—pou m reyalize imòtalite ak lavi etènèl lòm.”²

Otremandi, Pè Selès la se Bondye nou, epi Bondye se yon gid pou nou.

Papa nou ki nan Syèl la konnen bezwen pitit li yo pi byen pase tout lòt moun. Travay li ak lagwa li se pou ede nou tout tan, pou ba nou bèl resous tanporèl ak espirityèl pou ede nou sou chemen pou retounen al jwenn Li an.

Chak Papa se yon Gid

Nan kèk pati nan mond lan, fanmi yo ak sosyete a onore papa yo nan mwa Jen. Sa toujou bon pou nou onore ak respekte paran nou yo. Papa yo fè anpil bon bagay pou fanmi yo epi yo gen anpil bèl kalite. De nan wòl ki pi enpòtan papa yo genyen nan lavi pitit yo se wòl pou yo sèvi kòm yon bon egzanp epi yon gid. Papa yo fè plis pase di pitit yo sa ki byen ak sa ki mal; yo fè plis pase lonje yon manyèl ba yo pou yo ka aprann sa k gen nan lavi a poukont pa yo.

Papa yo gide pitit presye yo epi, nan trase yon bon egzanp, yo montre yo fason pou yo mennen yon lavi onèt. Papa pa kite pitit yo poukont yo men yo kouri ba yo èd, pou ede yo kanpe sou pye yo kèlkeswa lè yo bite. Epi pafwa, lè yo santi yo enspire, papa yo kite pitit yo lite, paske yo reyalize se pi bon fason pou yo aprann.

Nou Tout se Gid

Pandan papa terès yo fè sa pou pwòp pitit pa yo a, lespri pou gide a se yon bagay nou bezwen ofri bay tout pitit Bondye yo, kèlkeswa laj, lye, oswa sikonstans yo. Sonje, pitit Bondye yo se frè ak sè nou; nou tout fè pati menm fanmi etènèl la.

Nan sans sa a, annou tout vin tounen gid—pare pou lonje lamen pou youn ede lòt vin pi bon moun nou kapab. Paske nou se pitit Bondye, nou gen kapasite pou nou vin menmjan avèk li. Renmen Bondye ak pwochen nou, respekte kòmandman Bondye yo, ak suiv egzanp Kris la, se chemen dwat ak etwat ki plen lajwa ki mennen retounen nan prezans paran selès nou yo.

Si Bondye Inivè a sousye tèlman pou nou pou L sèvi kòm yon gid pou nou, petèt nou menm tou nou ka lonje lamen bay pwochen nou yo, kèlkeswa koulè yo, ras yo, sitiyasyon sosyal ak ekonomik yo, lang yo, oswa relijyon yo. Annou vin tounen gid ki enspire k ap beni lavi lòt moun—pa sèlman lavi pwòp pitit pa nou yo men lavi tout pitit Bondye ki toupatou nan mond la tou.

© 2016 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè an: 6/15. Apwobasyon tradiksyon an: 6/15. Tradiksyon First Presidency Message, June 2016. Haitian Creole. 12866 036

Ansèyman nan Mesaj Sa a

Pou kòmanse ou gen dwa mande moun w ap anseye yo pou yo panse pandan yon ti moman sou yon lè kote Pè Selès la te gide yo. Apresa ou gen dwa mande yo pou yo panse sou resanblans ki genyen ant moman sa a ak yon moman kote yo te santi papa terès yo te gide yo. Envite yo pou yo ekri resanblans ki genyen nan fason yo te resevwa gidans yo. Ou gen dwa mande yo pou yo eseye mete bagay yo ekri yo an pratik, nan yon efò pou yo ka vin yon pi bon egzanp pou lòt moun.