Cov Hluas

Kev Ua Raws Li cov Lus Txib thiab Kev Hlub Lwm Tus

Thaum peb xav txog kev hlub, feem ntau peb xav txog kev saib movie txog kev sib hlub, cov khoom qab zib, thiab cov paj ua ntej. Tiam sis kev hlub—kev hlub tiag tiag—yeej tseem ceeb tshaj plaws thiab tsis qia dub npaum li ntawd. Yexus Khetos ua neej thiab tuag kom pab peb vim Nws hlub peb. Muaj tseeb tiag, ob lo lus txib tseem ceeb tshaj plaws yog hlub Vajtswv thiab hlub txhua tus (saib Mathais 22:36–40). Tiam sis peb yuav ua li cas qhia lwm tus tias peb hlub lawv?

Thawj Tswj Hwm Uchtdorf hais txog Yexus Khetos zaj lus piv txwv txog ob tug tub, ib tug uas ua hauj lwm rau nws leej txiv thiab ib tug uas tsis ua. Tus Cawm Seej qhia tias tus tub uas mloog nws leej txiv lus yeej hlub nws tiag tiag. Ib yam li ntawd, thaum peb mloog Vajtswv lus, peb qhia tias peb hlub Nws thiab xav rov qab mus cuag Nws.

Tiam sis peb yuav ua li cas qhia lwm tus hais tias peb hlub lawv? Thawj Tswj Hwm Uchtdorf piav hais tias: “Yog peb hlub peb cov neeg zej zog tiag tiag, ces peb yuav siv zog pab ‘tej neeg pluag thiab tej neeg xav tau kev pab, tej neeg mob thiab tej neeg raug txom nyem.’ Vim cov uas ua tej yam no los ntawm kev hlub tshua thiab kev xav pab lwm tus, cov ntawd yog Yexus Khetos cov pab coj.”

Yog li ntawd lwm zaus thaum koj pom koj niam, koj txiv, koj tus kwv tij nus muag, los sis ib tug phooj ywg, cia li xav seb yuav ua li cas pab lawv qhia tias koj xav li cas txog lawv. Koj ua li ntawd mas yuav ua rau koj thiab lawv zoo siab, tiam sis kuj yuav ua rau koj Leej Txiv Saum Ntuj Ceeb Tsheej zoo siab thiab.