Thawj Pawg Thawj Tswj Hwm tsab Xov, Cuaj Hli Ntuj 2016
Tom Qab Hlub, Ces Yuav Ua Dab Tsi?
Los ntawm Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Peb tus yaj saub uas peb hlub, Thawj Tswj Hwm Thomas S. Monson, tau qhia hais tias, “kev hlub yog lub hauv paus rau txoj moo zoo.”1
Kev hlub yeej tseem ceeb heev, Yexus thiaj hais tias yog “txoj lus txib thib ib thiab tseem ceeb tshaj” thiab hais tias yog lub hauv paus ntawm txhua txoj kev cai thiab cov yaj saub tej lus tag nrho.2
Kev hlub yog lub hauv paus rau txhua yam peb ua nyob hauv lub Koom Txoos. Txhua lub txheej xwm, txhua kev sib ntsib, txhua yam peb ua vim peb yog Yexus Khetos cov pab coj mas yuav tsum muaj txoj kev hlub ua xwb—vim yog tsis muaj kev siab hlub, “Khetos txoj kev hlub dawb paug,” peb tsis muaj nqi dab tsi.3
Thaum peb to taub qhov no kawg siab kawg ntsws, thaum peb tshaj tawm hais tias peb hlub Vajtswv thiab peb cov neeg zej zog—ces yuav ua dab tsi?
Qhov uas peb muaj kev khuav leej thiab kev hlub rau lwm tus puas txaus lawm? Puas yog peb ua raws li Vajtswv hais yog peb tshaj tawm hais tias peb hlub Vajtswv thiab peb cov neeg zej zog xwb?
Zaj Lus Piv Txwv txog Ob tug Tub
Nyob hauv lub tuam tsev hauv Yeluxalees, cov pov thawj thiab cov txwj laug ntawm cov neeg Yudais tuaj rau Yexus kom ntxias Nws hais lus tsis yog. Tiam sis, tus Cawm Seej tsis raug lawv ntxias thiab hais ib zaj dab neeg rau lawv.
Nws pib hais tias, “Muaj ib tug txiv neej muaj ob tug tub.” Leej txiv mus rau tus tub hlob thiab hais kom nws ua hauj lwm nyob hauv lub vaj txiv hmab. Tiam sis tus tub ntawd tsis kam. Yav tom ntej, tus tub ntawd hloov siab lees txim, thiab tau mus.
Leej txiv mus rau tus tub thib ob thiab hais kom nws ua hauj lwm nyob hauv lub vaj txiv hmab. Tus tub thib ob ntawd hais tias nws mam li mus, tiam sis nws yeej tsis tau mus.
Ces tus Cawm Seej hais rau cov pov thawj thiab cov txwj laug thiab nug hais tias, “Ob tug tub no, tus twg yog tus uas mloog leej txiv lus?”
Lawv yuav tsum lees hais tias yog tus tub hlob—tus uas hais tias nws yuav tsis mus tiam sis tom qab ntawd hloov siab lees txim thiab mus ua hauj lwm hauv lub vaj txiv hmab.4
Tus Cawm Seej siv zaj dab neeg no qhia txog ib lub ntsiab cai tseem ceeb—cov uas ua raws li cov lus txib yog cov uas hlub Vajtswv tiag tiag.
Tej zaum yog vim li no Yexus thiaj hais kom cov neeg mloog thiab ua raws li cov Neeg Falixais thiab cov uas qhia Vajtswv txoj kev cai tej lus tiam sis tsis txhob ua raws li lawv tus yam ntxwv.5 Cov xib hwb no tsis tau ua raws li lawv hais. Lawv nyiam hais lus txog kev teev ntuj, tiam sis lawv tsis to taub lub ntsiab.
Tej Yam Peb Ua thiab Peb txoj Kev Cawm Seej
Nyob hauv ib zaj lus kawg uas tus Cawm Seej hais rau Nws cov pab coj, Nws hais rau lawv txog Kev Txiav Txim kawg. Yuav muab cov phem thiab cov ncaj ncees sib nrug. Cov zoo yuav tau txoj sia nyob mus ib txhis; cov phem yuav raug txim mus ib txhis.
Ob pawg no sib txawv li cas?
Cov uas ua tej yam qhia tias lawv hlub lwm tus tau kev cawm seej. Cov uas tsis ua li ntawd raug txim.6 Yeej pom tau qhov uas peb hloov siab los ntseeg Yexus Khetos txoj moo zoo thiab kev cai thiab cov ntsiab cai tiag tiag los ntawm tej yam peb ua txhua hnub.
Thaum kawg, qhov uas peb qhia hais tias peb hlub Vajtswv thiab cov neeg zej zog yeej yuav tsis ua rau peb tsim nyog txais kev tsa nto. Vim ib yam li Yexus qhia hais tias, “tsis yog txhua tus uas hu kuv hais tias, tus Tswv, tus Tswv, ces yuav tau mus Ntuj Ceeb Tsheej, tiam sis tsuas yog cov uas ua raws li kuv Txiv tus uas nyob saum ntuj lub siab nyiam, thiaj tau mus xwb.”7
Tom Qab Kev Hlub Yuav Ua Dab Tsi?
Lo lus teb lus nug “Tom qab kev hlub, ces yuav ua dab tsi?” yeej yooj yim to taub. Yog peb hlub tus Cawm Seej tiag tiag, peb muab peb lub siab npuab Nws ces peb ua raws li Nws cov pab coj. Thaum peb hlub Vajtswv, peb yuav siv zog ua raws li Nws cov lus txib.8
Yog peb hlub peb cov neeg zej zog tiag tiag, ces peb yuav siv zog pab “tej neeg pluag thiab tej neeg xav tau kev pab, tej neeg mob thiab tej neeg raug txom nyem.”9 Vim cov uas ua tej yam no los ntawm kev hlub tshua thiab kev xav pab lwm tus,10 cov ntawd yog Yexus Khetos cov pab coj.
Nov yog qhov uas muaj tom qab txoj kev hlub.
Nov yog lub ntsiab ntawm Yexus Khetos txoj moo zoo.
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/16. Pub txhais ua lus Hmoob: 6/16. Kev txhais First Presidency Message, September 2016. Hmong. 12869 295
Qhia los ntawm tsab Xov No
Thawj Tswj Hwm Uchtdorf hais tias Yexus Khetos cov pab coj tiag tiag yog cov uas qhia tias lawv hlub Nws thiab hlub lwm tus dhau los ntawm tej yam lawv ua. Nws qhia hais tias, “yog peb hlub tus Cawm Seej tiag tiag, peb muab peb lub siab npuab Nws ces peb ua raws li Nws cov pab coj.” Cia li xav seb puas xav nug cov uas koj qhia tias txoj kev hlub ua rau lawv taug txoj kev ua ib tug pab coj li cas. Tej zaum koj qhia lawv txog ib yam ntawm koj lub neej ib yam thiab. Tej zaum koj yuav xav caw lawv thov Vajtswv kom muaj kev siab hlub thiab lub dag zog hlub lwm tus.