Cov Mus Saib Xyuas Tom Tsev tsab Xov, Cuaj Hli Ntuj 2016
Kev Ua Niam Tsev Txiv Tsev Yog lub Luag Hauj Lwm Dawb Ceev
Ua tib zoo thov Vajtswv kawm tej yam no thiab nrhiav kev tshoov siab seb koj yuav tsum qhia dab tsi. Qhov uas koj to taub “Tsev Neeg: Ib zaj Lus Tshaj Tawm rau lub Ntiaj Teb” yuav ua li cas kom koj txoj kev ntseeg Vajtswv loj zuj zus thiab foom koob hmoov rau cov uas koj mus saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Peb Leej Txiv Saum Ntuj Ceeb Tsheej txhim tsa tsev neeg kom pab qhia cov ntsiab cai zoo nyob hauv ib qho chaw uas muaj kev sib hlub. Thawj Tswj Hwm Thomas S. Monson hais tias: “Qhuas nej tus me nyuam thiab khawm nws; thiab hais tias, ‘Kuv hlub koj’ ntau dua; ua tib zoo ua tsaug rau nej cov me nyuam. Tsis txhob cia qhov teeb meem uas nej yuav kho rais los mus ua qhov tseem ceeb tshaj tus neeg uas yuav tsum hlub.”1
Susan W. Tanner, Koom Haum Ntxhais Hluas tus tuam thawj tswj hwm dhau los, qhia hais tias: “Peb Leej Txiv Saum Ntuj yeej ua yam ntxwv txog tej yam peb yuav tsum ua. Nws hlub peb, qhia peb, ua siab ntev rau peb, thiab tso siab rau peb pub kev ywj siab xaiv rau peb. … Tej lub sij hawm peb xav tias kev qhuab ntuas, uas txhais hais tias, ‘kev qhia,’ yog kev cem. Cov me nyuam—thiab txhua leej txhua tus tsis hais cov laus cov hluas los yog—yuav coj zoo dua los ntawm kev hlub thiab kev txhawb nqa tshaj los ntawm kev nrhiav txhaum.”2
Txwj Laug Quentin L. Cook ntawm Pawg Kaum Ob tug Thwj Tim hais tias, “Yog peb rau siab muaj tsev neeg kev thov Vajtswv, kawm vaj lug kub, tsev neeg hmo ua ke, cov koob hmoov pov thawj hwj, thiab kev hwm Hnub Caiv, peb cov me nyuam yuav paub tias, … yuav npaj muaj ib lub tsev saum ntuj ceeb tsheej, tsis hais lawv raug xwm txheej nyob hauv ib lub ntiaj teb nyuaj no.”3
Vaj Lug Kub Ntxiv
1 Nifais 8:37; 3 Nifais 22:13; Lus Qhuab Qhia thiab Kev Khi Lus 93:40; 121:41
Zaj Dab Neeg uas Muaj Sia
Txwj Laug Robert D. Hales los ntawm Pawg Kaum Ob tug Thwj Tim hais tias, “Ob peb xyoos tas los no kuv tab tom nyeem ntawv xov xwm thaum kuv ib tug xeeb ntxwv tau txav los ti ti kuv. Thaum kuv nyeem ntawv, kuv zoo siab hnov nws hais hais lus rau nws tus kheej. Ib pliag tom qab ntawd ua rau kuv xav tsis thoob thaum nws tshwm los nruab nrab ntawm kuv thiab ntawv xov xwm. Nws tuav kuv lub ntsej muag thiab nws muab nws lub qhov ntswg chwv kuv lub noog hais tias, ‘Yawg! Koj puas nyob?’
“… Qhov uas yus nyob ntawd txhais hais tias yus to taub peb cov tub hluas ntxhais hluas lub siab thiab yus nrog lawv sib raug zoo. Thiab kev sib raug zoo tsis yog kev sib tham nrog lawv xwb tiam sis yuav tsum ua tej yam nrog lawv thiab. …
Peb yuav tsum npaj thiab siv tej lub cib fim qhia lawv. …
“… Thaum kuv laus zuj zus ua rau kuv haj yam to taub hais tias tej yam uas lwm tus qhia rau kuv thaum kuv yog ib tug tub hluas, qhov tseem ceeb yog kuv niam txiv tej lus qhia, tau pab kuv lub neej kom kuv rais los ua tus neeg no.”4
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/16. Pub txhais ua lus Hmoob: 6/16. Kev txhais Visiting Teaching Message, September 2016. Hmong. 12869 295
Xav Txog Qhov No
Vim li cas txoj kev zoo tshaj plaws qhia txoj moo zoo yog los ntawm kev hais lus thiab coj yam ntxwv txog kev hlub?