Cov Hluas

Hluav Taws thiab tej Kev Kawm txog Kev Mloog Lus

Muaj ib zaug Thawj Tswj Hwm Thomas S. Monson qhia txog ib lub sij hawm thaum nws kawm txog qhov uas kev mloog lus tseem ceeb npaum li cas. Thaum nws muaj yim xyoo, nws tsev neeg mus xyuas lawv lub tsev nyob pem roob. Nws thiab nws tus phooj ywg xav luaj ib thaj teb kom rauv taws. Nkawd sim xuas tes rub cov nyom ntawd, kawd sib zog rub npaum li cas los, nkawd tsuas rub tau me ntsis nroj tsuag xwb. Thawj Tswj Hwm Monson piav tias, “Thaum ntawd kuv muaj yim xyoo xwb ces txawm tau ib qho tswv yim uas kuv xav tias yuav zoo. Kuv hais rau Danny tias, ‘Wb cia li muab cov nroj tsuag no hlawv lawm pauj. Wb mam li hlawv ib lub voj voog ntawm cov nroj tsuag!’”

Txawm nws paub tias nws tsis muaj cai siv cov khas khiv, nws khiav rov qab mus rau lub tsev pem roob kom tau, thiab Danny thiab nws tau rauv taws nyob hauv qhov chaw uas muaj nyom ntawd. Nkawd xav tias qhov hluav taws yuav cia li tuag mus xwb tiam sis nplaim hluav taws loj tuaj ntshe yuav raug xwm txheej. Nws thiab Danny khiav kom tau kev pab, thiab tsis ntev cov neeg laus khiav tuaj muab hluav taws tua ua ntej txog cov tsob ntoo.

Thawj Tswj Hwm Monson hais ntxiv, “Danny wb kawm tej yam tseem ceeb hnub ntawd—tej zaum qhov tseem ceeb tshaj yog qhov uas wb kawm tias yuav tsum mloog lus. Kev Mloog Lus Yuav Coj Koob Hmoov Los,” Liahona, Tsib Hlis Ntuj 2013, 89–90.

Ib yam li Thawj Tswj Hwm Monson, koj puas tau raug ib txoj kev nyuaj kom kawm tau txog kev mloog lus? Koj yuav cuab hom phiaj li cas kom koj thiaj li nyob nyab xeeb thaum koj mloog lus thaum yav tom ntej?