Thawj Pawg Thawj Tswj Hwm tsab Xov, Kaum Hli Ntuj 2016
Cov Koob Hmoov Los ntawm Kev Mloog Lus
Los ntawm Thawj Tswj Hwm Thomas S. Monson
Thawj Tswj Hwm Thomas S. Monson hais tias “Qhov tseem ceeb uas peb kawm tau nyob hauv lub ntiaj teb no yog qhov uas thaum Vajtswv hais lus thiab peb mloog lus, peb yeej ua qhov yog.”1
Peb kuj yuav tau koob hmoov. Raws li Thawj Tswj Hwm Monson hais nyob hauv ib lub tuam rooj sab laj: “Thaum peb ua raws li tej lus txib, peb lub neej yuav muaj kev zoo siab, kev vam meej, thiab yuav tsis muaj teeb meem ntau. Yuav yooj yim dua rau peb kov yeej peb tej teeb meem, thiab peb yuav tau txais Vajtswv cov koob hmoov uas Nws cog lus rau peb.”2
Nyob hauv tej lus uas Thawj Tswj Hwm Monson qhia thaum nws yog tus Thawj Tswj Hwm rau lub Koom Txoos, nws qhia kom peb nco ntsoov tias kev ua raws li cov lus txib yeej yog qhov uas ua rau peb muaj kev zoo siab thiab kev kaj siab lug.
Cov Lus Qhia rau Peb lub Neej
“Vajtswv tsis txib peb kom peb nyuaj siab los sis kom tab kaum peb txoj kev zoo siab. Yeej tsis yog li ntawd. Tus uas tsim peb thiab hlub peb paub zoo tias peb yuav tsum ua neej zoo li cas kom peb txais tau kev zoo siab ntau tshaj plaws. Yog peb ua raws li tej kev cai uas Nws tau muab rau peb, ces tej kev cai ntawd yuav pab peb muaj kev nyab xeeb mus kom dhau lub neej no. Peb nco txog tej lus los ntawm zaj nkauj qhuas Vajtswv uas peb txhua tus paub: ‘Mloog Vajtswv txoj lus! Ua li ntawd thiaj thaj yeeb; li ntawd thiaj nyab xeeb’ [saib “Mloog Vajtswv txoj Lus,” Cov Nkauj Qhuas Vajtswv, zaj 144].”3
Dag Zog thiab Kev Txawj Ntse
“Cov yaj saub ib txwm mloog lus; kev mloog lus tau pab lawv to taub thiab muaj dag zog hauv txhua lub caij. Tseem ceeb heev kom peb paub tias peb, los yeej txais tau lub dag zog thiab kev paub no. Niaj hnub no peb txhua tus txais tau qhov no thaum peb ua raws li Vajtswv cov lus txib. …
“Kev txawj ntse uas peb xav tau, cov lus teb uas peb xav txais, thiab lub dag zog uas peb xav tau niaj hnub nim no kom pab peb kov yeej tej teeb meem hauv lub ntiaj teb uas ib sij pauv no yuav yog peb li yog tias peb kam mloog lus thiab ua raws li tus Tswv cov lus txib.”4
Xaiv Kev Mloog Lus
“Feeb coob hauv lub caij nyoog no cia tib neeg ua tsis ncaj ncees. Nyob hauv phau xov xwm thiab TV mas cov neeg ua yeeb yam hauv movie thiab cov uas txawj ua ki las—cov uas cov tub hluas ntxhais hluas nyiam—lawv tso Vajtswv txoj kev cai tseg thiab khav tias lawv ua txhaum, zoo nkaus li lawv tsis raug dab tsi phem. Tsis txhob ntseeg li ntawd! Yeej yuav muaj ib lub sij hawm uas yuav raug txiav txim. Zoo li tus ntxhais Cinderella, yuav txog lub sij hawm 12 teev tsaus ntuj rau txhua tus neeg—yog tias tsis txog hauv lub neej no, ces yuav txog thaum lub neej tom ntej. Txhua tus yuav muaj ib Hnub Raug Txiav Txim. … Kuv thov kom nej yuav xaiv mloog lus.”5
Kev Xyiv Fab thiab Kev Kaj Siab Lug
“Tej thaum nej yuav ntsia lwm tus neeg hauv ntiaj teb no thiab yuav xav tias lawv muaj kev lom zem dua nej. Nej ib txhia yuav xav tias txoj kev cai coj hauv lub Koom Txoos tsuas tswj nej xwb. Tiam sis, kuv cov kwv tij thiab cov muam, kuv tshaj tawm rau nej tias tsis muaj ib yam dab tsi uas coj tau kev zoo siab los rau hauv peb lub neej los sis kev thaj yeeb nyab xeeb ntau npaum li tus Ntsuj Plig uas peb txais thaum peb raws tus Cawm Seej qab thiab ceev cov lus txib.”6
Ua Kev Ncaj Nceeg
“Kuv ua tim khawv rau nej tias cov koob hmoov uas tau cog lus rau peb lawm los ntau suav tsis txheeb. Txawm muaj huab tsaus nti roos peb, txawm ntuj los nag nplawm peb los, qhov uas peb paub txog txoj moo zoo thiab peb Leej Txiv Saum Ntuj Ceeb Tsheej thiab tus Cawm Seej txoj kev hlub yuav nplij peb lub siab thiab txhawb nqa peb thiab ua rau peb zoo siab thaum peb taug kev ncaj ncees thiab ua raws li cov lus txib. Tsis muaj dab tsi nyob hauv lub ntiaj teb uas kov yeej taus peb.”7
Coj Raws Li tus Cawm Seej
“Tus Neeg uas muaj kev nyuaj siab, thiab paub txog kev tu siab no yog leej twg? Leej twg yog tus Vaj Ntxwv ntawm yeeb koob, ib tsoom tub rog tus Tswv? Nws yog peb tus Xib Hwb. Nws yog peb tus Cawm Seej. Nws yog Vajtswv Leej Tub. Nws yog Tus uas Muab Kev Cawm Dim rau peb Nws hu hais tias, ‘Cia li nrog kuv mus.’ Nws qhia hais tias, ‘Cia li mus ua ib yam li ntawd.’ Nws taij thov peb hais tias, “Ua raws li kuv cov lus txib.’
“Cia peb raws Nws qab. Cia peb yoog Nws tus yam ntxwv. Cia peb mloog Nws lus. Thaum ua li no, peb thiaj muab tau qhov khoom plig pub rau Nws uas yog ris Nws txiaj.”8
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/16. Pub txhais ua lus Hmoob: 6/16. Kev txhais First Presidency Message, October 2016. Hmong. 12870 295
Qhia los ntawm tsab Xov No
Thawj Tswj Hwm Monson qhia peb txog cov koob hmoov ntau uas peb txais tau thaum peb mloog lus, xws li kev muaj dag muaj zog, kev txawj ntse, kev xyiv fab, thiab kev kaj siab lug. Cia li xav seb puas xav nug cov uas koj qhia seb lawv tau koob hmoov li cas thaum lawv ua raws li cov lus txib. Tej zaum koj yuav xav hais kom lawv xav txog lawv cov koob hmoov ntxiv thiab muab lawv tej kev xav thiab tej yam uas muaj dhau los sau cia nyob rau hauv ib phau ntawv ceev xwm txheej. Tej zaum koj kuj yuav hais kom lawv mloog Vajtswv lus kom qhia tias lawv ris Nws txiaj rau lawv cov koob hmoov.