Cov Mus Saib Xyuas Tom Tsev tsab Xov, Kaum Hli Ntuj 2016

Peb Tsev Neeg Los ntawm Vajtswv Los

Ua tib zoo thov Vajtswv kawm tej yam no thiab nrhiav kev tshoov siab seb koj yuav tsum qhia dab tsi. Qhov uas koj to taub “Tsev Neeg: Ib zaj Lus Tshaj Tawm rau lub Ntiaj Teb” yuav ua li cas kom koj txoj kev ntseeg Vajtswv loj zuj zus thiab foom koob hmoov rau cov uas koj mus saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.

Kev Ntseeg, Tsev Neeg, Kev Pab

Carole M. Stephens, tus Pab Cuam thib Ib hauv Koom Haum Niam Tsev Pawg Tuam Thawj Tswj Hwm hais tias, “Nyob hauv tej lus ‘Peb Tsev Neeg Los ntawm Vajtswv Los’ … peb nco txog tej lus qhuab qhia dawb huv. Peb kawm hais tias peb tsev neeg los ntawm Vajtswv los thiab peb txhua tus yog Vajtswv tsev neeg. …

“… Leej Txiv txoj hau kev rau nws cov me nyuam yog ib txoj kev hlub. Yog ib txoj hau kev kom Nws cov me nyuam—Nws tsev neeg—koom ua ke nrog Nws nyob.”¹

Txwj Laug L. Tom Perry (1922–2015) ntawm Pawg Kaum Ob tug Thwj Tim hais tias: “Peb kuj ntseeg hais tias tej tsev neeg raws li tus qauv qub tsis yog lub hauv paus pawg neeg hauv ib lub xam khoo khov kho—tiam sis tej tsev neeg kuj yog lub hauv paus ntawm Vajtswv lub nceeg vaj thiab tseem fwv nyob mus ib txhis li.

“Peb ntseeg hais tias lub ntuj ceeb tsheej tej kev coj ua thiab tej tseem fwv yuav tsom ntsoov tsev neeg thiab kwv tij neej tsa.”²

Bonnie L. Oscarson, Koom Haum Ntxhais Hluas tus Tuam Thawj Tswj Hwm hais tias, “Txhua tus muaj peev xwm tiv thaiv tus Tswv txoj hau kev nyob hauv zaj lus tshaj tawm txog tsev neeg, tsis hais lawv muaj tus txiv los tsis muaj los yog. Yog tias nov yog tus Tswv txoj hau kev, ces tsim nyog uas nov yog peb txoj hau kev thiab!”³

Vaj Lug Kub Ntxiv

Lus Qhuab Qhia thiab Kev Khi Lus 2:1–3; 132:19

Cov Lus Qhuab Qhia txog Tsev Neeg

Viv Ncaus Julie B. Beck, Koom Haum Niam Tsev tus Tuam Thawj Tswj Hwm yav tas los, qhia tias cov lus qhuab qhia txog tsev neeg yog los ntawm Kev Tsim, Kev Poob, thiab Yexus Khetos txoj Kev Theej Txhoj:

“Qhov uas tau Tsim lub ntiaj teb ua rau tsev neeg muaj qhov chaw nyob. Vajtswv tau tsim ib tug txiv neej thiab ib tug poj niam uas yog ob sab tseem ceeb ntawm ib tsev neeg. Yog ib feem ntawm Leej Txiv Saum Ntuj Ceeb Tsheej txoj hau kev kom Adas thiab Evas ua kev sib khi thiab ua ib tsev neeg uas nyob mus ib txhis.

“… Txoj Kev Poob ua rau lawv muaj taus tub thiab ntxhais.

“[Yexus Khetos] txoj Kev Theej Txhoj qhib kev rau ib tsev neeg nyob ua ke mus ib txhis li. Nws txoj Kev Theej Txhoj qhib kev rau tsev neeg loj hlob mus ib txhis thiab ua neeg zoo tag nrho. Txoj hau kev zoo siab, uas kuj hu ua txoj kev cawm seej, yog ib txoj hau kev uas Vajtswv tau tsim rau tsev neeg. …

“… Nov yog Yexus Khetos txoj lus qhuab qhia. … Yog tsis muaj tsev neeg, tsis muaj ib txoj hau kev; vim ntshe tsis muaj dab tsi qhia seb vim li cas muaj lub neej hauv lub ntiaj teb no.”⁴

© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/16. Pub txhais ua lus Hmoob: 6/16. Kev txhais Visiting Teaching Message, October 2016. Hmong. 12870 295

Xav Txog Qhov No

Vim li cas tsev neeg yog pawg neeg tseem ceeb tshaj plaws hauv lub neej no thiab lub neej uas nyob mus ib txhis?