Cov Hluas

Kev Luag Nyav Pab Tau Lwm Tus

Thawj Tswj Hwm Uchtdorf hais txog ob lub hom phiaj uas yuav tsum coj peb txoj hau kev: hlub Vajtswv thiab hlub lwm tus. Tiam sis tej lub sij hawm yeej tsis yooj yim hlub lwm tus. Nyob hauv koj lub neej, tej lub sij hawm yuav nyuaj rau koj nrog lwm tus tham—tej zaum ib tug neeg ua rau koj nyuaj siab los yog nyuaj rau koj sib txuas lus los sis sib raug zoo nrog lwm tus. Thaum tej lub sij hawm zoo li no, cia li sim nco txog kev hlub uas los ntawm koj cov phooj ywg, tsev neeg, Leej Txiv Saum Ntuj Ceeb Tsheej, thiab Yexus Khetos. Cia li nco txog kev xyiv fab uas koj muaj thaum ntawd thiab sim xav seb txhua leej txhua tus puas muaj cib fim paub txog kev hlub li ntawd. Cia li nco txog qhov uas txhua leej txhua tus yog Vajtswv ib tug ntxhais los yog ib tug tub thiab tsim nyog txais Nws thiab koj txoj kev hlub.

Cia li xav txog ib tug neeg uas ua nyuaj rau koj sib raug zoo nrog nws. Thov Vajtswv txog nws thiab thov Leej Txiv Saum Ntuj Ceeb Tsheej kom qhib koj lub siab rau nws. Tsis ntev koj yuav saib nws zoo ib yam li Vajtswv saib nws: nws yog ib tug ntawm Nws cov me nyuam uas tsim nyog tau kev hlub.

Tom qab koj thov Vajtswv, cia li ua ib yam dab tsi zoo rau nws! Tej zaum caw nws mus rau cov Hluas Kev Sib Koom los yog ua si nrog koj cov phooj ywg. Qhia nws tias koj yuav pab nws kawm ntaub kawm ntawv. Los sis cia li hais “nyob zoo” thiab luag nyav rau nws. Tej yam me me yeej pab tau ntau heev … nyob hauv koj thiab nws lub neej!