Thawj Pawg Thawj Tswj Hwm tsab Xov, Ib Hlis Ntuj 2017
Tsom Ntsoov rau lub Hom Phiaj
Los ntawm Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Tsis ntev tas los kuv saib ib pawg neeg xyaum tua hneev nti. Thaum kuv saib lawv, ua rau kuv paub meej hais tias yog yus xav txawj tua hneev nti, yuav tsum siv sij hawm thiab xyaum ntau heev.
Kuv tsis xav tias yus yuav los ua ib tug tua hneev nti uas muaj koob meej yog yus tua hneev raug ib phab ntsa ces cia li kos voj voog ncig cov xib xub. Yus yuav tsum kawm kom txawj nrhiav lub hom phiaj thiab tua hneev raug lub nruab nrab lub hom phiaj.
Kos Voj Voog rau Hom Phiaj
Tej zaum peb xav tias kev tua hneev ua ntej thiab kos voj voog tom qab yeej txawv txav heev, tiam sis tej lub sij hawm peb coj yam ntxwv zoo li no nyob hauv peb lub neej.
Peb cov mej zeej hauv lub Koom Txoos, peb nyiam tsom ntsoov rau tej txheej xwm, teeb meem, thiab cov lus qhuab qhia ntawm txoj moo zoo uas peb xav tias ntxim kawm, peb saib tseem ceeb, los yog peb nyiam. Peb raug ntxias kom kos voj voog ncig tej no, ua rau peb ntseeg tias peb tsom ntsoov rau lub hom phiaj ntawm txoj moo zoo.
Yeej yooj yim rau peb ua li no.
Txij puag thaum ub los Vajtswv cov yaj saub tau qhuab qhia thiab muab kev tshoov siab zoo rau peb. Kuj muaj cov ntawv thiab tej phau ntawv hauv lub Koom Txoos uas qhia peb thiab piav meej txog tej yam rau peb. Yeej yooj yim rau peb xaiv ib lub ntsiab cai ntawm txoj moo zoo, cia li kos voj voog ncig qhov ntawd, thiab hais tias peb twb nrhiav tau lub hom phiaj ntawm txoj moo zoo.
Tus Cawm Seej Piav
Qhov no tsis yog ib qho teeb meem niaj hnub nim no xwb. Puag thaum ub, cov thawj coj rau kev teev ntuj tau siv sij hawm ntau tsis ntau sau txog, muab teeb sib raws, thiab sib cav txog ntau lo lus txib seb lo twg tseem ceeb tshaj plaws.
Muaj ib hnub ib pawg kws sau ntawv txog kev teev ntuj xav sib cav nrog tus Cawm Seej. Lawv nug Nws seb Nws yuav hais li cas txog ib qho teeb meem uas tsis muaj leej twg sib pom zoo.
Lawv nug Nws hais tias, “Xib Hwb, Vajtswv txoj Kev Cai nqe twg yog nqe uas tseem ceeb dua ntais huv tib si?”
Peb paub Yexus teb li cas hais tias: “Hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog.
“Nqe no thiaj yog lus txib uas tseem ceeb dua ntais.
“Thiab nqe ob uas tseem ceeb hais li no hais tias: Hlub koj tej kwv tij zej zog ib yam li koj hlub koj lub cev.
“Mauxes txoj Kev Cai thiab cov [yaj saub] tej lus qhia puav leej nyob tag nrho hauv ob nqe no.”1
Cia li nco ntsoov kab lus kawg no: “Mauxes txoj Kev Cai thiab cov [yaj saub] tej lus qhia puav leej nyob tag nrho hauv ob nqe no.”
Tus Cawm Seej tsis tau qhia peb txog lub hom phiaj xwb, tiam sis Nws kuj qhia txog qhov nruab nrab lub hom phiaj.
Raug lub Hom Phiaj
Peb cov mej zeej hauv lub Koom Txoos, peb khi lus tias peb yuav ris Yexus Khetos lub npe. Nyob hauv kev khi lus no peb to taub hais tias peb yuav siv zog kawm txog Vajtswv, hlub Nws, ntseeg Nws ntxiv, hwm Nws, coj raws li Nws, thiab sawv khov kho ua tim khawv txog Nws.
Peb yim kawm txog Vajtswv thiab paub tias Nws hlub peb, peb yim paub tias Yexus Khetos txoj kev theej txhoj yeej yog Vajtswv lub txiaj ntsim rau peb. Thiab Vajtswv txoj kev hlub tshoov peb lub siab kom peb xav hloov siab lees txim tiag tiag, uas ua rau peb txais tau kev zam txim. Tus txheej txheem no ua rau peb muaj kev hlub thiab kev khuv leej rau cov nyob ib puag ncig peb. Peb yuav txawj saib lwm tus txawv tib neeg hais txog lawv. Peb yuav tiv kev ntxias kom liam los yog txiav txim rau lwm tus vim lawv ua txhaum, ua yuam kev, koom nrog tswv yim txog tseem fwv, ntseeg ntuj, yog haiv neeg twg, los yog muaj daim tawv xim twg los xij.
Peb yuav saib txhua tus uas peb ntsib hais tias nws yog Leej Txiv Saum Ntuj Ceeb Tsheej ib tug me nyuam—peb tus kwv tij los yog nus muag.
Peb yuav to taub thiab hlub lwm tus—tsis hais cov uas ua tsis yooj yim rau peb hlub lawv. Peb yuav nyuaj siab nrog cov uas nyuaj siab thiab nplij cov uas xav tau txoj kev nplij siab.2
Thiab peb yuav paub tias peb tsis tas txhawj hais tias qhov twg yog lub hom phiaj ntawm txoj moo zoo.
Ob lo lus txib tseem ceeb no yog lub hom phiaj. Mauxes txoj kev cai thiab cov yaj saub puav leej nyob tag nrho hauv ob nqe no.3 Yog peb txaus siab ua li no, txhua yam zoo yuav los rau peb.
Yog peb tsom ntsoov, xav ntsoov, thiab siv zog ua kom hlub Vajtswv thiab muab siab hlub lwm tus, peb yuav paub tias peb twb tsom rau lub hom phiaj yog lawm thiab peb tsom rau nruab nrab lub hom phiaj—ces peb yuav los ua Yexus Khetos cov pab coj.
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/16. Pub txhais ua lus Hmoob: 6/16. Kev txhais First Presidency Message, January 2017. Hmong. 97921 295