Yut
Prea from Pis
Woman we i raetem hemia i stap long Arisona, YSA.
Mama mo papa blong mi oltaem, oli stap gat ol miting afta long jos, mo bae mi mi lukaotem ol trifala smol brata blong mi mo semtaem help blong mekem lanj—oltaem olgeta oli stap kros kwiktaem mo hanggre. Fulap taem sapos oli stat blong faet, mi mi save stretem problem blong olgeta kwiktaem. Be samtaem i had tumas blong mekem pis taem faet i stat finis from se, mi tu, bae mi stat blong kros.
Wan aftenun, ol brata blong mi oli raorao. Mi luk se ol traehad blong mi blong mekem pis i stap i jes mekem ol samting i go moa nogud moa from se mi tu mi harem nogud. Afta mi mekem lanj blong mi wan nomo afta mi no mo toktok long olgeta. Afta, mi talemaot, “Bae mi prea. ?Yumi save stap kwaet smol taem plis?” Taem oli no mo mekem noes, mi askem wan blesing long kaekae. Bifo mi klosem prea, mi ademap, “Mo plis helpem mifala blong stap olsem ol man blong mekem pis.”
Fastaem, i olsem se oli no harem mo oli stat blong faet bakegen. Mi no glad be i save se mi nid blong gat lav mo stap kwaet from mi jes prea from pis nomo. Afta wan sot taem, mi bin filim naesfala kwaet filing. Mi gohed kakae, nogat toktok, mo afta samtaem ol boe oli stop faet. Mi bin luksave pis we mi bin filim hem i ansa blong wan simpol prea. Mi bin prea blong stap olsem wan man blong mekem pis, mo Papa blong mi long Heven i bin helpem mi blong stap kwaet taem we mi wantem tumas blong saot bigwan. Mi save se Hem i save givim pis long yumi.