Te Rongorongo man te Moan Beretitentii, Maati 2017
Irianaki n te Raoiroi
Iroun Beretitenti Henry B. Eyring
Moan Kauntira n te Moan Beretitentii
Ana burabeti te Atua iaon te aba, Beretitenti Thomas S. Monson, e kabwarabwara, “N te bong aei, ti maeka ni kaitara mwaitin kakaokoron te bure, iowawa, ao te buakaka ake a bootaki n tetaina imatara.”1
Ko na mimii n reiakinna bwa e taekin taeka akanne Beretitenti Monson 50 te ririki n nako? Ngkana ti maeka ni kaitaraaki ma ana kairoro te buakaka are n te tai anne a korakora riki nakon ae n tetaina, a na mwaitira riki ana mwakuri te buakaka are e na kakamaakuira ngkai? Ni bukina ae raoiroi, e katanoata te Uea ni kaineti ma ara bong bwa e a ikotaki ara kairiribai (taraa D&C 38:12).
Te buaka “are ti kaainna”2 e moanaki imwaain are ti buangiaki nakon te aonaaba. E moanaki naba imwaain karikan te aonaaba. E moanaki ngaa n ririki n nako n te maiu are imwaain aei, ike Tatan e kaitara ao n ukoukora uruakan inaomataia aomata (taraa Moses 4:3).
E konaaki Tatan n te buaka ao “e teweaki nako aon te aonaaba” (Te Kaotioti 12:9), ike e reitanako ana buaka n te bong aei. Ikai n te aonaaba e karaoa te buaka ma ana aomata te Atua aika itiaki, ao ni katobibiia (taraa D&C 76:29) ma te kewe, kamwamwane, ao kariiri.
E buaka ni kaitaraia burabeti ao abotoro. E buaka ni kaitaraa tuan te itiaki ao tabun te mare. E buaka ni kaitara te utu ao te tembora. E buaka ni kaitara te bwai ae raoiroi, ae tabu, ao n mimitong.
Ti na kanga ni buakana ara kairiribai? Ti na kanga ni buakana te buakaka are e na taraa ni konaa ara aonaaba? Tera otangara? Antai taan boutokaira?
Mwakan te Tiibu te Teei
E reirei te Burabe ti Iotebwa Timiti bwa Tatan iai mwaakana iaora tii ni kanrabakauna ngkana ti kariaia ni karekea mwaakana.3
N noorakin ara bong, Nibwaai “I a noora korakoran mwaakan Ana Tiibu te Teei te Atua, ae e ruo nako aoia aika a itiaki aika kain ana ekaretia te Tiibu te Teei, ma iaoia ana aomata inanon te berita ae tabu te Uea, ake a maenako nako aon te aonaaba; ao a irianaki n te raoiroi ma mwaakan te Atua ao te mimitong ae korakora” (1 Nibwaai 14:14); e kariaki ma katuruturuana).
Ti na kanga n irianira ma te raoiroi ao te mwaaka? Ti na kawakina te bong ae te Tabati n tabuia ao ni karinea te nakoanibonga. Ti karaoi ao ni kawakin berita aika tabu, ni mwakuria rongorongon ara utu, ao n nanako n te tembora. Ti reitinako n nanomatoa n rairi nanora ao ni butia te Uea ni “kamauira n raraan Kristo ni kabwara bure bwa ti aonga ni karekea kabwaran ara bure” (Motiaea 4:2 Ti tataro ao ni beku ao ni kakoaua ao ni kamwakura ara onimaki iroun Iesu Kristo.
Ti irianira naba n te raoiroi ao te mwaaka ngkana ti reitinako ni kawakina te bwai ae rangin ni kakaawaki inanora ao n ara iango ibukin kawakinaia ao kabonganakiia nakon taai aika ana roko, n aron are kawakinan bwaai tabeua aika kakaawaki aika ana karekea te maiu are akea tokina (taraa D&C 84:85). Ti tarai taeka aikanne bwa a kakawaki man kamatebwaiakan booki aika tabu ao aia taeka naake e a tia te Uea n rineia bwa Ana toro, ake a ana kabwarabwara Ana kantaninga, nanona, ao bwanaana (taraa D&C 68:4) n te maungatabu ni kabuta n te namwakaina are imwiina.
N ara buaka ni kaitara te buakaka, ti riai n ururingnga n taainako bwa ti karekea buokara mairouia aomata ikai n te maiu ae mamate ao i karawa. Taan boutokaira a raonaki ma te Atua te Tama ae Akea Tokina, te Uea Iesu Kristo, ao te Tamnei ae Raoroi.
Taan boutokaira n raonaki ma naake a aki kona n nooraki irouia angiia aomata ma tanganibuaka i karawa . “Tai maku,” Eritai e tuanga te ataeinimwaane ae mamaaku ngkai a kaitara te tanganibuaka ae buakaka, “ba a maiti riki aika mena i roura nakoia ake a mena i rouia” (taraa 2 Uea 6:15–16).
Ti aki riai ni maaku. E tangiriia Ana aomata te Atua. E na bon aki kakeaia ana aomata te Atua.
I ataia bwa te Atua, ni kaekaan au tataro, e a ti a ni kaekai au bubuti ni kamaiuai man te buakaka. I kakoaua bwa man aia ibuobuoki te Atua te Tama, te Tia Kamaiua te aonaaba, ao te Tamnei ae Raoiroi, ti kona ni kakoaua bwa ti na anganaki riki te mwaaka ae bon tau ni kaitarai nako ana kairoro te buakaka ake ti kaaitarai.
Au kantaninga bwa ti na irianaki n tainako n te raoiroi bwa ti aonga n namakina te aki nanokokoraki bwa n tokina ti na tokanikai.
© 2017 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/16. Kariaiakaki rairana: 6/16. Rairan te First Presidency Message, March 2017. Kiribati. 97923 859