Pweng sin Prestuhnsi Se Met, Mahs 2017
Nuklac ke Suwohswohs
Sel Prestuhn Henry B. Eyring
Mwet in Kahsruh Se Met ke Prestuhnsi Se Met
Mwet pahluh luhn God fin facluh, Prestuhn Thomas S. Monson, el fahkwack, “Mihsenge, kuht rauniyuckyak ke ma koluk, suhfal, ac tiac wo emet ma oakiyucki ye muhtahsr.”1
Yac kom ac lut in etwacack lah Prestuhn Monson el fahk kahs ingacn yac 50 somlah ah? Kuht fin ahkolah in lain ohiyacn ma koluk ke pacl sacn ma yohkwelihk, luhpan ma koluk ingacn ac ahkkolukye kuht fuhkah mihsenge? Ke srihpac wowo, Leum El fahkwack nuh ke fihl lasr uh lah mwet lokoalok uh tuhkweni (liye D&C 38:12).
Mweun se ma “kuht nohfohn wi uh”2 muhtwacwacack met likina kuht isuslac nuh facluh ah. Finne muhtwacwacack met likina facluh oreklac ah. Muhtwacwacack ke tausin yac somlah ke moul se met liki isuslac ah, ma Setuhn el tuh forlah ac suk in kuhnaoslah sukohsohk in sulaclah luhn mwet uh (liye Moses 4:3).
Kuhtangyucklac Setuhn ke mweun sac ac “sisila el nu faclu” (Fwackyuk 12:9), ma el kalweni mweun lal mihsenge. Inge fin facluh el oraclah mweun yurin mwet luhlahlfongi luhn God, ac raunweloslah (liye D&C 76:29) ke kikiacp, kuhtasrihk, ac mwe sruhf.
El mweun lain mwet pahluh ac mwet sap uh. El mweun lain masap ke tiac kosro ac muhtahliyacn pahyuck uh. El mweun lain sucu ac tempuhl. El mweun lain ma wo, muhtahl, ac sacohk uh.
Kuht ac lain fuhkah kain in mwet lokoalok se? Kuht ac lain fuhkah ma koluk ma sikyak in kuhtanglah facl se lasr uh? Meac mwe loang lasr uh? Suc wi kuht lac uh?
Kuh luhn Lahm
Mwet Pahluh Joseph Smith el luti lah oasr kuh lal Setuhn facsr muhkwena kena pacl kuht fuhlweacng nuh sel uh.3
“Ac tukun ma inge nga, Nephi, liye kuh luhn Lahm nuhtin God, puhtati nuh fin mwet luhlahlfongi ke alu luhn Lahm, ac nuh fin mwet wuhlweacng luhn Leum, suc fahsrelihk nuh fin facluh nohfohn; ac elos nuklac ke suwohswohs ac ke kuh luhn God ke wolacna yohk.” (1 Nephi 14:14; ahkuhtweyac wo ituckyang).
Kuht ac karihngihn kuhtyang sifacna ke suwohswohs ac kuh fuhkah? Kuht ac liyacacng lwen Sahpuht in muhtahl ac ahkfuhlwactye pristut. Kuht ac oraclah ac liyacacng olwelah muhtahl uh, orekma ke ma mahtuh luhn sucu lasr uh, ac wi nuh tempuhl. Kuht kampare kalwenina in auliyak ac ngihsre sin Leum in “orekmakihn srah in iwaclah luhn Kraist tuh kuht in eis nuhnak muhnahs ke ma koluk lasr” (Mosiah 4:2). Kuht pruhe ac kuhlwacnsap ac fahkwack ac ahkyohkye luhlahlfongi ke Jisus Kraist.
Kuht oacyacpac karihngihn kuht sifacna ke suwohswohs ac kuh ke kuht kalweni in sruokyacna insiyacsr kahs luhn moul (liye D&C 84:85). Kuht sruokyacna kahs ingacn ke alken in lutlutkihn ma suhmuhslah ac kahs luhn mwet ma Leum El sulaclah in mwet kuhlwacnsap Lal, suc fah akacsruhi kena, nuhnak, ac puhsra Lal (liye D&C 68:4) ke mahlwem in toeni luhlahp se fahsruh uh.
Ke mweun lasr lain ma koluk, kuht enenuh in esam pacl nuh kwewa lah oasr kahsruh lasr ke kwewana inge ac inkuhsrao. Mwet wi kuht lac uh pa God Pahpah Ma Pahtpaht, Leum Jisus Kraist, ac Nguhn Muhtahl.
Mwet wi kuht pac lac uh pa un armi koflah liyeyuck inkuhsrao uh. “Nimet sangeng,” Elisha el fahk nuh sin sie mukul fuhsr puhlaik ke elos tuh sun sie u in armi koluk, “pus mwet wi kut lukelos” (liye Luo Tokosra 6:15–16).
Kuht tiac enenuh in sahngweng. God El luhngse Mwet Luhlahlfongi Lal. El fah tiacna siskuhtlac.
Nga etuh lah God, ke topukyacn pruhe, El ahkfalyelah nguhsr luhk in eisyuclac liki ma koluk. Nga fahkwack luhlahlfongi lah ke kahsruh sin God Pahpah, Mwet Lahngo luhn facluh, ac Nguhn Muhtahl, kuht ac etuh lah ac fah utuckuh kuh yohk liki ma fal lasr in kutong oacna sie kuh koluk kuht sun uh.
Lwelah kuht in nuklac ke suwohswohs pacl nuh kwewa in muh oasr luhlahlfongi ke kuhtanglah yohk lasr uh.
© 2017 sel Intellectual Reserve, Inc. Kuh ac suwohs nuh kwewa ahkkweyeyucklac. Sihmlac fin acn USA. Ahkkweyeyucklac ke kahs English: 6/16. Ahkkweyeyucklac ke lweng: 6/16. Lwenglah luhn First Presidency Message, March 2017. Kosraean. 97923 868