Thawj Pawg Thawj Tswj Hwm tsab Xov, Plaub Hlis Ntuj 2017
Cov Neeg Ncaj Yuav Ua Neej Raws Li Kev Ntseeg
Tus Xib Hwb thiab tus uas Ua Xabnpus
Cov Neeg Yudais hais ib zaj dab neeg qub txog ib tug uas ua xabnpus uas tsis ntseeg Vajtswv. Muaj ib hnub thaum nws nrog ib tug xib hwb tham, nws hais tias, “Muaj ib yam uas kuv tsis to taub. Peb twb muaj kev teev ntuj tau txhiab txhiab xyoo. Tiam sis yus saib qhov twg los muaj kev phem, kev qias, kev tsis ncaj, kev tsis txim lij, kev mob, kev tshaib plab, thiab kev ua lim hiam. Zoo li kev teev ntuj tsis tau pab dab tsi hlo li. Yog li ntawd, kuv nug koj, kev teev ntuj zoo ua tus dab tsi?”
Tus xib hwb tsis tau teb ib me pliag tiam sis nrog tus uas ua xabnpus mus kev ntxiv. Ces nkawd los txog ib lub tshav ua si es nyob ntawd cov me nyuam ua si hauv cov av, ua rau lawv lo av tas.
Tus xib hwb hais tias, “Muaj ib yam uas kuv tsis to taub. Saib cov me nyuam ntawd. Peb twb muaj xabnpus tau txhiab txhiab xyoo, tiam sis cov me nyuam tseem lo av tas. Es xabnpus ua zoo tus dab tsi?”
Tus uas ua xabnpus teb hais tias, “Tiam sis, xib hwb, yeej tsis ncaj liam xabnpus rau cov me nyuam uas lo av no. Yus yuav tsum siv xabnpus kom muaj raws li lub hom phiaj ntawm xabnpus.”
Tus xib hwb luag thiab hais tias, “Yeej yog li ntawd.”
Peb Yuav Ua Neej Zoo Li Cas?
Tus Thwj Tim Povlauj, uas sau ib zaj lus los ntawm ib tug yaj saub hauv Phau Qub, qhia tias kev ua ib tug ntseeg txhais li cas thaum nws sau hais tias, “Cov neeg ncaj yuav ua neej raws li kev ntseeg” (Loos 1:17).
Tej zaum nyob hauv nqe lus no peb thiaj to taub tias ib txoj kev teev ntuj uas tsis muaj zog thiab pab tsis taus dab tsi yeej txawv ntawm ib txoj kev teev ntuj uas muaj hwj chim hloov yus lub neej.
Tiam sis yog peb yuav to taub hais tias kev ua neej raws li kev ntseeg txhais li cas, peb yuav tsum to taub hais tias kev ntseeg yog dab tsi.
Kev ntseeg tsis yog kev lam ntseeg ib yam dab tsi xwb. Kev ntseeg yog kev tso siab rau Vajtswv thiab kev ua hauj lwm.
Tsis yog yus lam tau lam xav xwb.
Tsis yog yus nyob twj ywm, ncaws hau, thiab hais tias peb pom zoo. Thaum peb hais tias “cov neeg ncaj yuav ua neej raws li kev ntseeg,” peb hais tias peb txoj kev ntseeg coj peb txoj hau kev. Peb ua tej yam uas tsis tawm tsam peb txoj kev ntseeg—tsis yog vim peb lam mloog lus xwb tiam sis yog vim peb muaj siab hlub peb tus Vajtswv tiag tiag thiab peb zoo siab rau laj lim tswv yim uas muaj nqi heev uas Nws tau muab tshwm sim rau Nws cov me nyuam.
Yuav tsum ua hauj lwm nrog kev ntseeg; tsis li ntawd ces yus txoj kev ntseeg tsis muaj zog (saib Yakaunpaus 2:17). Tsis yog kev ntseeg tiag tiag. Yus yuav tsis muaj hwj chim hloov ib tug neeg lub siab, yeej yuav tsis muaj kom hloov tag nrho lub neeg ntiaj teb lub siab.
Cov txiv neej thiab cov poj niam uas muaj kev ntseeg tso siab rau lawv Leej Txiv Saum Ntuj Ceeb Tsheej uas muaj siab hlub—txawm yog lawv tsis paub yav tom ntej yuav zoo li cas, tsis hais thaum lawv ua xyem xyav thiab raug kev nyuaj siab thaum lawv tsis pom los sis to taub meej.
Cov txiv neej thiab cov poj niam uas muaj kev ntseeg yeej taug kev ntawm kev ua thwj tim thiab xyaum ua raws li lawv tus Cawm Seej, Yexus Khetos, tus yam ntxwv. Kev ntseeg tshoov peb lub siab kom peb xav mus saum ntuj ceeb tsheej thiab siv zog ncav tes pab, txhawb nqa, thiab foom kobo hmoov rau peb cov neeg zej zog.
Kev teev ntuj uas yus tsis rau siab siv yeej yog xabnpus uas tseem nyob hauv lub npov. Xabnpus ntawd tej zaum pab tau yus heev, tiam sis tsis muaj hwj chim mus txog thaum yus siv kom muaj raws li lub hom phiaj. Yexus Khetos txoj moo zoo uas tau muab txum tim rov qab los yeej yog ib txoj moo zoo rau neeg ua hauj lwm. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg qhia tias kev teev ntuj yog ib txoj moo zoo ntawm kev cia siab, kev ntseeg, thiab kev siab hlub, tsis hais kev pab lwm tus ntawm sab ntsuj plig thiab sab cev nqaij daim tawv.
Ob peb lub hlis tas los, kuv thiab kuv tus poj niam Harriet nrog ib txhia ntawm wb cov me nyuam mus ua si nyob ze hiav txwv Mediterranean. Peb twb mus xyuas ob peb lub yeej thoj nam thiab ntsib ob peb tsev neeg uas los ntawm tej lub teb chaws uas tawg rog. Tej tsev neeg no tsis ntseeg li peb, tiam sis lawv yog peb cov kwv tij thiab cov muam thiab lawv xav tau kev pab heev. Ua rau peb txais kev tshoov siab thaum peb pom hais tias qhov uas peb lub Koom Txoos cov mej zeej muaj kev ntseeg pab cov neeg no txais kev pab, kev zoo siab, thiab kev cia siab, txawm yog lawv ntseeg li cas, yog haiv neeg twg, los yog tau kawm ntawv npaum li cas los.
Kev ntseeg nrog kev ua hauj lwm tas zog yeej ua rau yus lub siab dawb siab zoo, ua rau yus muaj laj lim tswv yim thiab kev txawj to taub, thiab kev kaj siab lug thiab kev hlub.
Peb txoj kev ntseeg yeej foom koob hmoov rau cov uas nyob ib puag ncig peb thiab peb tus kheej thiab pab lawv ua ncaj ncees.
Peb txoj kev ntseeg yeej pab tau neeg ntiaj teb muaj kev kaj siab lug thiab tau kev zoo.
Peb txoj kev ntseeg muab kev ntxub hloov ua kev hlub thiab muab cov yeeb ncuab hloov ua phooj ywg.
Cov ncaj ncees rau siab ua neej raws li lawv txoj kev ntseeg; lawv tso siab rau Vajtswv thiab taug Nws txoj kev.
Thiab kev ntseeg zoo li no yeej hloov tau tib neeg, tsev neeg, tej haiv neeg, thiab neeg ntiaj teb tag nrho.
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv: 6/16. Pub txhais ua lus Hmoob: 6/16. Kev txhais First Presidency Message, April 2017. Hmong. 97924 295