Cov Mus Saib Xyuas Tom Tsev tsab Xov, Plaub Hlis Ntuj 2017
Kev Lav Lus thiab Kev Khi Lus ntawm lub Pov Thawj Hwj
Ua tib zoo thov Vajtswv kawm tej yam no thiab nrhiav kev tshoov siab seb koj yuav tsum qhia dab tsi. Qhov uas Vajtswv cov ntxhais to taub lub hom phiaj ntawm lub Koom Haum Niam Tsev yuav npaj lawv li cas kom txais tau cov koob hmoov ntawm txoj sia nyob mus ib txhis?
Kev Ntseeg, Tsev Neeg, Kev Pab
Thaum peb uas yog cov viv ncaus to taub hais tias kev lav lus thiab kev khi lus ntawm lub pov thawj hwj yog hais rau peb tus kheej thiab, ces peb haj yam yuav muab siab npuab cov koob hmoov thiab tej kev cog lus ntawm lub pov thawj hwj.
Txwj Laug M. Russell Ballard ntawm Pawg Kaum Ob tug Thwj Tim hais tias, “Txhua tus uas tau khi tej lus dawb ceeb nrog tus Tswv, thiab cov uas hawm tej kev khi lus ntawd, yeej tsim nyog los txais tau kev tshwm sim rau nws tus kheej, tau koob hmoov uas yog kev pab ntawm cov tim tswv, nrog Vajtswv sib tham tau, txais qhov txhij txhua ntawm txoj moo zoo, thiab, thaum kawg, los txais txhua yam uas Leej Txiv muaj ua lawv tug nrog Yexus Khetos.”1
Cov koob hmoov thiab tej kev cog lus ntawm kev lav lus thiab kev khi lus ntawm lub pov thawj hwj los hais txog cov txiv neej thiab cov poj niam thiab. Viv Ncaus Sheri L. Dew, tus pab cuam dhau los nyob hauv Koom Haum Niam Tsev Pawg Tuam Thawj Tswj Hwm, hais tias, “Tsuas yog ib tug txiv neej thiab ib tug poj niam ua ke xwb yuav txais tau qhov txhij txhua ntawm lub pov thawj hwj nyob hauv cov kab ke siab tshaj plaws ntawm tus Tswv lub tsev.”2
Viv Ncaus Linda K. Burton, lub Koom Haum Niam Tsev tus Tuam Thawj Tswj Hwm hais li no hais tias, “Kuv caw nej cim ntsoov kev lav lus thiab kev khi lus ntawm lub pov thawj hwj, uas nyob hauv phauLus Qhuab Qhia thiab Kev Khi Lus 84:33–44. Yog nej ua li no, kuv cog lus tias tus Vaj Ntsuj Plig Dawb Huv yuav pab nej to taub zoo ntxiv txog lub pov thawj hwj thiab ua tej yam zoo kom tshoov nej lub siab thiab txhawb nqa nej.”3
Yauxej Xamiv tej lus qhia rau lub Koom Haum Niam Tsev tau pab npaj cov poj niam “txais tau cov koob hmoov thiab txiaj ntsim ntawm lub pov thawj hwj.” Yuav muaj li no dhau los ntawm cov kab ke hauv lub tuam tsev.
“Cov kab ke ntawm lub tuam tswv [yeej yog] cov kab pov thawj hwj, tiam sis cov kab ke no tsis muab tso txoj cai ntawm ib lub luag hauj lwm rau txiv neej los yog poj niam. [Cov kab ke no ua kom muaj raws li] tus Tswv tej lus cog tseg hais tias nws cov neeg—poj niam thiab txiv neej—yuav tau txais vaj txiaj ntsim hwj chim los saum ntuj los [saib Q&K 38:32].”4
Vaj Lug Kub thiab tej Ntaub Ntawv Xov Xwm Ntxiv
Lus Qhuab Qhia thiab Kev Khi Lus 84:19–40; 121:45–46; reliefsociety.lds.org
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv: 6/16. Pub txhais ua lus Hmoob: 6/16. Kev txhais Visiting Teaching Message, April 2017. Hmong. 97924 295