Elder Joni L. Koch

General Authority Seventy

Si Elder Joni Luiz Koch taga-Brazil nga ikaduhang henerasyon nga miyembro sa Simbahan. Ang iyang mga ginikanan, sila si Luiz ug Etelca Gascho Koch, nakabisita og lain-laing mga lokal nga simbahan sa sayong bahin sa ilang kaminyoon sa pagpangita og esprituhanong kamatuoran.

Pila ka oras pagkahuman sa iyang mama mihalad og kinasingkasing nga pag-ampo ug pagsaad nga mosunod sa Dios, nangabut ang mga misyonaryo sa pultahan sa balay sa iyang mga ginikanan. Wala kaabti og unom ka bulan, nabunyagan sila.

Natawo niadtong 1962, si Elder Koch nagtubo sa Joinville, Santa Catarina, Brazil. Ang impluwensya sa mga lider sa Simbahan, sama sa usa ka mapahinungurong magtutudlo sa Primary, bishop nga sama og amahan, ug lig-ong stake president, nakatabang sa iyang pasalig nga sundon ang ebanghelyo.

Human makakompleto og full-time nga misyon sa Brazil São Paulo North Mission, si Elder Koch nagtuon og statistics sa Brigham Young University sa Provo, Utah, USA. “Sa usa ka biyahe balik sa Brazil, mibisita ko sa ward sa usa nako ka higala, diin didto akong nahimamat ang akong umaabut nga asawa,” miingon si Elder Koch. “Miduol siya nako og nangutana kon minyo na ba ko.” Human sa walo ka bulan sa long-distance nga pagpangulitawo—ug sa tinud-anay nga 15 lang ka adlaw nga panagkuyog—nakigminyo siya ni Liliane Michele Ludwig niadtong Abril 26, 1988, sa São Paulo Brazil Temple. Duna silay tulo ka anak.

Human makagradwar sa BYU ug makaangkon og executive master‘s degree sa business administration, nagtrabaho si Elder Koch sa international logistics. Sa gidugayon nga 25 ka tuig, nagtrabaho siya sa lainlaing kompanya hangtud gitawag sa pagserbisyo og full-time alang sa Simbahan.

Si Elder Koch nakaserbisyo isip bishop, stake president, ug Area Seventy. Nagserbisyo siya isip presidente sa Mozambique Maputo Mission atol sa pagtawag kaniya nga General Authority Seventy.

“Ang akong pagpamatuod hinay-hinayng nalig-on pinaagi sa espirituhanong mga kasinatian nga akong nadawat pinaagi sa pagsunod sa ebanghelyo,” miingon si Elder Koch. “Ang Basahon ni Mormon mao ang usa sa importante kaayong mga elemento sa kalig-on sa akong pagpamatuod ni Ginoong Jesukristo, sa Iyang Simbahan, ug ni Propeta Joseph Smith.”