Rongorongo n Reirei ni Kakawari, Meei 2017
Mwaakan ana Boki Moomon
I bubuti ngkami ni kabane n tataro mwaaka ni kamatebwaia ao iangoa raoi ana Boki Moomon ni katoa bong.
Tariu ao mwaneu aika kam tangiraki, I butimwaai ngkami ngkai ti a manga ikotaki riki n ana maungatabu ni kabuta ana Ekaretia Iesu Kristo ibukiia aika Itiaki ni Boong aika Kaitira. Imwaain waakinan au marooro n te bong aei, I kan katanoatai nimaua tembora ake a na kateaki n taabo aikai: Brasilia Brazil; buburan Manila, aonon Philippines; Nairobi, Kenya; Pocatello, Idaho; ao Saratoga Springs, Utah, USA.
Te ingabong aei I taetae n taekan mwaakan ana Boki Moomon ao kainnanoan kakawakina are ti karekea ngaira kaain te Ekaretia ni kamatebwaia, n iangoia, ao ni kamwakura te reirei inanon maiura. Kakawakin kamatoan ao kakoauan raoi ana Boki Moomon e aki ti taetaekinaki.
Ti maeka inanon taai ni kaangaanga aika korakora ao buakaka. Tera ae kamanoira man te bure ao te buakaka ae tabangaki n te aonaaba? I teimatoa ni iai au koaua ae matoatoa iroun ara Tia Kamaiu, Iesu Kristo, ao Ana euangkerio ni buokiira ni kairiira nakon te kamanoaki. Ngkana ko aki wareka ana Boki Moomon ni katoa bong, taiaoka karaoia. Ngkana ko warekia ma te tataro mwaaka ni kan ata te koaua, te Tamnei ae Raoiroi e na kaota te koaua nakoim. Ngkana e koaua—ao I kaotia ma te koaua bwa—ngkanne Iotebwa Timiti bon ana burabeti are e noora te Atua te Tama ao Natina, Iesu Kristo.
Ibukina bwa e koaua Ana Boki Moomon, Ana Ekaretia Iesu Kristo ibukiia aika Itiaki ni Boong aika Kaitira bon ana Ekaretia te Uea iaon te aba, ao ana nakoanibonga te Atua ae mimitong e a tia ni kaokaki ibukin rakaia ao kakabwaiakiia Natina.
Ngkana akea am koaua ae matoa ni bwaai aikai, karaoa are e bon riai ni karaoaki. E riai bwa ko na karekea oin am koaua ni kaangaangan taai aikai, ibukin aia koaua tabeman ao e na uotikorake teutana. E ngae n anne, ngkana e reke, e kakawaki te koaua bwa e na kawakinaki raoi ao n reitinako n rinanon te ongotaeka nakon ana tua te Atua ao n rinanon te tataro ao warekan booki aika tabu ni katoa bong.
Raou ni beku n ana mwakuri te Uea aika kam tangiraki, I bubuti ngkami ni kabane n tataro mwaaka ni kamatebwaia ao n iangoa raoi ana Boki Moomon ni katoa bong. Ngkana ti karaoia, ti na ongo bwanaan te Tamnei, n totokoi kariiri, n tokanikai n te nanououa ao te maaku, ao ni karekei buoka mai i karawa inanon maiura. I kakoaua ma nanou ni kabane n aran Iesu Kristo, amen.
© 2017 iroun Interllectual Reserve, Inc. A bane n tauaki mwiin taian kariaia ibukin katootongana. Boretiaki n te USA. Kariaiakaki n te Ingiriti: 6/16. Kariaiakaki rairana: 6/16. Rairan te Visiting Teaching Message, May 2017. Kiribati. 97925 859