Cov Hluas
Ib tug Tub Txib uas Tsis Muaj daim Npe
Nyob hauv kuv lub tsev kawm ntawv kuv muaj ib tug xib hwb uas muaj tus xeeb ceem ua rau yus ntshai qhia tias yus xav txawv nws txog ib yam dab tsi. Muaj ib hnub peb sib tham txog cov tub txib ntxhais txib ntawm Haiv Neeg Ntseeg hauv Hnub Nyoog Kawg. Kuv paub tias kuv txawj teb nws tej lus nug, tiam sis kuv xav tias kuv yuav tsum tsis txhob teb. Yog li ntawd kuv hais me ntsis xwb kom nws txaus siab.
Tau ob peb lim tiam ua rau kuv xav txog wb txoj kev sib tham tas li xwb. Thaum kawg, ua rau kuv xav tias kuv yuav tsum muab ib Phau Ntawv Maumoos rau nws thiab kos cim rau ob peb zaj txog kev ua tub txib txoj hauj lwm. Qhov xav li no ua rau kuv ntshai heev, tiam sis kuv xav li no tsis tu tsis tseg. Kuv paub tias yog kev tshoov siab uas kuv yuav tsum mloog.
Ob lub hlis tom qab ntawd, kuv twb npaj Phau Ntawv Maumoos lawm. Tas ib hnub ua rau kuv xav tias phau ntawv no hnyav kawg nyob hauv kuv lub hnab ev khoom. Lub sij hawm ib me pliag xwb uas kuv muab phau ntawv no cev rau nws ua ntej peb yuav phav thaum lub caij no no yog lub sij hawm txaus ntshai tshaj plaws nyob hauv kuv lub neej.
Thawj hnub kuv rov qab los, kuv hla dhau nws hoob kawm tiam sis kuv ntshai mus haud. Kuv hnov nws hu kuv, ces nws muab ib daim ntawv pub rau kuv. Nyob hauv kis tsev kuv twb nyeem nws daim ntawv. Nws sau hais tias nws twb kawm “ntev zog” txog tej lus uas kuv muab cim tseg, thiab nws pib to taub vim li cas kuv ntseeg.
Ua rau kuv zoo siab xav qhia lwm tus txog txoj moo zoo, thiab tam sim no kuv zoo siab kawg xav pab ua hauj lwm rau kuv Leej Txiv Saum Ntuj Ceeb Tsheej ua ib tug tub txib.