Mwet Fuhsr
Sie Misineri ma wacngihn Twack la
Ke lutlut ac oasr sie mwet luti luhk suc kuht sahngweng se in sruhkwack nuhnak lasr fin oasr mwe sramsram ma kuht tiac insese nuh kac. Sie lwen ah kuht muhtwacwacack sramsramkihn misineri ke Alu se inge. Nga etuh lah nga kuh in tohpohklah kihsensiyuck lal, tuhsruhk nga puhla muh nga tiac kuh. Oruh nga fahk na kuhtuh ma in sang ahkwoyacl ke pacl sac.
Wik ekahsr tohkoh nga koflah tui ke nuhnkweyacn sramsram lasr ah. Sahflahiyac ah nuhnak se tume nuh sihk lah nga enenuh in sang sie Puk luhn Mormon ac mahkiyac kuhtuh pohloh kahs loac ma fahk ke orekma luhn misineri. Nga sahngweng ke nuhnak se inge, tuhsruhk koflah wacngihnlac. Nga etuh lah nga enenuh in ukwe puhla se inge.
Tukun mahlwem luo, nga ahkolah sie Puk luhn Mormon. Lwen na fohn se nga puhla muh puk sac ac esuhklah sie pat ah ke packpack luhk ah. Sackuhn tolu ma nga sang puk sac nuh sel ke nga som in oruh monglac luhk liki lutlut ac ke winter sac pa pacl se ma nga sahngweng emet in moul luhk uh.
Lwen emet in fohlohk ah nga fahsr ahluhkwelah rum lal ah tuhsruhk nga sahngweng in utyak. Na nga lohng el pahngonyuc, ac el use ipin pwepuh srihsrihk se nuh sihk. Nga riti ke nien forfor lun lohm ah. El suhmuhslah fahk lah el lutlut kac paht ke pohloh kahs ma nga mahkiyac ah ac el muhtwacwacack in liye kuhtuh srihpac yohk ke luhlahlfongi luhk uh.
Nga enganwack in akacsruhi ke wosasuc ingena, ac yohkwaclihk engan luhk in kuhlwacnsuhpuh Pahpah tuhmuhk Inkuhsrao ke sie misin ke pacl na sa.