Thawj Pawg Thawj Tswj Hwm tsab Xov, Rau Hli Ntuj 2017
Txais Kev Hu Ua Hauj Lwm
Thaum tus Yaj Saub Yauxej Xamiv hu Txwj Laug Heber C. Kimball (1801–68) mus “qhib lub qhov rooj ntawm kev cawm seej” mus ua tub txib nyob hauv Akiv Teb, ua rau Txwj Laug Kimball xav tias nws tsis tsim nyog.
Nws sau hais tias, “Au, tus Tswv, kuv yog ib tug tsis txawj hais lus, thiab yeej tsis tsim nyog ua tej hauj lwm no.”
Txawm li ntawd los, Txwj Laug Kimball mus ua raws li txoj kev hu no, es nws hais tias: “Tag nrho tej kev xav no tsis tau ua rau kuv tawm ntawm txoj kev ua kuv tej luag hauj lwm no; tib lub sij hawm uas kuv to taub kuv Leej Txiv Saum Ntuj Ceeb Tsheej lub siab xav, kuv txiav txim siab kuv yuav mus txawm raug teeb meem dab tsi los xij, ntseeg hais tias Nws yuav siv Nws lub hwj chim txhawb nqa kuv, thiab muab txhua yam txiaj ntsim uas kuv xav tau rau kuv.”1
Kuv cov kwv thiab cov muam uas Vajtswv tau hu los ua hauj lwm ua tub txib ntxhais txib, Vajtswv tau hu nej rau txoj hauj lwm no vim nej, ib yam li Txwj Laug Kimball, xav ua hauj lwm rau Vajtswv (Q&K 4:3) thiab vim nej twb npaj lawm thiab nej tsim nyog.
Nej tej khub niam txiv laus, Vajtswv hu nej ua txoj hauj lwm no vim rau qhov tej uas tau hais lawm thiab. Tsis yog nej xav ua hauj lwm pab xwb, tiam sis nej kuj muaj laj lim tswv yim uas nej txais tau los ntawm ntau xyoo ntawm kev txi, kev hlub, thiab kev kawm uas nej Leej Txiv Saum Ntuj Ceeb Tsheej siv tau kom tshoov tau Nws cov tub thiab cov ntxhais uas nrhiav qhov tseeb lub siab. Nyaj nej tau kawm hais tias peb yeej yuav tsis hlub tus Tswv tiag tiag ua ntej peb ua hauj lwm pab Nws los ntawm qhov uas peb pab lwm tus.
Rau nej txoj kev xav ua tub txib ntxhais txib, nej yuav ntxiv kev ntseeg thiab kev nyob ruaj khov kho, kev ua siab loj thiab kev ntseeg yus tus kheej, kev rau siab thiab kev nyiaj mus tom ntej, kev mob siab thiab kev fij siab. Cov tub txib ntxhais txib uas fij lawv tus kheej tseg yuav ua tej txuj ci tseem ceeb nyob hauv lawv qhov chaw tshaj tawm txoj moo zoo.
Thawj Tswj Hwm John Taylor (1808–87) hais txog tej uas cov tub txib ntxhais txib yuav tsum muaj li no hais tias: “Cov txiv neej [thiab cov poj niam thiab tej khub niam txiv] uas peb xav kom tshaj tawm txoj moo zoo rau tib neeg yog cov txiv neej uas muaj kev ntseeg Vajtswv; txiv neej uas ntseeg lawv txoj kev teev ntuj; txiv neej uas hwm lawv lub pov thawj hwj; txiv neej uas muaj … Vajtswv lub hwj chim puv npo.” … Peb xav muaj cov neeg uas muaj tus Vaj Ntsuj Plig Dawb Huv thiab Vajtswv lub hwj chim puv npo[,] … cov neeg uas ncaj ncees, tsim txiaj thiab dawb huv.”2
Tus Tswv tau hais tias:
Vim saib seb thaj teb twb dawb zoo mus sau qoob loo lawm; thiab xyuas seb, tus uas cev nws rab liag sib zog mus hlais, tus ntawd yuav tau coj los khaws cia rau hauv txhab xwv kom nws yuav tsis piam sij, tiam sis yuav coj tau kev cawm seej los rau nws tus ntsuj plig;
Thiab kev ntseeg, kev cia siab, kev siab hlub thiab kev hlub, nrog lub qhov muag uas ntsia ntsoov rau Vajtswv lub yeeb koob, ua rau nws tsim nyog ua txoj hauj lwm no (saib Q&K 4:4–5).
Vajtswv tau hu nej dhau los ntawm kev tshoov siab. Kuv ua tim khawv tias tus uas Vajtswv hu, Vajtswv pab ua kom tau. Nej yuav txais Vajtswv txoj kev pab thaum nej thov Vajtswv ua hauj lwm nyob hauv tus Tswv lub vaj txiv hmab.
Nej yuav txais raws li tej lus cog tseg zoo kawg uas tus Tswv hais rau cov tub txib nyob hauv lub caij nyoog kawg no, raws li sau rau hauv phau Lus Qhuab Qhia thiab Kev Khi Lus, hais tias, Nws yuav mus ua peb ntej. Nws yuav nyob ntawm peb sab xis thiab ntawm peb sab laug, thiab Nws tus Ntsuj Plig yuav nyob hauv peb lub siab, thiab Nws cov tim tswv saum ntuj yuav nyob ib ncig ntawm peb, kom thiaj txhawb nqa tau peb (Q&K 84:88).
Thaum nej ua hauj lwm pab lwm tus, nej yuav ntsib phooj ywg thiab nco ntsoov lub sij hawm ntawv mus ib txhis. Kuv tsis paub ib qhov chaw uas muaj kev zoo siab nplua mias npaum li qhov chaw tshaj tawm txoj moo zoo.
Nim no, xav hais lus rau cov txwj laug, cov muam, thiab tej khub niam txiv uas, txawm yog vim li cas los xij, tej zaum nyob tsis tau hauv qhov chaw tshaj tawm txoj moo zoo kom tas sij hawm: Tus Tswv hlub nej. Nws zoo siab rau nej txoj kev txi. Nws paub tias nej poob siab. Cia li paub hais tias Nws tseem muaj ib txoj hauj lwm rau nej ua. Tsis txhob cia Dab Ntxwg Nyoog hais tias tsis yog li ntawd. Tsis txhob poob siab; tsis txhob nyuaj siab; tsis txhob tu siab.
Ib yam li kuv tau hais nyob hauv lub tuam rooj sab laj tsis ntev tom qab tau hu kuv coj lub Koom Txoos hais tias: “Tsis txhob ntshai. Cia li zoo siab. Yuav muaj kev tshav ntuj thaum yav tom ntej ntau npaum li nej txoj kev ntseeg.”3 Kev cog lus no yeej muaj tseeb rau nej. Yog li ntawd tsis txhob cia nej txoj kev ntseeg ploj mus, vim tus Tswv yeej tsis tau poob siab txog nej. Cia li ua raws li nej tej kev khi lus thiab mus tom ntej.
Neeg ntiaj teb xav tau Yexus Khetos txoj moo zoo. Thov kom tus Tswv foom koob hmoov rau tag nrho Nws Haiv Neeg Ntseeg—txawm peb ua hauj lwm qhov twg los—kom lawv xav ua tub txib ntxhais txib.
© 2017 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv: 6/16. Pub txhais ua lus Hmoob: 6/16. Kev txhais First Presidency Message, June 2017. Hmong. 97926 295