Pweng sin Prestuhnsi Se Met, Jun 2017
Pahng nuh ke Orekma
Ke Mwet Pahluh Joseph Smith el pahnglol Elder Heber C. Kimball (1801–68) in “ikacslah sruhngucl nuh ke molwelah” in ekihn sie misineri nuh England, Elder Kimball el puhla na pwacye muh el tiac kuh in oraclah.
“O, Leum,” el suhmuhslah, “Nga sie mwet srwemsrwem lohoh, ac nga suhfal nuh ke kain in orekma ohinge.”
Ne ohinge, Elder Kimball el eis pahng se inge, ac fahk: “Mwe elyah inge tiac kolyuclac liki inkacnek in kunohkohn; pacl se na nga kahlwem ke kena luhn Pahpah tuhmuhk Inkuhsrao, nga puhla in kwacfweacng finne oasr ma upac, luhlahlfongi lah El ac kahsrweyuc ke kuh fuhlwact Lal, ac use nuh sihk mwe etwacack nuh kwewa suc ma nga enenuh.”1
Tamuhlwel ac tahmtahel fuhsr wiyuck suc ma pahng in kuhlwacnsap ke misin, kowos pahng nuh ke orekma se inge ke srihpen kowos, oacna Elder Kimball, oasr kena la in kuhlwacnsuhpuh God (liye D&C 4:3) ac mweyen kowos ahkolah ac fal.
Siyacnyacn mahtuh, kowos pahng pac nuh ke orekma se ke srihpac ingacn pacna. Tuhsruhk, kowos, tiac use muhkwena kena in kuhlwacnsap tuh oacyacpac lahlmwetmwet kowos eis ke pacl kowos sislah ke kihsac, luhngse, ac etwacack ma Pahpah Inkuhsrao el kuh in orekmakihn in moklweack insiyacn mukul ac muhtwacn suc suk ma pwacye uh. Wacngihn ahlohloh muh kowos etuh lah kuht tiac kuh in luhngse ke pwacye Leum nekena kuht kuhlwacnsap nuh Sel ke kuht kuhlwacnsuhpuh mwet sahyac uh.
Ke kena lowos in kuhlwacnsap ekihn misineri, ac kihluckyak luhlahlfongi ac fokoko, puhlaik ac luhlahlfongi kac sifacna, kuh in sulaclah wo ac sa in wolac, nuhnak kuh ac kihsac lowos. Misineri ma insacnweacng uh kuh in use ma usrnguck nuh ke acn elos orekma we.
President John Taylor (1808–87) el oracni ohiyac wo ke misineri ke ohiyac se inge: “Kain in mukul [ac muhtwacn ac siyacnyacn] ma kuht ke in mwet in us pweng ke wosasuc uh pa mwet ma oasr luhlahlfongi la ke God; mwet ma oasr luhlahlfongi la ke alu lalos; mukul ma ahkfuhlwactye pristut lalos; mwet suc ma … God el luhlahlfongi. … Kuht enenuh mwet ma sesseslah ke Nguhn Muhtahl ac kuh luhn God[,] … mwet ahkfuhlwactyeyuck, suwohs, oa ac nwacsnwacs.”2
Leum el fahkwack:
Tuh liye imac uh mahtuhlah ahkolah nuh ke kosracni; ac liye, ac el suc insacnweacng in oruh orekma, el fihliyac nuh ke pacl tok mwe tweng tuh elan tiac misac, tuh elan use molwelah nuh ke nguhnal.
Luhlahlfongi, finsrak, luhngse muhtahl, ac luhngse, siyac na wolacna luhn God, oraclah elos fal nuh ke orekma sacn (liye D&C 4:4–5).
Pahng lom uh tuhkuh ke kolyuck. Nga fahkwack lah ke God el pahngon mwet se in kuhlwacnsap, El ac ahkinsewowoyaclos tuh elos in kuh ahksahfyelah ma El siyuck selos in oruh. Kom ac eis kahsruh inkuhsrao ke kom pruhe orekma ke imac luhn Leum uh.
Olwelah kahto suc ma Leum el sang nuh sin misineri ke muhtwacwacackiyacn we se inge, ma oasr ke Doctrine and Covenants, ac fah ma lowos: El ac fah fahsr met liki kuht. El fah oasr ke lacpoh lacyot ac lacsac lowos, ac Nguhn Lal fah oan insiyacsr, ac lipufacn Lal fah raunikuhtlac, in sruhkkuhtyak (liye D&C 84:88).
Ke kom kuhlwacnsap kom ac oakiyac mwe ahkacsmakihn netok na kahsruhp in kawuck uh. Wacngihn acn in orekma ma yohk kosracni luhn engan we oacna acn in orekma luhn misineri uh.
Inge, in sramsram nuh sin elder, tahmtahel, ac siyacnyacn mahtuh suc, ke oacna sie srihpac, ma sahp tiac kuh in ahksahfyelah pacl in kunohkohn la ke misin: Leum el luhngse kom. El srui ke kihsackuhnlah lom. El etuh ke suhpwacrlac lom. Etuh lah srackna oasr orekma El ac usot kom in oruh. Nimet lwelah Setuhn elan fahk nuh sum siena. Nimet suhpwacrlac; nimet muhnahslah; nimet fuhlweack finsrak.
Pacl fototo somlah ah ke nga liye ke toeni luhlahp tukun nga pahng in kol Alu uh ah: “Nimet sahngweng. Kowos in Enganwack. Pacl fahsruh uh kahlwem oacna luhlahlfongi lowos an.”3 Olwelah se inge srack ahkpwacyeiyuck nuh suwos. Na nimet fuhlweack luhlahlfongi lom, mweyen Leum el soenna sislah luhlahlfongi lal in kom. Sruokyac na olwelah lom ac fahsr nuh met.
Facluh enenuh wosasuc luhn Jisus Kraist. Lwelah tuh Leum elan ahkinsewowoye Mwet Luhlahlfongi Lal nuh kwewa—lah kuht kuhlwacnsap oyac—kuht in kuhlwacnsap ke insiyacn misineri.
© 2017 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/16. Ahkkweyeyucklac ke lweng: 6/16. Lwenglah luhn First Presidency Message, June 2017. Kosraean. 97926 868