Pweng sin Prestuhnsi Se Met, Septempuh 2017
Mwet Pahluh in Kol Kuht
Yac ekahsr somlah ah, nga muhta lun infuckihl se ke Salt Lake Tempuhl suc ma Prestuhnsi Se Met ac U luhn Mwet Sap Singucul Luo in tuhkweni ohsun ke pacl se in wik se. Nga ngetwack nuh ke pihsinkac ah suc nget nuh yurun Prestuhnsi Se Met, ac insac nga liye petsac luhn kais sie Prestuhn ke Alu uh.
Ke nga ngetwang liyacltahl, nga liye kais sie muhtacwacack kacl Mwet Pahluh Joseph Smith (1805–44) ne kacl Prestuhn Gordon B. Hinckley (1910–2008)—nga nuhnkuh kac lah, “Fuhkah luhpan srui luhk ke kolyuck luhn kais sie.”
Pa inge mwet wo suc tiacna ahlohloh, tiacna puhtatlac, ac tiacna tahfonglac. Pa inge mwet luhn God. Ke nga nuhnkuh ke mwet pahluh mihsenge nga etuh ac luhngse, nga esamwack moul lalos, ohiyac lalos, ac ke mwe luti moklweyuck lalos.
Prestuhn Heber J. Grant (1856–1945) pa Prestuhn se ke Alu uh ke nga isuslac ah. Ke nga nuhnkuh ke moul ac luti lal, nga luhlahlfongi ke atac se Prestuhn Grant el kwacna ahkuhtweyac ah lah pa tuhtahflah—tuhtahflah ke ma ingacn suc ma wo ac fuhlwact.
Prestuhn George Albert Smith (1870–1951) pa Prestuhn ke Alu uh ke pacl se nga kuhlwacnsap ekihn pisap ke ward se fin acn Salt Lake City. El liyacack lah oasr ulul-sucl se orek inmahsrlon Leum ac lainyacl. “Fin kom tu ke lacyacn luhn Leum,” el luti, “kom fah oan ye kuh lal na ac wacngihn kena lom in oruh ma koluk.”1
Nga tuh pahngonyuck in kuhlwacnsap ekihn sie mempucr ke U luhn Mwet Sap ke 1963 sel Prestuhn David O. McKay (1873–1970). El luti ke sulaclah luhn kais sie nuh ke ohiyac el moulkihn ke moul lal. “Mwet Kristin Pwacye se,” el fahk, “pa luhngse ke orekma.”2
Prestuhn Joseph Fielding Smith (1876–1972), sie mwet sihm pihsrlac ke Alu uh, oasr sel in sie mwe luti in kolyuck yohk ke moul in lutlutkihn wosasuc uh lal. El tiac tui in riti ma suhmuhslah ac el oacna sie mwet nga etuh muh etuh ke luti ac mwe luti sacohk konweyuckyak lun sra puk inge.
Prestuhn Harold B. Lee (1899–1973) pa ekihn stek prestuhn luhk ke nga sie tuhlihk mukul fuhsr ah. Sie pohloh kahs pahiyacl pa “Tu ke yen muhtahl, ac tiac mukwilac.”3 El ahkkweye Mwet Luhlahlfongi in lohacng nuh ke, ac oruh top nuh ke, mahmah luhn Nguhn Muhtahl.
Nga luhlahlfongi muh mwe luti in kolyuck nuh ke moul lal Prestuhn Spencer W. Kimball (1895–1985) ac pa kihsackuhnwacng. El fallacna, suwohs in kihksackihnyuck nuh sin Leum. El oacyacpac kihsackihnyucklac in moulkihn wosasuc.
Ke Prestuhn Ezra Taft Benson (1899–1994) el ekihn Prestuhn ke Alu uh, el tuh pahngonyuc in kuhlwacnsap ekihn Mwet in Kahsruh Ahkluo se lal ke Prestuhnsi Se Met. Luhngse pa mwe luti in kolyuck se lal ah, suc pa aholyacn pohloh kahs se ma pahiyacl, fwack sin Leum: “Ohiyac fuhkah luhn mwet uh kowos enenuh in oacna? Pwacyena Nga fahk nuh suwos, finne in oacna Nga.”4
Prestuhn Howard W. Hunter (1907–95) pa mwet se suc kwacna suk ma wo emet ke mwet sahyac uh. El luhng kuhlwacng; el mongfihsracsr. Nga srui ma luhlahp in kuhlwacnsap ekihn Mwet in Kahsruh Ahkluo se lal.
Prestuhn Gordon B. Hinckley el luti kuht in kampare oruh srihke kuhiyacsr. El fahkwack kuhiyacn puhla yohk lal ke Mwet Lahngo ac misin Lal. El luti kuht ke luhngse. Kuhlwacnsap ekihn Mwet in Kahsruh Se Met lal oacna mwe kaksak ac mwe insewowo se nuh sihk.
Mwet Lahngo el suhpwacma mwet pahluh mweyen El luhngse kuht. Ke toeni luhlahp ke Ohktohpa se inge, ac fah sulpac oasr pacl wowo luhn General Authorities ke Alu uh in akacsruhi ke kahs Lal. Kuht sun kunohkohn se inge ke ohiyac yohk srihpac ac mongfihsrwacsr.
Fuhkah luhpan insewowo kuht puhlakihn tuh Alu fohlohkyak luhn Jisus Kraist oasr fin facluh ac tuh Alu uh muhsahyak fin yot in fwackyuck. Tuhtahflah luhn fwackyuck pa moul luhn wosasuc luhn Jisus Kraist.
Lwelah kuht in ahkolah in eis fwackyuck lasr sifacna ma tuhkuh yohk ke toeni luhlahp. Lelah insiyacsr in sesseslah ke sulwaclah yohk lasr ke kuht sralwack pahosr in ahkkweye mwet pahluh moul ac mwet sap uh. Lwelah kuht in kahlmwelihk, tohuyak, ahkwoyeyuck, ac ahkfokokoyeyuck ke kuht porongo sramsram lalos. Ac lwelah kuht in ahkolah in sifil eiskuhtyang sifacna nuh sin Leum Jisus Kraist—wosasuc Lal ac orekma Lal—ac in moulkihn ma ahksasucyeyucklac in liyacacng masap Lal ac tahfwelah ma luhngse Lal.
© 2017 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/17. Ahkkweyeyucklac ke lweng: 6/17. Lwenglah luhn First Presidency Message, September 2017. Kosraean. 97929 868