Pweng sin Prestuhnsi Se Met, Ohktohpa 2017
Eklac Mwet Tuhma Lutlut Pwacye
Sel Prestuhn Henry B. Eyring
Mwet in Kahsruh Se Met ke Prestuhnsi Se Met
Ke tuhkweni nuhkwewa ke kuhfa luhn Leum, oasr suwohs lasr in olwelah nuh sel Pahpah Inkuhsrao lah kuht ac esam Mwet Lahngo ac liyacacng masap Lal pacl nuhkwewa tuh kuht in kuh in eis Nguhn Lal in wi kuht (liye Moroni 4:3; 5:2; D&C 20;77, 79). Esamuhl uh ac tuhkuh nuh sesr pacl nuhkwewa ke ohiyac fal ke kuht eis Inel nuh fwacsr uh. Kuht oruh ohinge ke ohiyac pucspucs tuhsruhk yohk na ke kuht kuhlwacnsuhpuh mwet sahyac ke Inel, riti kahs muhtahl Lal, ac pruhe in etuh ma El kena kuht in oruh.
Sikyak nuh sihk ke pacl se nga tuh oruh pacptais luhn sie mukul fuhsr. Nga etuh lah nga tuh pahng sin mwet kuhlwacnsap akmuhsralah luhn Mwet Lahngo ekihn misineri se in luti wosasuc Lal ac in fahkwack Kacl ac ke Alu pwacye Lal. Companion ke misineri se luhk ah ac nga tuh olwelah nuh sin mukul fuhsr sac muh el ac fah nwacsnwacslah ke kuh luhn Iwaclah luhn Jisus Kraist ke el ac auliyak ke luhlahlfongi ke Mwet Lahngo uh ac tuh pacptaislac sin sie mwet kuhlwacnsap ma sruok kuh Lal.
Pacl se nga olwack mukul fuhsr sac liki kof in pacptais ke luhluh sac, el mahmah nuh insrwek, “Nga nwacsnwacslah, nga nwacsnwacslah.” Ke na pacl sacn, nga esamwack pacptais lal Mwet Lahngo ah sel John Pacptais ke Infacl Jordan ah. Finne yohk liki, nga esamwack lah nga tuh oruh orekma in molwelah luhn Mwet Lahngo sifilpac moulyak ac moul se—tuh kahsrweyuck sin Nguhn Muhtahl, oacna ke John el puhlakihn ac.
Nuh sihk ac nuh sin kais sie sesr, esam Mwet Lahngo uh kuh in yohk liki na in epacl nuh ke mwe acsmak ke etuh lasr ac ma kuht puhlakihn Sel uh. Kuht kuh in oruh sulaclah lwen nuhkwewa ma ac ahkfototoye kuht nuh Yohrohl ke pacl inge uh.
Sulaclah fihsrwacsr se emet uh kuh in pa in riti ma suhmuhslah uh. By doing so, we can gain the feelings of being close to Him. In oruh ohinge, kuht kuh in eis sie puhla muh kuht fototo nuh Sel. Nuh sihk, fototoyang uh wacna tuhkuh yohk na ke pacl nga rit ke Puk luhn Mormon uh. Ke mihnit se emet ma nga riti sapta ke 2 Nephi, ac nga lohng ke nuhnak luhk uh puhsra lal Nephi ac Lehi ahkuhtweyac ke Mwet Lahngo oacna elos in etuh Kacl sifacna. Sie puhla luhn fototo tuhkuh.
Nuh sum, kuhtuh acn ke ma suhmuhslah uh kuh in yohkna ulkomlac nuh Yohrohl. Tuhsruhk lah oyac ac lah pacl ngac kom riti kahs luhn God, ke puhsisacl ac nuhnak pwacye in esam Mwet Lahngo, kom ac ahkyohkye kena lom in eis Inel nuh fom ke moul lom lwen nuhkwewa uh.
Kena se ingacn ac ekuhllah ohiyacn kuhlwacnsap lom ke Alu luhn Leum uh. Kom ac pruhe nuh sin Pahpah Inkuhsrao ke kahsruh in ahkyohkye finne ma se kom liye muh kunohkohn na srihsrihk se uh. Kahsruh ma kom ac siyuck an pa kuh se ma in muhlkihnkomlac sifacna ac lohacng yohk nuh ke ma Mwet Lahngo El kena nuh selos ma kom pahng in kuhlwacnsuhpuh an.
Nga puhla Pahol ac apkuhran Lal ke kuhlwacnsap luhk yurin tuhlihk nahtuhsr ke nga pruhe in etuh lah ac kahsrweyuck elos in konwacack mislac fuhkah ma wosasuc uh muhkwena kuh in use uh. Ke kain pacl se, nga tena engankihn in liyeyuck muh sie pahpah oraclah wo, tuhsruhk nga nuhnkuh yohk ke oruh ac ohiyacn moul luhn tuhlihk nuhtihk uh.
Kena se in sang nuh selos suc kuht kuhlwacnsuhpuh uh ma ma Mwet Lahngo Elac kuh in sang nuh selos uh kol nuh ke pruhe suc pa nguhsr nuh sin Pahpah Inkuhsrao, ke pwacye ke inen Jisus Kraist. Ke kuht pruhe ke ohiyac sacn—ke inen Mwet Lahngo, ke luhlahlfongi Kacl—Pahpah El topuk. El suhpwacma Nguhn Muhtahl in kol, ahkwoye, ac kwacfe kuht. Ke srihpen Nguhn fahkwack pacl nuhkwewa mwe loh ke Mwet Lahngo (liye 3 Nephi 11:32, 36; 28:11; Ether 12:41, luhpan puhla lasr in luhngse Leum ke insiyacsr kwewa, nuhnkwacsr, ac kuhiyacsr yohkwelihk (liye Mark 12:30; Luke 10:27; D&C 59:5).
Mwe insewowo ke esam lwen nuhkwewa ac pacl inge uh ac tuhkuh kahkahsrihk ac fwel ke kuht Kuhlwacnsuhpwacl, mongo ke kahs Lal, ac pruhe ke luhlahlfongi ke Inel uh. Ac esam se inge ac taflwekuhtlac in eklac mwet tuhma lutlut pwacye luhn Leum Jisus Kraist ke tohkohsrahi Lal fin facluh se inge—ac tohkoh wi Pahpah Tuhmwacl ke facluh wolacna se tuhkuh uh.
© 2017 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/17. Ahkkweyeyucklac ke lweng: 6/17. Lwenglah luhn First Presidency Message, October 2017. Kosraean. 97930 868