Rurura’a ’āpo’ora’a nō te sābati mātāmua

I te sābati mātāmua o te ’āva’e tāta’itahi, i roto i te mau pupu peresibutero, te mau pupu tahu’a rahi ’e te Sōtaiete Tauturu e’ita te ha’api’ira’a ’e te hō’ē ’orometua e fa’atupuhia. Nō te mono i te reira, e fa’atupu te mau peresidenira’a ’e te feiā fa’atere pupu i te hō’ē rurura’a ’āpo’ora’a. E ’āpo’o ’āmui te pupu autahu’ara’a tāta’itahi ’aore rā te Sōtaiete Tauturu nō ni’a i te mau hōpoi’a, te mau rāve’a au ’e te mau tāmatara’a e ’itehia nei i reira; e ’apo rātou i te hi’ora’a ’e te mau ’ohipa i tupu nō terā ’e terā ta’ata ’e e fa’anaho rātou i te ’ohipa e rave mai te au i te mau mana’o i fāri’ihia mai nō ’ō mai i te Vārua.

« ’Ua parare te heheura’a i rotopū ia tātou ».¹

Elder Neil L. Andersen

Hou te rurura’a ’āpo’ora’a e ha’amatai

E hi’o te feiā fa’atere i te mau hōpoi’a, te mau rāve’a au ’e te mau tāmatara’a e ’itehia nei i reira ’e nā roto i te pure, e mā’iti rātou i te hō’ē tumu parau e paraparau.
E ’imi te mau ta’ata ato’a i te arata’ira’a a te Vārua.
E fa’aineine te mau ta’ata ato’a nō te fa’a’ite i tō rātou mana’o ’e te ’ohipa i tupu nō rātou.

E mau tuahine nō te Sōtaiete Tauturu e ruru ra

I roto i te rurura’a ’āpo’ora’a

E ani te mau feiā fa’atere i te mau melo ’ia fa’a’ite mai i te ’ohipa i tupu nō rātou i te ravera’a rātou i te mana’o i tae mai i te rurura’a i nō nā mua atu.
E ’āpo’o ’āmui rātou nō ni’a i te tumu parau, e fa’aro’o rātou i te tahi ’e te tahi ’e e ’imi rātou i te arata’ira’a a te Vārua.
E ha’apoto te mau feiā i te mau parau rahi ’e e ani rātou i te ta’ata ’ia rave.

Rurura’a ’āpo’ora’a a te autahu’ara’a Melehizedeka

I muri iho i te rurura’a ’āpo’ora’a

E ’ohipa te mau ta’ata ato’a mai te au i te mau mana’o vārua ’e te mau anira’a, ’ei pupu ’e ’ei ta’ata hō’ē.
E fa’aineine te mau ta’ata ato’a nō te fa’a’ite i te ’ohipa i tupu nō rātou i roto i te rurura’a nō muri mai.

E mau tuahine nō te Sōtaiete Tauturu e ’āpā ra ia rātou

« Tātou tōna nā rima ».²

Peresideni Dieter F. Uchtdorf

Te mau parau tumu nō te ’āpo’o-’āmui-ra’a

E ’ere te mau rurura’a ’āpo’ora’a i hō’ē ā hōho’a Vaiiho nā te Fatu e ha’api’i ia ’outou. Teie te tahi mau parau tumu nō te ha’amata :

Tē fā ’o te hō’ē rurura’a ’āpo’ora’a, ’o te ’āpo’o-’āmui-ra’a ïa nō ni’a i te mau hōpoi’a, te mau rāve’a au ’e te mau tāmatara’a e ’itehia nei i reira; e ’apo mai i te hi’ora’a ’e te mau ’ohipa i tupu nō terā ’e terā ta’ata ’e e fa’anaho i te ’ohipa e rave mai te au i te mau mana’o i fāri’ihia mai nō ’ō mai i te Vārua.
Tē tīa’ihia nei te ’ohipa i muri mai i te hō’ē rurura’a ’āpo’ora’a—e mau fa’anahora’a ’ohipa nō te ta’ata hō’ē ’e nō te pupu, tei fa’auruhia e te Vārua, nō te rave i te hō’ē mea i rāpae i te rurura’a ’ei fa’atupura’a i te ’ohipa a te Fatu (hi’o PH&PF 43:8–9).
E mea maita’i ’ia fa’a’ohipa te mau ’āpo’ora’a i te mau pāpa’ira’a mo’a ’e te mau parau a te mau peropheta ’e te mau ’āpōsetolo, a te mau hui mana fa’atere rahi ’e a te mau fa’atere rahi nō te arata’i ’e nō te tauturu i te tāu’ara’a parau. Mai te reira e ti’a ai i te mau parau fa’auru a te feiā fa’atere o te ’Ēkālesia e nehenehe ai e tauturu i te mau pupu autahu’ara’a ’e te Sōtaiete Tauturu ’ia pāhono i te mau hina’aro faufa’a rahi.
’Eiaha te paraparaura’a e haere i ni’a i te mau parau ’ōmo’e ’aore rā te mau parau fifi nō ni’a i te mau melo ’e te mau ’utuāfare.
Noa atu ā nā te hō’ē ti’a nō te peresidenira’a ’aore rā te pupu autahu’ara’a e fa’atere i te rurura’a ’āpo’ora’a, ’eiaha ’oia e rave pauroa i te paraparaura’a. E tu’u te ti’a fa’atere i te hō’ē tumu parau e paraparau ma te ani i te tā’āto’ara’a ’ia fa’a’ite mai i tōna mana’o ’e te ’ohipa i tupu nōna, mai tei arata’ihia e te Vārua.
’Eiaha iho ā ïa e fa’ahepohia te ta’ata ’ia paraparau mai, ’ia vai rā te mana’o au nō te fa’a’itera’a i tāna parau ’e tōna hi’ora’a ma te fa’ahapa ’ore.
Mai te peu e nehenehe, e pārahi ’ōmenemene, e nehenehe ïa e aupuru i te mana’o au nō te fa’a’ite i te mana’o ’e nō te paraparau.

Te tahi mau tumu parau nō te rurura’a ’āpo’ora’a nō te sābati mātāmua

Te mau tumu parau e paraparau i roto i te mau rurura’a ’āpo’ora’a, e nehenehe ïa e tae mai mai roto mai i te ’āpo’ora’a pāroita, te rurura’a peresidenira’a, te fa’anahora’a ārea, te mau mana’o i tae i roto i te feiā fa’atere ’a tāvini ai rātou i te mau melo ’e te mau mana’o nō ’ō mai i te Vārua Maita’i. Teie i raro nei te tahi noa mana’o tumu parau. ’Ua ’ite paha te mau feiā fa’atere i te tahi atu mau hina’aro tei fa’auruhia rātou e paraparau.

Nāhea e ti’a ai ia tātou ’ia fa’ata’a maita’i i te mau ’ohipa e rave mātāmua roa i roto i tā tātou ato’a mau hōpoi’a ’e’ē ?
Nāhea e ti’a ai ia tātou ’ia ha’afātata a’e i te Atua ’e ’ia fāri’i rahi atu ā i te arata’ira’a a te Vārua i roto i te orara’a ’e tō tātou ’utuāfare ?
Nāhea tātou i te fa’a’ite i te ’evanelia i tō tātou mau hoa ’e tō tātou ta’ata tupu ? (hi’o Alama 17).
Nāhea e ti’a ai ia tātou ’ia pāruru ia tātou iho ’e i tō tātou ’utuāfare i te mau rāve’a ha’apararera au ’ore ’e te hōho’a faufau ? (hi’o PH&PF 42:22–23).
E aha tā tātou e rave nō te tauturura’a i te a’o-au-ra’a ’e te ha’apūaira’a i tā tātou mau tamari’i ’e te feiā ’āpī i roto i tā tātou pāroita ?
Nāhea tātou i te fa’arahi i te hō’ēra’a i roto i te pupu autahu’ara’a ’aore rā i roto i te Sōtaiete Tauturu ? (hi’o Mosia 18:19–22).
Nāhea tātou i te tu’u rahi a’e ia tātou i roto i te ’ohipa ’ā’amu ’utuāfare ’e te ha’amorira’a i roto i te hiero ?
Nāhea tātou i te ani i te tauturu a te Fatu ’a ’imi ai tātou i te pāhonora’a i tā tātou mau uira’a ’e ’a ’imi ai tātou ’ia māramarama rahi a’e i te ’evanelia ?
Nāhea e ti’a ai i te mau metua ’ia riro ’ei fa’atere maita’i a’e i te fare ?
Nāhea e ti’a ai ia tātou ’ia ha’apūai i tō tātou ’itera’a pāpū nō te Fatu ’e nō tāna ’evanelia ’e ’ia tauturu i tō tātou ’utuāfare ’ia fa’arava’i iāna iho i te pae vārua ?
E aha te aura’a o te tāvinira’a ? E aha tā tātou e rave nei nō te tāvini i te ta’ata ’ati a’e ia tātou ? (hi’o 1 Petero 4:11).

Mai te peu e nehenehe, e fa’a’ite ’oi’oi te mau feiā fa’atere i te mau melo i te tumu parau, ’ia fa’aineine rātou nō te paraparaura’a.