E aha te ta’a-’ē-ra’a ?

I teie mau mahana hope’a nei, ’ua fa’aho’i mai te Atua i te autahu’ara’a ma te fa’anaho i te mau pupu autahu’ara’a ’e te Sōtaiete Tauturu nō te tauturura’a i te fa’atupu i tāna ’ohipa (hi’o Mose 1:39). Nō reira, ’ia putuputu tātou i te mau sābati tāta’itahi i roto i te mau rurura’a autahu’ara’a Melehizedeka ’e te mau rurura’a Sōtaiete Tauturu, tē putuputu nei ïa tātou nō te paraparau ’e nō te fa’anaho i te rāve’a tātou e fa’atupu i tāna ’ohipa. Te reira te tumu e tītauhia ai ’ia hau atu teie mau rurura’a i te ha’api’ira’a noa. ’Ua riro ato’a te reira ’ei taime tano nō te ’āpo’o nō ni’a i te ’ohipa fa’aorara’a ’e nō te ha’api’i ’āmui nō ni’a i te reira ’ohipa mai roto mai i te mau ha’api’ira’a a te feiā fa’atere o te ’Ēkālesia ’e nō te fa’anahonaho nō te fa’atupura’a i te reira. E riro teie mau tauira’a i roto i te mau rurura’a i te sābati i te tauturu i te fa’atupura’a i te reira mau ’ōpuara’a.

E tārena nō te ’āva’e

E pe’e te mau rurura’a autahu’ara’a Melehizedeka ’e te mau rurura’a Sōtaiete Tauturu i teie tārena tā’āva’e :

Hepetoma	Fā
Sābati mātāmua	’Āpo’o ’āmui nō ni’a i te mau hōpoi’a, te mau rāve’a au ’e te mau tāmatara’a e ’itehia nei ’e fa’anaho i te ’ohipa e rave.
Te piti ’e te toru o te sābati	Tuatāpapa i te mau a’ora’a o te ’āmuira’a rahi i tupu a’enei, tei mā’itihia e te peresidenira’a ’aore rā te feiā fa’atere pupu ’aore rā, i te tahi taime, nā te ’episekōpo ’e te peresideni ’āma’a.
Te maha o te sābati	Paraparau nō ni’a i te hō’ē tumu parau ta’a ’ē tei mā’itihia e te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo.
Te pae o te sābati	Tuatāpapa i te hō’ē tumu parau i mā’itihia e te ’episekōpora’a.

E hōho’a e pe’e nō tā tātou mau rurura’a

I roto i tā tātou mau rurura’a tāta’itahi a te autahu’ara’a Melehizedeka ’e a te Sōtaiete Tauturu, e pe’e tātou i te hō’ē hōho’a nō te fa’atupu i te ’ohipa a te Atua.

Fa’a’ite i te mau ’ohipa i tupu i muri mai i te mau mana’o vārua ’e te mau anira’a i fāri’ihia i te rurura’a autahu’ara’a ’e te rurura’a Sōtaiete Tauturu i te rurura’a nō nā mua atu (fa’aterehia e te hō’ē ti’a nō te peresidenira’a ’aore rā te hō’ē ti’a nō te pupu).
’Āpo’o ’āmui (te sābati mātāmua, fa’aterehia e te hō’ē melo nō te peresidenira’a ’aore rā te hō’ē melo nō te pupu) ’aore rā ha’api’i ’āmui (te piti, te toru ’e te maha o te sābati, fa’aterehia e te ’orometua).
Fa’anaho i te ’ohipa e rave ’ei pupu ’aore rā ’ei ta’ata hō’ē (fa’aterehia e te hō’ē melo nō te peresidenira’a ’aore rā te hō’ē melo nō te pupu).