Tē arata’i nei te Fatu i tāna ’Ēkālesia

Nā te peresideni Henry B.Eyring

Tauturu hō’ē i roto i te Peresidenira’a Mātāmua

E tītau te fa’aterera’a a te Fatu i tāna ’Ēkālesia i te fa’aro’o rahi ’e te aueue ’ore o te mau ta’ata ato’a e tāvini iāna i te fenua nei.

E au mau taea’e here e mau nei i te ’autahu’ara’a o te Atua, i teie pō tē hina’aro nei au e paraparau atu nō ni’a i te huru fa’ahiahia o te fa’aterera’a a te Fatu i tōna bāsileia i te fenua nei. ’Ua ite a’e na ’outou i te mau fa’anahora’a tumu. Tē pure nei au ē ’ia ha’apāpū mai te Vārua Maita’i i te reira ’ia ’outou.

A tahi, ’o Iesu Mesia te ūpo’o o te ’Ēkālesia i te fenua ato’a nei.

A piti, tē fa’atere nei ’oia i tāna ’Ēkālesia i teie mahana nā roto i te paraparaura’a i te mau tāne tei pi’ihia ’ei mau peropheta ’e te ravera’a i te reira nā roto i te heheura’a.

A toru, ’ua hōro’a ’oia i te hehēura’a i tōna mau peropheta i tahito ra, tē nā reira noa nei ā ’oia, ’e e tāmau ā ’oia i te nā reira.

A māha, tē hōro’a mai nei ’oia i te hehēura’a ha’apāpū i te feiā e tāvini nei i raro a’e i te fa’aterera’a a tōna mau peropheta.

Nā roto mai i teie mau fa’anahora’a tumu, tē ’ite nei tātou ē e tītau te fa’aterera’a a te Fatu i tāna ’Ēkālesia i te fa’aro’o rahi ’e te aueue ’ore o te mau ta’ata ato’a e tāvini iāna i te fenua nei.

’Ei hi’ora’a, tītauhia te fa’aro’o nō te ti’aturi ē, te hi’o mai nei te Fatu tei ti’afa’ahou i te mau terera’a ’ohipa ato’a o tōna bāsileia i te mau mahana ato’a. Tītauhia te fa’aro’o nō te ti’aturi ē, e pi’i ’oia i te mau ta’ata hapehape i roto i te mau ti’ara’a e ti’aturihia. Tītauhia te fa’aro’o nō te ti’aturi ē, ’ua ite pāpū ’oia i te mau ta’ata tāna e pi’i, tō rātou mau ’aravihi ’e tō rātou pūai, ’e nō reira, ’aita ’oia i hape i roto i tāna mau pi’ira’a.

E riro paha te tahi pae i roto i teie ’āmuira’a i te ho’ata ri’i ’e ’aore rā i te ta’iri’iri i te ūpo’o—te feiā e feruri nei ē, ’ua hape paha tō rātou pi’ira’ahia ’ia tāvini, e nā reira ato’a te feiā o te hi’o nei i te tahi mau ta’ata tā rātou i mātau mai te huru ē, ’aita i tano roa i ni’a i tō rātou ti’ara’a i roto i te bāsileia o te Fatu.Tē parau nei au i teie nā pupu ta’ata e piti ia fa’ataime ri’i i te reira huru ha’avāra’a e tae roa i te taime e ti’a ai ia ’outou ’ia ’ite maita’i a’e i te mea tā te Fatu e ’ite ra. Te ha’avāra’a te ti’a ia ’outou ’ia rave, maori rā, e ti’ara’a tō ’outou ’ia fāri’i i te hehēura’a ’e ’ia ’ohipa ma te mata’u ’ore i ni’a i te reira.

Tītauhia te fa’aro’o nō te rave i te reira. Tītauhia te fa’aro’o rahi a’e nō te ti’aturi ē, ’ua pi’i te Fatu i te mau tāvini ta’ata hapehape nō te arata’i ia ’outou. Tā’u ’ōpuara’a i teie pō o te patura’a ïa i tō ’outou fa’aro’o ē, te arata’i nei te Atua ia ’outou i roto i tā ’outou tāvinira’a iāna. ’E te mea faufa’a roa atu, tō’u ti’aturira’a o te patura’a ïa i tō ’outou fa’aro’o ē, tē fa’auru mai nei te Fatu i te mau ta’ata hapehape tāna i pi’i ’ei feiā fa’atere nō ’outou.

E mana’o paha ’outou nā mua ē, e ’ere taua huru fa’aro’o ra i te mea faufa’a nō te manuia o te ’Ēkālesia ’e te bāsileia o te Fatu Terā rā, e ’ite atu ’outou---noa atu te vāhi e ti’ahia ra e ’outou i roto i te fifi o te tāvinira’a ’autahu’ara’a, mai te peropheta o te Fatu e tae atu i te hō’ē taea’e ’āpī o te ’autahu’ara’a a Aarona—e mea faufa’a taua fa’aro’o ra.

E ha’amata ana’e nā ni’a i te aura’a o te fa’aro’o nō te hō’ē peresideni pupu nō te mau ha’api’i ’aore rā te mau diakono. E mea faufa’a nōna ’ia roa’a te fa’aro’o ē, nā te Fatu iho i pi’i iāna, mā te ’ite i te mau paruparu e te mau pūai ’o taua ha’api’i ra. Tītauhia iāna ’ia noa’a tōna fa’aro’o ē, te ta’ata i hōro’a mai i te pi’ira’a iāna ra, ’ua fāri’i ïa i te heheura’a nā roto i te Vārua ’o te Atua. Tītauhia i tōna nā tauturu ’e i te mau melo o tāna pupu ’ia fāri’i ato’a i taua fa’aro’o ra nō te pe’e iāna mā te ti’aturi taiā ’ore.

’Ua ’ite au i te reira huru ti’aturira’a ’a pārahi ai te hō’ē tamaiti i pīha’i iho i tōna peresidenira’a pupu diakono i te hō’ē po’ipo’i sābati. O ’oia tō rātou pāpa’i parau pi’i-’āpī-hia. ’Ua putuputu ’āmui teie peresidenira’a ’āpī. ’Ua paraparau rātou nō ni’a i te mau rāve’a e rave rahi e ti’a ai ia rātou ’ia rave i te anira’a a te ’episekōpo nō te fa’aho’i mai i te hō’ē tamaiti paruparu i te ’ēkālesia. I muri a’e i te pure ’e te ’āparaura’a, ’ua fa’aue rātou i te pāpa’i parau ’ia haere i te fare o te hō’ē tamaiti tei ’ore i haere a’e mai na i te hō’ē purera’a ’e ’ia ani manihini iāna.

’Aita te pāpa’i parau i mātau i te reira tamaiti, terā rā, ’ua ’ite ’oia ē, hō’ē o nā metua o te tamaiti e melo paruparu, ’e te tahi ra e ’ere ïa i te melo. Tapitapi ri’i te mana’o ’o te pāpa’i parau ’aita rā i mata’u. ’Ua ’ite ’oia ē, ’ua ani mai te peropheta o te Atua i te mau taea’e o te ’autahu’ara’a ’ia fa’aho’i mai i te māmoe mo’e. ’E ’ua fa’aro’o ’oia i te pure a tōna peresidenira’a. ’Ua fa’aro’o ’oia ia rātou i te fa’aotira’a i te i’oa o te tamaiti e fa’aho’i mai ’e i tōna iho i’oa.

’Ua hi’o noa vau i te pāpa’i parau i te haerera’a nā ni’a i te purumu nō te haere i te fare o te tamaiti paruparu. ’Ua haere marū noa ’oia mai te huru ra ē, te haere ra ’oia i roto i te fifi rahi. Terā rā tau ’āfa hora noa, ’ua ho’i mai ’oia ’e te tamaiti, mā te ’ata’ata ’oa’oa. ’Aita vau i pāpū ē, ’ua ’ite ’oia i taua taime ra, terā rā, ’ua haere ’oia mā te fa’aro’o ē, tei ni’a ’oia i te fa’auera’a a te Fatu. ’Ua vai noa taua fa’aro’o ra i roto iāna ’e ’ua tupu i te rahi e tae roa i tāna mau matahiti ’ei misiōnare, ’ei metua tāne, ’ei ti’a fa’atere nō te feiā ’āpī tamāroa, ’e ’ei ēpisekōpo.

E paraparau ana’e e aha te aura’a o te reira huru fa’aro’o nō te hō’ē ’episekōpo. I te tahi taime e pi’ihia te hō’ē ’episekōpo nō te tāvini i te ta’ata tei mātau maita’i iāna. ’Ua ’ite te mau melo o te pāroisa i te tahi mea nō ni’a i tōna mau paruparu i te tino nei ’e tōna mau pūai i te pae vārua, ’e ’ua ’ite rātou ē e nehenehe te tahi atu mau ta’ata e pi’ihia—te tahi atu mau ta’ata māramarama a’e, ’aravihi a’e, au a’e, ’e ’aore rā nehenehe a’e.

’Ia ’ite rā teie mau melo ē, nō ’ō mai i te Fatu ra te pi’ira’a ’ia tāvini ’ei ’episekōpo, nā roto i te heheura’a.’Aita ana’e tō rātou fa’aro’o, e mea fifi roa nō te ’episekōpo tei pi’ihia e te Atua, ’ia fāri’i i te heheura’a tāna e hina’aro nō te tauturu ia rātou. E’ita ’oia e manuia ’aita ana’e te fa’aro’o o te mau melo nō te pāturu iāna.

Aua’e rā, mai te reira ato’a te tahi atu pae. ’A feruri na i te tāvini ’o te Fatu, te ari’i Bēniāmina, tei arata’i i tōna mau ta’ata i te tātarahapa. ’Ua tāmarūhia te ’ā’au o te mau ta’ata nā roto i tō rātou fa’aro’o ē, nā te Atua i pi’i iāna, ta’a ’ē noa atu tōna mau paruparu, ’e nō ’ō mai tāna mau parau i te Atua ra. Te ha’amana’o ra ’outou e aha tā te mau ta’ata i parau : « ’Ē, ’ua fa’aro’o mātou i te parau ato’a tā ’oe i parau mai ia mātou … ’e ’ua ’ite ho’i mātou ē, e parau mau te reira, nā roto i te Vārua o te Fatu pūai hope tei fa’ahuru ’ē ia mātou, ’oia ho’i tō mātou ’ā’au, i ’ore ai mātou i hina’aro ai i te rave i te ’ino, ’ia rave rā i te maita’i ma te fa’aea ’ore » (Mosia 5:2).

’Ia manuia te hō’ē ti’a fa’atere i roto i te ’ohipa a te Fatu, ’ia vai te ti’aturira’a o te ta’ata ē ’ua pi’ihia ’oia e te Atua, e nā ni’a a’e tō rātou ’itera’a i tōna mau hapehape ’e tōna mau paruparu i te tino nei. Tē ha’amana’o ra ’outou e mea nāhea tō te ari’i Bēniāmina fa’ata’ara’a i tōna ’iho ti’ara’a feiā fa’atere.

« ’Aore ho’i au i fa’aue atu ia ’outou e haere mai i ’ō nei ’ia mata’u mai iā’u nei, ’e ’ia mana’o ho’i ’outou ē, e ’ere au i te ta’ata o te tino nei.

« E ta’ata mau ā rā vau mai ia ’outou ato’a te huru, e ti’a ho’i ’ia ro’ohia-noa-hia i te mau mea ti’a ’ore o te tino nei ’e o te ’ā’au ato’a ho’i ; i mā’itihia rā vau e teie nei feiā, ’e i fa’atāhinuhia vau e tā’u metua ra, ’e i fa’ati’ahia ho’i e te rima ’o te Fatu ra ’ia riro vau ’ei tāvana ’e ’ei ari’i i ni’a i teie nei feiā ; ’ua ha’apa’ohia ’e ’ua fa’aorahia ho’i au e tōna mana fāito ’ore, ’ia tāvini ia ’outou mā te mana ato’a, ’e te hina’aro ato’a, ’e te pūai ato’a ho’i tā te Fatu i hōro’a mai iā’u nei ra » (Mosia 2:10-11).

I tā ’outou hi’ora’a, e au ra ānei tō ’outou fa’atere i roto i te ’Ēkālesia a te Fatu ’ei ta’ata paruparu ’e te huru ta’ata noa ’aore rā ’ei ta’ata pūai ’e te fa’auruhia. Te parau mau maori rā, ’ua riro te mau ti’a fa’atere ato’a ’ei āno’ira’a nō taua huru ra, e hau atu ā. Te mea e tauturu i te mau tāvini o te Fatu tei pi’ihia nō te arata’i ia tātou maori rā, ’ia hi’o tātou ia rātou mai tā te Atua e hi’o ra ’a pi’i ai ’oia ia rātou.

Te hi’o nei te Fatu i tōna mau tāvini mā te maita’i roa. Te hi’o nei ’oia i tō rātou pūai roto ’e tō rātou ananahi. ’E ’ua ’ite ’oia ē, nāfea tō rātou natura mau e tāuihia ai. ’Ua ’ite ato’a ’oia ē, nāfea te mau ’itera’a tā rātou e fāri’i i rotopū i te mau ta’ata tā rātou e arata’i ra, i te tāui ia rātou.

’Ua fāri’i a’e nei paha ’outou i te pūai mai roto mai i te mau ta’ata tei pi’ihia ’outou ’ia tāvini. ’Ua pi’ihia na vau ’ei ēpisekōpo nō te feiā ’āpī pa’ari. ’Aita vau i pāpū ē, te ’ōpuara’a a te Fatu, nō te mau tāuira’a ānei tā’u e nehenehe e tauturu iāna ’ia fa’atupu i roto ia rātou, ’e ’aore rā, nō te mau tāuira’a ānei tāna i ’ite ē, e fa’atupu rātou i roto iā’u.

’Aita roa vau i ta’a maita’i, e au ē, te rahira’a o te feiā ’āpī i roto i taua pāroisa ra, ’ua ha’a rātou mai te huru ē, ’ua pi’i-ta’a-’ē-hia vau e te Atua nō rātou. ’Ua ’ite rātou i tō’u mau paruparu, ’aita rā i tau’a i te reira.

Tē ha’amana’o nei au i te hō’ē taure’are’a tei ani mai i te mana’o tauturu nō ni’a i tāna mau mā’itira’a nō te ha’api’ira’a. E pīahi ’oia nō te matahiti mātāmua i roto i te hō’ē fare ha’api’ira’a teitei maita’i roa. Hō’ē hepetoma i muri iho te hōro’ara’ahia te a’o, ’ua ani mai ’oia ’ia fārerei iā’u.

I tōna tomora’a mai i roto i te piha tōro’a, ’ua māere au i tāna uira’a, « Bishop, e nehenehe ānei tāua e pure nā mua a’e e paraparau atu ai ? ’E e nehenehe ānei tāua e tūturi ?’E e nehenehe ānei tā’u e pure ? »

’Ua māere au i tāna mau anira’a. Terā rā, ’ua rahi atu tō’u māere i tāna pure. Mai teie ri’i te huru te pure : « E te Metua i te Ao ra, ’ua ’ite ’oe ē, ’ua hōro’a mai te ’episekōpo Eyring i te hō’ē parau a’o iā’u i te hepetoma i ma’iri a’e nei, e ’aita i tano. Tē ani nei au ia ’oe ’ia fa’auru iāna ’ia ’ite ē, e aha tā’u e rave i teie nei ».

E ’ata paha ’outou i te reira, terā rā, ’aita vau i ’ata. ’Ua ’ite a’e na ’oia ē, e aha tā te Fatu i hina’aro ’ia rave ’oia. Terā rā, ’ua auraro ’oia i te ti’ara’a o te hō’ē ’episekōpo i roto i te ’Ēkālesia a te Fatu, ’e penei a’e tē hina’aro nei ’oia ’ia fāri’i au i te rāve’a e roa’a ai iā’u te hō’ē ti’aturira’a rahi a’e nō te fāri’i i te hehēura’a i roto i taua pi’ira’a ra.

’Ua tupu mau te reira. ’Ia ti’a a’era māua i ni’a ’e ’a pārahi atu ai, ’ua tae mai te heheura’a i roto iā’u. ’Ua parau atura vau iāna i te mea tā’u i mana’o ē, ’ua hina’aro te Fatu ’ia rave ’oia. E 18 ana’e matahiti tōna i te reira taime, e matahiti pa’ari rā tōna i te pae vārua.

’Ua ’ite a’e na ’oia ē, ’aita i tītauhia iāna ’ia haere e fārerei i te hō’ē ’episekōpo nō ni’a i teie huru fifi. Terā rā, ’ua ha’api’i mai ’oia ’ia pāturu i te tāvini o te Fatu noa atu i roto i tōna mau paruparu tāhuti nei. I te pae hōpe’a, ’ua riro mai ’oia ’ei peresideni titi. ’Ua ta’ita’i mai ’oia i roto iāna i te ha’api’ira’a tā māua to’opiti i ’apo mai : Mai te mea e fa’aro’o tō ’outou ē, tē arata’i nei te Fatu i tāna ’Ēkālesia nā roto i te heheura’a i taua mau tāvini hapehape ra tāna i pi’i, e ’īriti mai ïa te Fatu i te mau ha’amāramarama o te ra’i iāna nō rātou, mai tāna e nā reira i ni’a ia ’outou.

Nā roto i taua ’ohipa ra, ’ua ’apo mai au i te ha’api’ira’a ē, te fa’aro’o o te ta’ata tā tātou e tāvini, i te tahi taime hau atu i tō tātou iho fa’aro’o, e hōro’a mai te reira ia tātou i te heheura’a i roto i te ’ohipa a te Fatu.

’Ua ’apo fa’ahou mai au i te tahi atu ha’api’ira’a. ’Ahiri taua tamaiti ra i ha’avā iā’u nō tō’u manuia ’ore i te hōro’ara’a iāna i te a’ora’a maita’i i te taime mātāmua, e’ita roa atu ïa ’oia e haere mai nō te ani fa’ahou mai. ’E nō reira, nā roto i tōna mā’itira’a ’eiaha e ha’avā iā’u, ’ua fāri’i ’oia i te ha’apāpūra’a tāna i hina’aro.

Tē vai fa’ahou ra te tahi atu ha’api’ira’a nō roto mai i taua ’ohipa ra tei tāvini maita’i iā’u. I tō’u mana’o, ’aita roa atu ’oia i fa’a’ite i te hō’ē ta’ata i roto i te pāroisa ē, ’aita vau i hōro’a i te a’ora’a maita’i i te taime mātāmua. ’Ahiri ’oia i nā reira, ’ua nehenehe ïa te reira i te fa’aiti i te fa’aro’o o vetahi ’ē i roto i te pāroisa ’ia ti’aturi i te fa’aurura’a a te ’episekōpo.

Tē tāmata nei au ’eiaha e ha’avā i te mau tāvini ’o te Fatu ’e ’aore rā e paraparau i tō rātou mau paruparu e ’ite-mata-hia ra. ’E tē tāmata nei au e ha’api’i i te reira i tā’u mau tamari’i nā roto i te hi’ora’a. ’Ua fa’a’ite mai te peresideni James E. Faust i te hō’ē parau tumu o tā’u e tāmata nei i te fa’ariro ’ei parau tumu nā’u iho. Tē fa’aue atu nei au ia ’outou ’ia rave i te reira :

« Tītauhia … ia tātou ’ia pāturu ’e ’ia tauturu i tō tātou feiā fa’atere nō te fenua iho, nō te mea … ’ua pi’ihia rātou ’e ’ua mā’itihia.’ E ti’a i te mau melo ato’a o teie ’Ēkālesia ’ia fāri’i i te a’ora’a nō ’ō mai i te hō’ē ’episekōpo, ’e ’aore rā i te hō’ē peresideni ’āma’a, te hō’ē peresideni titi ’e ’aore rā misiōni, ’e te peresideni ’o te ’Ēkālesia ’e tōna mau rima tauturu. ’Aita hō’ē o teie mau taea’e i ani i tōna pi’ira’a. ’Aita e ta’ata hape ’ore. E mau tāvini rātou nō te Fatu, pi’ihia ’e āna nā roto i te feiā i fa’ata’ahia nō te fāri’i i te fa’aurura’a. O rātou tei pi’ihia, tei pāturuhia ’e tei fa’ata’ahia, e mana tō rātou nō te fāri’i i tā tātou pāturura’a tāmau.

« … E rave rahi te ta’ata tei fārerei i te fifi pae vārua ’e tei hi’a nō tō rātou fa’atura ’ore i te feiā fa’atere o te ’Ēkālesia. ’Eiaha tātou e tau’a i te mau hapehape, te mau hapa e ’aore rā te mau paruparu ’o te feiā tei pi’ihia nō te fa’atere ia tātou, ’e pāruru rā tātou i te tōro’a tā rātou e mau ra » (« Pi’ihia ’e mā’itihia,” Liahona, Novema 2005, 54-55).

E ha’amaita’i teie parau a’o i te mau tāvini o te Atua i roto i te mau hi’ora’a ato’a.

I te mau mahana mātāmua o te ’Ēkālesia a te Fatu, ’ua ha’amata te feiā fa’atere piri roa i te peropheta Iosepha Semita i te paraparau nō ni’a i tōna mau hape. Noa atu te mau mea ato’a tā rātou i hi’o ’e i ’ite nō ni’a i tōna huru i mua i te Fatu, ’ua pārare vitiviti tō rātou vārua fa’a’ino ’e te pohehae. ’Ua fa’a’ite mai te hō’ē o te Tino ’Ahuru ma Piti ia tātou i te fāito o te fa’aro’o ’e te ha’apa’o maita’i e tītauhia ia tātou mai te mea ē, e tāvini tātou i roto i te bāsileia o te Fatu.

Teie te parau fa’a’ite : « E rave rahi mau peresibutero tei fa’atupu i te hō’ē putuputura’a i roto i te hiero nō te feiā ato’a e mana’o ra ē, ’ua hi’a te peropheta Iosepha Semita. ’Ua ’ōpua rātou e pi’i ia Davida Uitima ’ei fa’atere ’āpī nō te ’Ēkālesia … I muri a’e i tōna fa’aro’ora’a i te mau mana’o pāto’i i te peropheta, ’ua ti’a a’era ’o Brigham [Young] i ni’a ’e ’ua fa’a’ite pāpū a’era ē, e peropheta ’o Iosepha, ’e ’ua ’ite au i te reira, ’e e nehenehe tā rātou e tāhitohito ’e e parau ’ino iāna mai te au i tā rātou e hina’aro ; e’ita tā rātou e nehenehe e ha’amou i te pi’ira’a o te peropheta o te Atua, tā rātou noa e nehenehe e ha’amou, ’o tō rātou iho ïa mana, te tāpūra’a i te taura e nati ra ia rātou i ni’a i te peropheta ’e te Atua, ’a paremo atu ai rātou iho i hāde ra » (A’amu ’o te ’Ēkālesia i roto i te ’īra’a o te mau tau [Church Educational System manual, 2003], 2nd ed., 174 ; hi’o ato’a Ha’api’ira’a a te mau peresideni o te ’Ēkālesia : Brigham Young [1997], 79).

Tē vai ra hō’ē taura e nati nei ia tātou i ni’a i te Fatu i roto i tā tātou tāvinira’a. ’Ua natihia te reira nā te mau vāhi ato’a i pi’ihia ai tātou ’ia tāvini i roto i te bāsileia, nā roto atu i te feiā tei pi’ihia nō te fa’atere ia tātou i roto i te ’autahu’ara’a, ’e i te peropheta, tei natihia i ni’a i te Fatu. Tītauhia te fa’aro’o ’e te ha’eha’a nō te tāvini i te vāhi i pi’ihia ai tātou, ’ia ti’aturi ē, ’ua pi’i te Fatu ia tātou ’e i te feiā e fa’atere ra ia tātou, ’e ’ia pāturu ia rātou mā te fa’aro’o hope.

Tē vai ra te taime, mai tei te ’anotau o Keterani ra, e hina’aro ai tātou i te fa’aro’o ’e te parau ti’a ’o Brigham Young nō te ti’a i te vāhi i pi’ihia ai tātou e te Fatu, ’ia vai ha’apa’o i tōna peropheta ’e i te feiā fa’atere tāna i tu’u i ni’a i te pārahira’a.

Tē fa’a’ite atu nei au ia ’outou i tō’u ’itera’a pāpū hanahana ’e te ’oa’oa ē, tē ara nei te Fatu ’o Iesu Mesia. Tē arata’i nei ’oia i tāna ’Ēkālesia ’e tōna mau tāvini. Tē fa’a’ite pāpū nei au ē, ’o Thomas S.Monson te ta’ata hō’ē roa e mau nei ’e e fa’a’ohipa nei i te mau tāviri ato’a o te ’autahu’ara’a mo’a i ni’a i te fenua nei. ’E tē ani nei au i te mau ha’amaita’ira’a i ni’a i te mau tāvini ha’eha’a ato’a o tē tāvini nei mā te ’ā’au tae mau ’e te maita’i i roto i te ’Ēkālesia a Iesu Mesia i fa’aho’i-fa’ahou-hia mai, o tāna iho e fa’atere nei. Tē fa’a’ite pāpū nei au ē, ’ua ’ite Iosepha Semita i te Atua te Metua ’e ia Iesu Mesia. ’Ua paraparau rāua iāna. ’Ua fa’aho’ihia mai te mau tāviri o te ’autahu’ara’a nō te ha’amaita’ira’a o te mau tamari’i ato’a a te Metua i te Ao ra. E ’ohipa ’e e ti’aturira’a nā tātou ’ia tāvini i roto i tō tātou ti’ara’a i roto i te ’ohipa a te Fatu. I te i‘oa o Iesu Mesia, ’āmene.