’Ei ’ōpuara’a hanahana
Nā Elder Ronald A. Rasband
Nō te pupu nō te Tino ’Ahuru Ma Piti ’āpōsetolo
Tē arata’i nei te rima o te Fatu ia ’outou. ’Ei « ’ōpuara’a hanahana », tei roto ’oia i te mau tuha’a na’ina’i o tō ’outou orara’a ’e tae noa atu i te mau ta’ahira’a rarahi.
Te mau taea’e ’e te mau tuahine, tē ti’a ra vau i roto i teie ’āmuira’a rahi ’e te fa’auru nā te ao ato’a nei ’e tē ’ite ra vau i tō ’outou pūai ’e tō ’outou vārua, e’ita e nehenehe e ’ore e ha’amana’o i te mau parau a te ’āpōsetolo Petero : « [E te Fatu], e mea maita’i ’ia pārahi i’ō nei ».1
E ’ere roa atu te mau parau a Alama i te porora’a ’oia i te nūna’a i Amoniha? ’Ua fa’aru’e Alama i te ’oire nō te ’ino o te ta’ata. I reira, ’ua fā mai te hō’ē melahi ia Alama ma te pi’i iāna ’ia « ho’i atu i te ’oire ra o Amoniha, e a’o fa’ahou atu ai i te feiā o taua ’oire ra ».2
« ’Oi’oi » a’era Alama i te nā reira ’e « tomo ihora ’oia i roto i te ’oire nā te tahi ’ē’a ’ē ».3
« ’E tē tomo ra ’oia i roto i te ’oire ra, ’ua po’ia ’oia, ’e ’ua nā ’ō atura i te hō’ē ta’ata : E hōro’a mai ānei ’oe i te mā’a i te hō’ē tāvini ha’eha’a a te Atua ?
« ’Ua nā ’ō a’era te ta’ata iāna : E ’āti Nephi vau nei, ’e tē ite nei au ē, e peropheta mo’a ’oe nā te Atua, nō te mea ’o te ta’ata ’oe tā te melahi i parau mai i roto i te ’ōrama ē : E fāri’i ’oe iāna ra ».4
’O Amuleka terā ta’ata.
Terā, ’ua hape noa atu ānei tō Alamafārereira’a ia Amuleka ? ’Aita, e ’ere i te ’ohipa hape noa atu tōna tomora’a i roto i te ’oire nā te tahi atu purūmu e fa’afārerei iāna i teie ta’ata fa’aro’o rahi tei riro mai ’ei hoa misiōnare nōna.
’Ua parau Elder Neal A. Maxwell ē : « ’Aita e ta’ata i roto ia tātou e fa’a’ohipa pauroa nei i te mau rāve’a fārereira’a ta’ata i tu’uhia ia tātou ’e te mau hoa ’ati a’e ia tātou. E parau paha tātou i te reira mau fārereira’a i te ‘mea tupu noa mai’. E nehenehe e fa’a’ohipa i te reira parau nō te feiā tāhuti, nō te ’ohipa rā a te Atua ’ite hope, e ’ere te parau tupu noa mai i te parau tano. ’Aita ’oia e rave nei i te mau mea ’ei mea ‘tupu noa mai’ ’ei ‘’ōpuara’a hanahana’ rā ».5
Mai te huru tō tātou orara’a i te hō’ē perēfa’anu’u, ’e nā te Fatu e fa’anu’u ia tātou mai te hō’ē vāhi i te tahi—mai te peu e pe’e tātou i te muhumuhura’a a te Vārua. ’Ia hi’o vau i muri, e nehenehe e ’ite i tōna rima i roto i tō tātou orara’a.
E nehenehe e ’ite i terā huru fa’aōra’a mai te Atua i te taime ’a ho’i ai Nephi e ti’i i te mau ’api veo ia Labana ra. « ’Ua arata’ihia [’oia] e te Vārua, ’e ’aore [’oia] i ’ite na i te mau mea [tāna] e rave ra ».6 Ē ri’a a’era, tei mua Labana iāna i te unuhira’a, ’ua ha’apohe atura Nephi iāna, ’ua ti’i i te mau ’api parau ’e ’ua meho ’e tāna mau taea’e ra. ’Ua fāna’o ānei ’oia, ’ua hape noa atu Labana i te tāravara’a i mua iāna ? ’Aore rā e « ’ōpuara’a hanahana » ?
E mau ’ohipa rahi e hōhora nei i roto i te ’evanelia ’e te ’Ēkālesia ’o te fa’anu’u nei i mua i te bāsileia a te Atua i ni’a i te fenua nei. E ’ere i te ’ohipa tupu noa mai, e fa’anahora’a rā nā te Atua. ’Oia i hāmani i teie nei ao, e nehenehe tāna e ha’amanino i te miti i tāna parau ’e e nehenehe tāna e fa’atīpu’u ia Alama ’e Amuleka, ’e ’ia Nephi ’e Labana nō te haere i te vāhi ti’a ra, i te taime ti’a mau.
Nā reira ato’a, e mau ’ohipa ’e e mau fa’ahoara’a e hōhora nei i roto i tō tātou orara’a tāta’itahi, ’o tē fa’anu’u nei i te ’ohipa a te Atua i ni’a i te fenua nei.
’Ua parau Elder Joseph B. Wirthlin iti nō te hō’ē taime ’ua parau te peresideni Thomas S. Monson iāna : « E rima arata’i i ni’a i te mau mea ato’a. Pinepine ’ia tupu te mau mea, ’aita i tupu noa mai. I te hō’ē mahana, e ho’i tātou i muri i ni’a i te mau mea huru tupu noa i roto i tō tātou orara’a, e ’ite mai tātou ē, e ’ere roa atu paha ïa i te mea i tupu noa mai ».7
Pinepine te rahira’a taime, nā te tahi ri’i noa ta’ata i ’ite i tā tātou mau ’ohipa maitata’i. Noa atu rā, ’ua tāpa’ohia te reira i ni’a i te ra’i. I te hō’ē mahana, e ti’a atu tātou ’ei ’ite nō tō tātou pūpū-hope-ra’a ia tātou i te mau ’ohipa nō te parau ti’a. ’Aita e tāmatara’a, ’aita e ’ati e nehenehe e fa’ahaere i te fa’anahora’a nō te ’oa’oa i rāpae i tōna purūmu. ’Ei « ’ōpuara’a hanahana », e « riro [mau iho ā] te ’oa’oa ’ia po’ipo’i ».8 « I haere mai au i roto i teie nei ao e rave i tō te Metua hina’aro »,9 tā Iesu i ha’api’i. Te mau taea’e ’e te mau tuahine here, mai te reira ato’a tātou.
Nā roto i te terera’a o tō’u iho nei orara’a, ’ua ’ite au ē, e fa’anu’u te Fatu ia tātou i ni’a i terā huru perēfa’anu’u nō te rave i tāna ’ohipa. Te mea e hi’ohia ’ei ’ohipa hape noa atu, tōna vaira’a mau, e ’ohipa ha’apa’ohia ïa e te Metua here i te Ao ra ’o te nehenehe e nūmera i te rahira’a rouru i ni’a i te upo’o.10 E ’ore roa ato’a te hō’ē manu ri’i e mo’e i tō tātōu Metua ’ia ma’iri i raro.11 Tei roto te Fatu i te mau tuha’a na’ina’i o tō tātou orara’a, ’e ’ua riro te reira mau ’ohipa ri’i ’e mau rāve’a ’ei fa’aineinera’a ia tātou nō te fa’ateitei i tō tātou ’utuāfare ’e ia vetahi ’ē ’a patu ai tātou i te bāsileia o te Atua i ni’a i te fenua nei. ’A ha’amana’o i tā te Fatu i parau ia Aberahama : « ’Ua ’ite au i te hope’a mai te mātāmua mai, nō reira, ’ei ni’a a’e tō’u rima ia ’oe ».12
’Ua tu’u te Fatu iā’u i roto i te hō’ē fare ’e te metua here. I te hi’ora’a o te ao, e mau ta’ata ha’eha’a noa rāua ; e fa’ahoro pereo’o fa’auta taiha’a noa tō’u pāpā, e ta’ata itoito mau ; ’ua ha’apa’o tō’u māmā i te fare mai te hō’ē melahi. ’Ua tauturu mai te Fatu iā’u ’ia ’itehia mai ta’u vahine iti, ’o Melanie ; ’ua fa’auru ’oia i te hō’ē ’ona taiete, tei riro mai ’ei hoa rahi, e hōro’a iā’u i te hō’ē ’ohipa. ’Ua pi’i te Fatu iā’u ’ia tāvini i roto i te ’āua misiōni, ’ei taure’are’a ’e ’ei peresideni misiōni ; ’ua pi’i ’oia iā’u i te pupu nō te Hitu ’Ahuru ; ’e i teienei ’ei ’āpōsetolo. ’Ia hi’o vau i muri, tē ’ite nei au ’aita vau i fa’anahonaho i te hō’ē o teie mau nu’ura’a ; nā te Fatu rā, mai tāna e fa’anahonaho nei i te mau nu’ura’a faufa’a rahi nō ’outou ’e nō te feiā tā ’outou i here.
E aha te ti’a ’ia ’imi i roto i tō ’outou iho orara’a ? E aha te mau semeio a te Atua e fa’aha’amana’o nei ē, e mea fātata ’oia ’e tē nā ’ō ra : « Teie au » ? ’A feruri i te reira mau taime, tē vai ra te mau mahana ato’a, ’ua ’ohipa te Fatu i roto i tō ’outou orara’a—’e ’ua nā reira fa’ahou ā. ’A poihere i te reira ’ei taime ’ua fa’a’ite te Fatu ia ’outou i tōna ti’aturi ia ’outou ’e i tā ’outou mau mā’itira’a. ’A fa’ati’a ato’a rā iāna ’ia fa’ariro rahi atu ā ia ’outou i tā ’outou iho e nehenehe e fa’ariro ia ’outou. ’A poihere i tōna fa’aōra’a mai iāna. I te tahi taime e hi’o tātou i te mau tauira’a i roto i tā tātou mau ’ōpuara’a ’ei ta’ahira’a hape i ni’a i tō tātou tere. ’A feruri i te reira ’ei mau ta’ahira’a mātāmua nō te « [rave] i te ’ohipa a te Fatu ».13
Ma’a ’āva’e i teienei, ’ua haere tā māua mo’otua tamāhine nā muri i te hō’ē pupu feiā ’āpī tei tere nā te mau vāhi māta’ita’ira’a o te ’ā’amu o te ’Ēkālesia. I ni’a i te fa’anahora’a tere hope’a, ’ua pāpā’ihia ē, e nā te vāhi atu rātou e tāvini ra tōna taea’e tāna misiōni, tā māua mo’otu’a tamāroa. ’Aita tā māua mo’otua tamāhine i ’ōpua e fārerei i tōna taea’e i roto i tāna misiōni. Teie noa rā, ’a tomo ai te pereo’o mata’eina’a i roto i te ’oire i reira tōna taea’e, tē ’itehia ra e piti misiōnare tē haere ’āvae ra. Hō’ē o nā misiōnare, ’o tōna ïa taea’e.
’Oa’oa roa te feiā ’āpī i roto i te pereo’o mata’eina’a i te anira’a i te ta’ata fa’ahoro e tāpe’a nō te fārerei ’oia i tōna taea’e. ’Aita i ma’iri hō’ē minuti tō rāua paraparaura’a ma te roimata, haere a’era tōna taea’e e rave i tāna hōpoi’a misiōnare. I muri roa mai tō mātou ha’api’ira’a ē, ’a pae noa minuti tōna taea’e i ni’a i te purūmu, ’ua ’oti te hō’ē fārereira’a ’e tē haere ra ’oia i te pereo’o.
E nehenehe te Metua i te Ao ra e tu’u ia tātou i roto i te hō’ē ’ohipa ma te feruri-ātea-hia e ’oia. ’Ua nā reira ’oia i roto i tō’u orara’a, ’e tē nā reira nei ’oia i roto i tō ’outou, mai tāna i rave i roto i te orara’a o tā māua nā mo’otua iti.
E mea faufa’a tātou ’e ’ua here te Fatu ia tātou tāta’itahi, nāna e aupuru, nāna e muhumuhu mai ’e nāna e hi’o mai ia tātou ’ia au i tō tātou iho orara’a. ’Ua hau roa ’ino tōna pa’ari ’e tōna mana i te tō te tāne ’e te vahine tāhuti nei. ’Ua ’ite ’oia i tā tātou mau tāfifira’a, te mau manuiara’a ’e te mau hia’ai parau ti’a o tō tātou ’ā’au.
’A tahi a’e matahiti i teienei, tē haere ra vau nā Temple Square, tē haere mai nei hō’ē tuahine misiōnare ma te ani mai : « Tē ha’amana’o ra ’oe iā’u ? Nō Floride mai au ». ’Ua parau mai ’oia i tōna i’oa, ’o te tuahine Aida Chilan. ’Oia mau, tē ha’amana’o ra vau i te fārereira’a iāna ’e tōna ’utuāfare. ’Ua ani mai tōna peresideni titi e hāhaere mātou i tō rātou ’utuāfare. ’Ua pāpū maita’i ē, tō mātou tere, nō tā rāua tamāhine ïa, ’o Aida, tei ’ore ā i bāpetizohia. I muri mai i tā mātou fārereira’a, ’e hau i te hō’ē matahiti ha’api’ira’a ’e fa’ahoara’a, ’ua bāpetizohia Aida.
I muri mai i tō māua fārereira’a i Temple Square, ’ua pāpa’i mai ’oia i te hō’ē rata iā’u. ’Ua parau ’oia : « ’Ua ’ite au mā tō’u ’ā’au ato’a ē, ’ua ’ite te Metua i te Ao ra ia tātou tāta’itahi, ’e tē tāmau nei ’oia i te tu’u ia tātou i ni’a i te mau ’ē’a fa’afārerei nō te hō’ē tumu. Māuruuru nō te rirora’a hō’ē o ta’u mau misiōnare, nō te torora’a mai i te rima iā’u ’e nō te ’imira’a mai iā’u ’a pae matahiti i teienei ».14 ’Ua hāpono ato’a mai Aida i te ’ā’amu nō tōna fa’afāriura’ahia ’e te mau « mea hanahana tupu noa » i roto i tōna orara’a tei arata’i iāna i te bāpetizora’a ’e te ha’amaura’a, i te tāvinira’a i te hō’ē misiōni i Temple Square ’e i tōna fa’aipoipora’a i roto i te hiero, ’aita i maoro a’enei.15
E ’ohipa tupu noa ānei te fa’atīpu’ura’a te peresideni titi ia mātou i te fare o Chilan mā, ’aore rā tō māua fārereira’a i Temple Square ? Tē ha’apāpū nei te ’itera’a pāpū o Aida ē, ’ua riro ana’e te reira ’ei « ’ōpuara’a nā te Atua ».
E mea au roa nā te Fatu e ti’a ia tātou nei. ’Ia putapū ’outou i tōna Vārua ’e ’ia ’ohipa ho’i ’outou mai te au i te mau fa’a’itera’a mātāmua, e ’ere atura ïa te mana’o iāna i te mea tupu noa mai, mai tāna i parau : « E haere au nā mua i tō ’outou mata. E vai ho’i au i tō ’outou pae ’atau ’e i tō ’outou pae ’aui, ’e ’ei roto ho’i tō’u Vārua i tō ’outou mau ’ā’au, ’e ta’u mau melahi ho’i e ’ati noa a’e ia ’outou na, ’ia ha’amara’a mai ia ’outou i ni’a ».16
Tē tupu nei te mau ’ohipa mai te reira nō tātou pā’āto’a, i roto i tō tātou orara’a. E nehenehe e fārerei i te hō’ē ta’ata e au ē e ta’ata mātau, e nehenehe e fārerei fa’ahou i te hō’ē hoa ’aore rā e tū’ati te mana’o ’e te hō’ē ta’ata ’ē. ’Ia tupu te reira, penei a’e tē fa’aha’amana’o ra te Fatu ia tātou ē, e mau taea’e ’e e mau tuahine mau ana’e tātou. ’Ua fa’aō tātou i roto i te hō’ē mau ā ’ohipa—tā Iosepha Semita i parau te « ’ohipa a te Mesia ».17
I teienei, i hea e fa’aō ai i tō tātou ti’amāra’a ’ia mā’iti i roto i te hō’ē « ’ōpuara’a hanahana » ? Tei ia tātou nei te mā’itira’a e pe’e ’aore rā ’eiaha e pe’e i tō tātou Fa’aora ’e tāna feiā fa’atere i mā’itihia. E mea pāpū maita’i te hi’ora’a i roto i te Buka a Moromona i te fāriu-’ē-ra’a te mau ’āti Nephi i te Fatu. ’Ua ’oto Moromona :
« ’E ’ua ’ite rātou ē … ’aita atura te Vārua o te Fatu e fa’aora ā ia rātou ra ; ’oia mau, ’ua ta’a ’ē te reira ia rātou nō te mea e ’ore te Vārua o te Fatu e vai i roto i te hiero vi’ivi’i ra—
« Nō reira i fa’aea ai te Atua i te fa’aora ia rātou nā roto i tōna mana ta’a ’ē ’e te fāito ’ore ra ; i riro ho’i rātou ’ei feiā fa’aro’o ’ore ’e te hau ’ē i te parau ’ino ».18
E ’ere pauroa te mau mea e ani mai te Fatu ia tātou, nō tō tātou ïa huru pūai, tō tātou ha’apa’o maita’i ’aore rā nō te mea ’ua ’ite tātou. E hi’o na ia Saulo tā te Fatu i tāpe’a i ni’a i te purūmu nō Damaseko. Tē haere ra ’oia i te ’ē’a hape i roto i tōna orara’a ; e ’ere te terera’a i te ’apato’erau ’aore rā i te ’apato’a. ’Ua taui te Atua i te ’avei’a a Saulo. I muri iho, ’ua mātauhia ’oia ’ei Paulo, ’ua hōho’a tāna tāvinira’a ’āpōsetolo i te mea ’ua ’ite a’ena te Fatu e mara’a iāna ’ia rave ’e ’ia riro mai, ’eiaha rā mai tāna i ha’amata ’ei Saulo. Mai te reira ato’a, ’ua ’ite te Fatu e aha te mara’a ia tātou ’ia rave ’e ’ia riro mai. E aha tā te ’āpōsetolo Paulo i ha’api’i ? « ’Ua ’ite ho’i tātou ē, tē fa’atupu nei te mau mea ato’a i te maita’i nō te feiā hina’aro i te Atua, te feiā i parauhia mai i te ’ōpuara’a nāna ra ».19
’Ia vai parau ti’a tātou, ’ia hina’aro tātou ’e ’ia ma’e ia tātou, ’ia tūtava tātou i te vai ti’amā ’e te ’aravihi, e haere tātou i mua i te mau vāhi ’aita tātou i mana’o a’enei, ’e e riro mai tātou ’ei tūha’a nō te « ’ōpuara’a hanahana » a te Metua i te Ao ra. E nātura Atua i roto ia tātou tāta’itahi. ’Ia ’ite tātou i te Atua i te ’ohipara’a nā roto ia tātou ’e i pīha’i iho ia tātou, e fa’aitoito ho’i tātou ’e e māuruuru ho’i i te reira arata’ira’a. ’Ia parau tō tātou Metua i te Ra’i ē, « ’O teie ho’i ta’u ’ohipa ’e tō’u hanahana ho’i, ’ia fa’atupu i te tāhuti ’ore ’e te ora mure ’ore o te ta’ata nei »,20 tē parau ra ’oia nō tāna mau tamari’i ato’a—’o outou ato’a ïa.
Tē arata’i nei te rima o te Fatu ia ’outou. ’Ei « ’ōpuara’a hanahana », tei roto ’oia i te mau tuha’a na’ina’i o tō ’outou orara’a ’e tae noa atu i te mau ta’ahira’a rarahi. Mai tei parauhia i roto i te Maseli : « E ti’aturi ia Iehova ma tō ’ā’au ato’a ra … e nāna e fa’a’ite ia ’oe i tō ’oe ra mau haere’a ».21 Tē fa’a’ite pāpū nei au ē, e ha’amaita’i ’oia ia ’outou, e turu ’oia ia ’outou ’e e hōpoi mai ’oia i te hau ia ’outou. I te i’oa o Iesu Mesia, ’āmene.