E mea maita’i noa te tātarahapara’a

Nā Stephen W. Owen

Peresideni rahi o te Feiā ’āpī tamāroa

I te taime e tu’u tātou i te ’āvae i ni’a i te ’ē’a nō te tātarahapara’a, tē tītau ra ïa tātou i te mana fa’aora o te Fa’aora i roto i tō tātou orara’a.

E rave rahi matahiti i ma’iri, ’ua haere mai te peresideni Gordon B. Hinckley i te hō’ē ha’uti fa’ahoro popo marite. Tei reira ’oia nō te fa’aara ē, e topahia te tahua tū’aro i te i’oa o te ta’ata fa’aineine maoro roa a’e i reira, ’o tē haere ra i tāna fa’atuha’ara’a. ’Ua hina’aro roa te pupu e upo’oti’a i terā pō ’ei fa’ahanahanara’a i tō rātou ta’ata fa’aineine. ’Ua anihia i te peresideni Hinckley ’ia haere mai i roto i te piha tauira’a e hōro’a i te tahi parau fa’aitoito. ’Ua vai tāna mau parau i roto i te pupu ha’uti ’e ’ua upo’oti’a rātou i terā mahana ’e ’ua riro ia rātou te upo’oti’ara’a rahi roa a’e i terā matahiti.

I teie mahana, tē hina’aro nei au e paraparau ia rātou e pe’ape’a ra te mana’o ē ’aita rātou e upo’oti’a ra i roto i te orara’a. Te parau mau, ’oia ho’i, « ’ua rave pā’āto’a ho’i [tatou] i te hara, ’e ’ua ’ere i te ha’amaita’i a te Atua ra ».¹ Tē vai nei paha te mau matahiti e’ita roa atu te hō’ē pupu tū’aro e pau, e ’ere rā te orara’a mai te reira. Tē fa’a’ite pāpū nei rā vau ē, ’ua ha’a te Fa’aora Iesu Mesia i te hō’ē Tāra’ehara maita’i roa ’e ’ua tu’u mai i te hōro’a nō te tātarahapara’a—e ’ē’a ho’ira’a i te ’ana’ana hope roa o te tīa’ira’a ’e i te orara’a manuia.

E hōpoi mai te tātarahapa i te ’oa’oa

Pinepine roa tātou i te feruri i te tātarahapa ’ei ’ohipa ’oto ’e te fa’aturuma. Teie rā, e fa’anahora’a nō te ’oa’oa te fa’anahora’a a te Atua, e ’ere i te fa’anahora’a nō te ’oto ! E mea fa’ateitei te tātarahapa, ’e te fa’ahanahana ho’i. Nā te hara e fa’atae mai i te ’oto.² ’O te tātarahapara’a te ’ē’a fa’aora ! ’Ua fa’ata’a mai Elder D. Todd Christofferson : « Mai te mea ’aita e tātarahapara’a ’aita ïa e tauira’a ’e ’aore rā e ha’amaita’ira’a pāpū e tupu i roto i te orara’a… Nā roto ana’e … i te tātarahapara’a e noa’a ai ia tātou te maita’i tāra’ehara a Iesu Mesia ’e te ora. E arata‘i [te tātarahapara’a] i te ti‘amāra’a, te ti‘aturira’a ’e te hau.³ Tā’u poro’i ia ’outou—i te feiā ’āpī ihoa rā—’oia ho’i, te tātarahapara’a, e ’ohipa maita’i noa ïa.

’Ia paraparau tātou nō te tātarahapa, tē paraparau noa nei tātou nō te tauto’ora’a e ha’amaita’i ia tātou iho. ’Ua hau atu te tātarahapara’a mau i te reira—nā te fa’aro’o i te Fatu Iesu Mesia ’e i tōna mana e fa’a’ore i tā tātou hara, e fa’auru i te reira. Mai tā Elder Dale G. Renlund i ha’api’i ia tātou, « Maoti te Fa’aora … e riro noa ïa te tātarahapara’a ’ei tauira’a ha’iha’i nō te huru ».⁴ E tāmata tātou i te taui i tō tātou huru, nā te Fatu ana’e rā e nehenehe e ’īriti i tō tātou vi’ivi’i ’e tō tātou mau hōpoi’a, ’e na te reira e fa’ati’a ia tātou ’ia haere i mua i ni’a i te ’ē’a nō te ha’apao-maita’i-ra’a nā roto i te ti’aturira’a ’e te pūai. ’Ua hau atu te ’oa’oa nō te tātarahapara’a i te ’oa’oa nō te orara’a au. ’O te ’oa’oa ho’i nō te fa’aorera’a hara, nō te vai-mā-fa’ahou-ra’a ’e nō te ha’afātatara’a i te Atua. I te taime e ’ite ’outou i te reira ’oa’oa, e’ita e noa’a i te tahi atu mea iti ’ia mono mai.

E fa’auru te tātarahapa mau ia tātou ’ia fa’ariro i te ha’apa’o ’ei tūtavara’a—e fafaura’a e ha’amata i te bāpetizora’a ’e ’o te fa’a’āpīhia i te hepetoma tāta’itahi i te Tāmā’ara’a a te Fatu, te ’ōro’a mo’a. I reira tātou e fāri’i ai i te parau fafau ē e « vai noa tōna Vārua i roto ia [tātou] »,⁵ ma te ’oa’oa ’e te hau tā’āto’a e tae mai nō tōna fa’ahoara’a tāmau. ’O teie te hotu nō te tātarahapara’a, ’o te mea ho’i e fa’ariro nei i te tātarahapara’a ’ei mea ’oa’oa !

Tītau te tātarahapara’a i te onoono

E mea au nā’u te parabole o te tamāiti puhura.⁶ Tē vai ra hō’ē mea ’āehuehu nō ni’a i taua taime tauira’a ’a « ho’i mai ai iāna iho ra » te puhura. Tē pārahi ra ’oia i roto i te ’āua pua’a ’e « ’ua hia’ai atura ’oia i te pipi i ’amuhia e te pua’a ra ’ia pa’ia ’oia », i reira tōna ’itera’a ē, ’ua ha’amau’a ’oia i te faufa’a a tōna metua tāne, e ’ere noa rā terā, tōna ato’a ho’i orara’a. Ma te fa’aro’o e fāri’i fa’ahou mai tōna metua tāne iāna—e’ita ’ei tamaiti ra, ’ei tāvini ïa—’ua fa’aoti ’oia e tu’u i tōna orara’a ’orure hau i muri iāna ’e e ho’i i te fare.

Pinepine au i te feruri i terā ho’ira’a roa tōna i te fare. E taime ānei ’ua ’ōtohe ’oia ma te uiui ē : « E aha pa’i tā tō’u metua tāne e parau mai ? » Penei a’e ’ua ’ōtohe ri’i ’oia nō te ho’i i te ’āua pua’a ra. ’A feruri na i te ’ā’amu ’āhani ’ua fa’aru’e ’oia i teie ’ōpuara’a. ’Ua tāpe’a noa rā te fa’aro’o iāna i ni’a i te ’ē’a, ’e ’ua tāpe’a noa te fa’aro’o i tōna metua i te hi’ora’a ’e te tīa’i-māite-ra’a iāna ē i te hope’a :

« ’E tei te ātea ’ē ā ’oia, ’ite maira tāna metua iāna, aroha maira, horo maira, tauvahi maira i ni’a i tāna ’a’ī, ho’iho’i maira iāna.

« ’Ua parau atura taua tamaiti ra iāna, E ta’u metua, ’ua hara vau i te Atua o te ra’i, ’e ia ’oe ato’a ho’i, e’ita atura vau e au ’ia parauhia ē, e tamaiti nā ’oe.

« ’Ua parau atura rā te metua i te mau tāvini, ’A hōpoi mai na i te ’ahu pū maita’i ra, e fa’a’ahu mai iāna nei, e ’ō’omo ho’i i te tāpe’a i tāna rima, ’e te tāma’a i tāna ’āvae :

« ’O ta’u tamaiti nei ho’i, i pohe na, ’e ’ua ora mai nei; i mo’e na, ’e ’ua ’itea mai nei ».

Nō te tā’āto’ara’a te tātarahapa

E te mau taea’e ’e te mau tuahine, e mau tamari’i pūhura ana’e tātou. E ti’a roa ’ia tātou pā’āto’a ’ia « iho fa’ahou mai tō tātou iho huru mau »—tōna tanora’a hau i te hō’ē taime—’e ’ia mā’iti tātou i te ’ē’a fa’aho’i i te fare. E mā’itira’a tā tātou e rave i te mahana tāta’itahi i roto i te orara’a.

Pinepine tātou i te fa’aau i te tātarahapa i te mau hara rarahi o te tītau i « te hō’ē tauira’a rahi ».⁷ Terā rā, nō te mau tā’ata ato’a te tātarahapa—’o rātou e ’ōverehaere noa ra i roto « i te mau hāere’a ’ōpanihia ’e ’ua mo’e ’ē »⁸ ’e tae noa atu ia rātou o tei « hāere nā ni’a i te ’ē’a ’afaro ’e te piriha’o » ’e i teienei, tē hina’aro nei « e hāere pāpū i mua ».⁹ E tu’u te tātarahapa ia tātou i ni’a i te ’ē’a ti’a ’e ee tāpe’a ïa tātou i ni’a i te ’ē’a ti’a. Nō rātou e ha’amata noa nei i te ti’aturi, nō rātou i ti’aturi noa na ’e nō rātou tei tītauhia ’ia ha’amata fa’ahou i te ti’aturi. Mai tā Elder David A. Bednar i ha’api’i : « ’Ua māramarama pāpū te rahira’a o tātou ē, nō te feiā hara te Tāra’ehara. ’Aita rā vau i pāpū ē ’ua ’ite ’e ’ua māramarama ānei tātou ē, te Tāra’ehara nō te feiā mo’a ato’a—nō te mau tāne ’e te mau vahine maita’i tei ha’apa’o, tei ti’amā, ’e … ’o tē tūtava nei ’ia maita’i atu ā ».¹⁰

’Aita i maoro a’enei, tei te hō’ē pū ha’api’ipi’ira’a misiōnare au i te taera’a mai te tahi mau misiōnare ’āpī. ’Ua putapū roa vau i te hi’ora’a vau ia rātou ’e te ’itera’a i te ’ana’ana i roto itō rātou mata. E hōho’a māramarama ho’i tō rātou ’e te ’oa’oa ’e te ’ana’anatae. Puta mai nei te hō’ē mana’o : « ’Ua nā roto rātou i te fa’aro’o ’e te tātarahapa. Nō reira rātou i ’ī ai i te ’oa’oa ’e te tīa’ira’a ».

’Aita vau e mana’o ra ’ua hara rahi rātou nā mua a’enei, tē mana’o nei rā vau ē, ’ua ’ite rātou nāhea i te tātarahapa; ’ua ha’api’i mai rātou ē, e ’ohipa maita’i te tātarahapara’a; ’e ’ua ineine rātou ’e ’ua hia’ai ho’i e fa’a’ite i teie poro’i ’oa’oa i tō te ao.

Terā te ’ohipa e tupu ’ia putapū tātou i te ’oa’oa nō te tātarahapara’a. ’A hi’o na ia Enosa. ’Ua tupu tōna iho taime « iho-fa’ahou-ra’a tōna iho huru mau », ’ei reira « ’ua horoi-’ē-hia [tāna] mau hara », ’ua fāriu ’oi’oi atura tōna ’ā’au i ni’a i te maita’i o vetahi ’ē. Tae noa atu i te hope’a o tōna orara’a, ’ua tītau manihini ’o Enosa i te mau ta’ata ato’a ’ia tātarahapa ’e ’ia « pōpou i te reira i tō te mau mea ato’a i te ao nei ».¹¹ Terā te ’ohipa a te tātarahapara’a; e fāriu tō tātou ’a’au i tō tātou ta’ata tupu nō te mea, ’ua ’ite tātou ē, te ’oa’oa tā tātou e ’ite nei, nō te tā’āto’ara’a ïa.

Te tātarahapara’a, e ’imira’a ïa nō te orara’a tā’āto’a

E hoa tō’u tei pa’ari i roto i te hō’ē ’utuāfare melo māuiui. I te taure’ara’a ’oia, ’ua « iho fa’ahou ’oia i tōna iho huru mau » ’e ’ua fa’aoti a’era e fa’aineine nō te hō’ē misiōni.

’Ua riro mai ’oia e misiōnare maita’i hope. I te mahana hope’a, hou ’a ho’i ai i te fare, ’ua uiui te peresideni misiōni iāna ma te ani iāna ’ia fa’a’ite mai i tōna ’itera’a pāpū. ’Ua nā reira ’oia, ’e ’ua tauahi rāua ma te roimata, ’ua nā ’ō a’era te peresideni : « Elder, e nehenehe ’oe e ha’amo’e ’aore rā e huna i te mau mea ato’a tā ’oe i fa’a’ite pāpū i te mau ’āva’e i muri nei mai te peu e’ita ’oe e rave nā mua roa i te mau mea tei patu i tō ’oe ’itera’a pāpū ».

’Ua parau mai tō’u hoa i te tahi atu mahana ē, ’ua tāmau noa ’oia i te pure ’e i te tai’o i te mau pāpa’ira’a mo’a mai te taime mai ā ’ua ho’i mai ’oia mai tāna misiōni. Nō tōna « [fa’a’amu-noa-ra’a-hia] i te parau maita’i a te Atua ra » i vai ai ’oia « i ni’a i te ’ē’a ti’a ».¹²

’Outou e fa’aineine ra nō te misiōni rave tāmau ’e ’outou e ho’i mai nei, ’a tāpa’o i te reira ! ’Aita i nava’i te noa’ara’a te hō’ē ’itera’a pāpū; tītauhia ’ia tāpe’a noa i te reira ’e ’ia ha’apūai ho’i. Mai tā te misiōnare tāta’itahi i ’ite, ’ia fa’aea ’oe i te ta’ahi i te pereo’o, e topa ’oe, ’oia ïa ’ia fa’aea ’oe i te fa’a’amu i tō ’outou ’itera’a pāpū, e paruparu ’oe. E au ato’a teie parau tumu i te tātarahapara’a—e ’imira’a nō te orara’a tā’āto’a, ’eiaha te hō’ē noa taime i roto i te orara’a.

Ia ’outou pā’āto’a e ’imi nei i te fa’a’orera’a hara—te feiā ’āpī, te feiā ’āpī pa’ari, te metua, te metua rū’au ’e ’oia ato’a te tupuna—tē ani nei au ia ’outou ’ia ho’i mai i te fare. I teienei e ha’amata ai. ’Eiaha e fa’atāere i te mahana o tō ’outou tātarahapara’a.¹³

’E ’ia rave ’outou i te reira fa’aotira’a, ’a tāmau noa i ni’a i te ’ē’a. Tē tīa’i noa ra tō tātou Metua, tē tīa’i māoro nei e fāri’i ia ’outou.¹⁴ Tera rā, e mau‘ara’a maita’i te tauto’ora’a.

’A ha’amana’o i teie mau parau a Nephi : « ’Ia haere ti’a atu ’outou i mua i te ti’a-māite-ra’a i te Mesia, ma te tīa’i pāpū roa, ’e te here i te Atua ’e te ta’ata ato’a. E tēnāna, ’ia haere ti’a ’outou i mua ma te ’oa’oa i te ’ite i te parau a te Mesia, ma te tāpe’a ho’i ē tae noa atu i te hope’a ra, inaha, tē nā ’ō mai ra te Metua, E ora mure ’ore tō ’outou i reira ra ».¹⁵

I te tahi taime, mai te huru e mea roa te tere—e hi’o pa’i tātou, e tere teie i te ora mure ’ore. E nehenehe rā e riro ’ei tere ’oa’oa mai te mea e haere tātou i te reira ma te fa’aro’o ia Iesu Mesia ’e ma te tīa’i i tāna tāra’ehara. Tē fa’a’ite pāpū nei au ē, i te taime e tu’u tātou i te ’āvae i ni’a i te ’ē’a nō te tātarahapara’a, tē tītau ra ïa tātou i te mana fa’aora o te Fa’aora i roto i tō tātou orara’a. E fa’a’eta’eta te reira mana i tō tātou ’āvae, e fa’aātea ā i tā tātou hi’ora’a ’e e fa’ahōhonu ho’i i tā tātou fa’aotira’a e haere ā i mua, hō’ē ta’ahira’a i muri i te tahi ē tae i terā mahana hanahana ra e ho’i ai tātou i tō tātou fare i te ra’i ’e e fa’aro’o tātou i te Metua i te Ao ra i te nā ’ō mai ē : « ’Ua ti’a roa ».¹⁶ I te i‘oa o Iesu Mesia, amene.