’A ’imi na ’outou nō roto i te mau buka maita’i a’e

Nā Elder Ian S. Ardern

Nō te Hitu Ahuru

Mai te mea ē, e tuatāpapa tātou i te mau buka maita’i a’e, e pāruru ïa tātou ia tātou iho i te mau ta’a ri’ari’a e ’imi nei ’ia amu i tō tātou mau a’a vārua.

I te hō’ē po’ipo’i, ’ua ’ite au i te hō’ē hape pupuni maita’i i ni’a i te hō’ē uru tiare rōti. Ia hi’o-ana’e-hia te tahi mau ’ōteo ’āita e rao’ere fa’ahou, e mea māramarama roa ’ia ’ite ē, ’ua amuamu ’oia i te mau rao’ere marū i tōna vaha ri’ari’a. Ei fa’ahōho’ara’a, te feruri nei au ē, te vai nei e rave rahi ta’ata mai teie hape; e ’itehia rātou nā te ao ato’a nei, e nō te ’aravihi te tahi pae o rātou i te fa’ahuru’e ia rātou, e riro tātou i te vaiiho ia rātou ’ia tomo i roto i tō tātou orara’a, e nā mua a’e a ’ite ai tātou i te reira, ’ua amuhia e rātou tō tātou mau a’a pae vārua e tō te mau melo ato’a ’o tō tātou ’utuāfare e ’o tō tātou mau hoa.

Te ora nei tātou i te hō’ē ’anotau tei ’ī roa i te ha’amāramaramara’a hape nō ni’a i tō tātou mau ti’aturira’a. I te mau taime mai teie te huru, ’ia ’ore ana’e tātou e pāruru maita’i ’e e fa’ahōhonu i tō tātou mau a’a pae vārua, ’ua riro ïa ’ei anira’a ’ia amuhia rātou nā te feiā e ’imi nei e ha’amou i tō tātou fa’aro’o i roto i te Mesia e i tō tātou ti’aturira’a i roto i Tāna ’Ēkālesia i fa’aho’i-fa’ahou-hia mai. I te anotau o te Buka a Moromona, ’o Zezeroma tei ’imi ’ia ha’amou i te fa’aro’o o te feiā fa’aro’o ra.

’Ua riro tāna mau ’ōhipa ’e te mau parau ’ei « marei o te enemi i tu’uhia e ana ’ia noa’a [te] ta’ata, ’ia fa’aauraro ’oia ’ia [ratou] iāna, e ’ia ha’a’ati ho’i ’oia ’ia [rātou] i tāna ra mau fifi » (Alama 12:6). Te vai ato’a nei te reira mau marei i teie mahana, e mai te mea ē, ’ē’ita tātou e ara i te pae vārua, e ’ē’ita e patu i te hō’ē niu pāpū i ni’a i tō tātou Fa’aora (hi’o Helamana 5:12), e riro tātou i te ha’a’atihia i te mau fifi a Sātane e ’ia arata’i-māite-’ē-hia i ni’a i te mau purumu ’ōpanihia i fa’ahitihia i roto i te Buka a Moromona (hi’o 1 Nephi 8:28).

’Ua hōro’a mai te ’āpōsetolo Paulo i te hō’ē fa’aarara’a i tōna ra anotau tei au ato’a nō tō tātou nei anotau : « ’Ua ’ite ho’i au … e ti’a mai ho’i te ta’ata i roto ia ’outou iho, e parau mai i te parau pi’o, ’ia pe’ehia rātou ’e te pipi » (’Ohipa 20:29-30).

Te fa’aha’amana’o mai nei tāna fa’aarara’a e tā tō tātou mau peropheta ’e te mau ’āpōsetolo ē, tītauhia ia tātou ’ia ’imi i te mau rāve’a ato’a ’ia fa’aitoito ia tātou i te pae vārua i mua i te mau parau pāto’i ’e te ha’aparuparu. Ia haere ana’e au e fārerei i te mau paroisa ’e te mau titi o te ’Ēkālesia, e fa’ateiteihia vau nā roto i te mau mea tā’u e ’ite, e fa’aro’o ’e e putapū ’a pāhono ai te Feiā Mo’a ma te pāpū ’e ma te ha’apa’o maita’i i te mau ha’api’ira’a a te Fa’aora ’e a Tōna mau tāvini.

’Ua riro te mara’ara’a o te ha’apa’ora’a i te Mahana Sābati ’ei hō’ē hi’ora’a nō te fa’aitoitora’a te mau melo ia rātou iho i te pae vārua nā roto i te ha’apa’ora’a i te mau anira’a a te peropheta. Te ’ite-atoa-hia nei te reira pūaira’a i roto i te mara’ara’a o te ’ōhipa nō te hiero e nō te ’ā’amu ’utuāfare a ha’aputuputu ai te mau ’utuāfare i tō rātou mau tupuna nā roto i te mau ’ōro’a hiero.E hōhonu atu ā tō tātou mau a’a pae vārua mai te mea ē, e riro te mau pure ’ā’au tae nō te ta’ata iho e nō te ’utuāfare ’ei mau turu nō tō tātou fa’aro’o, ’e mai te mea e tātarahapa tātou i te mau mahana ato’a, mai te mea ē, e ’imi tātou i te auhoara’a o te Vārua Maita’i, e mai te mea ē, e ha’api’i mai tatou nō ni’a i tō tātou Fa’aora e i Tōna huru, e ’ia rohi nō te riro mai mai Iāna te huru (3 Nephi 27:27).

’O tō tātou Fa’aora, ’o Iesu Mesia, te māramarama o teie nei ao, ’e te ani manihini mai nei ’Oia ia tātou ’ia pe’e Iāna. E ti’a ia tātou ’ia hi’o Iāna i te mau taime ato’a, ’e i te taime hoa rā ’a tupu mai ai te mau pō pōiri ’e te vero, te vero nō te mana’o tapitapi ’e te pāpū ’ore.E mai te mea ē, « i terā pae mai o te anavai ra, ’e te vai noa a’era taua fare ra » (1 Nephi 8:26 te toro maira te mau manimani rima i ni’a ia ’outou nō te fa’ao’ō’o mai, nō te fa’aha’eha’a mai e nō te ti’aoro mai, te ani atu nei au ia ’outou ’ia fāriu ’oi’oi ’ē atu, ’ia ’ore ’outou ’ia fati i raro a’e i te mau rāve’a fa’atianiani ’e te ha’avare nō te fa’ata’a’ē ia ’outou iho i te mau parau mau e i tōna mau ha’amaita’ira’a.

E’ita rā te reira e nava’i i tō tātou nei anotau, inaha, tē parauhia nei, tē pāpa’ihia nei ’e tē fa’ahōho’a-roa-hia nei te mau mea faufau. ’Ua ha’api’i mai Elder Robert D. Hales ia tātou ē, « Mai te mea ē, ’āita ’outou i fafau hope roa ’ia ora i te ’evanelia—’ia ora i te reira ma ‘tō ’outou ’ā’au ato’a, te mana’o ato’a, ’e te pūai ato’a’—’ē’ita e ti’a ia ’outou ’ia fa’atupu i te māramarama vārua e nava’i nō te tūra’i ē atu i te poiri » (« I rāpae i te pōiri i roto i Tōna māramarama nehenehe », Liahona, Tiurai 2002, 78). Pāpū ē, tō tātou hina’aro ’ia pe’e i te Mesia, te māramarama o teie nei ao (a hi’o Ioane 8:12), tōna aura’a ra, tītauhia ia tātou ’ia fa’a’ōhipa i Tāna mau ha’api’ira’a. E pūaihia tātou i te pae vārua, e itoitohia, ’e e pāruruhia mai te mea ē, e fa’a’ōhipa tātou i te parau a te Atua.

Rahi noa atu te māramarama i roto i tō tātou orara’a, iti noa ato’a atu te maru. Terā rā, noa atu te pūai o te māramarama, tei mua tātou i te mau ta’ata e i te mau tau’ara’a parau o te fa’ahuru’e i tō tātou mau ti’aturira’a e o te tāmata i tō tātou fa’aro’o. ’Ua pāpa’i te ’āpōsetolo Iakobo ē, « Nā taua tāmatara’a ra i tō ’outou fa’aro’o ra e fa’atupu i te fa’a’oroma’i tamau » (Iakobo 1:3). Ia au i teie mana’o, ’ua ha’api’i mai Elder Neal A. Maxwell ē, « hō’ē pipi fa’a’oroma’i … ’ē’ita ’oia e hitimahuta, ’ē’ita ato’a e mou mai te mea ē, ’ua parau-hape-noa-hia nō ni’a i te ’Ēkālesia » (« Fa’a’oroma’i Purera’a nō Brigham Young University, 27 nō Novema 1979], speeches.byu.edu).

E hiti mai te mau uiuira’a nō ni’a i te ’ā’amu ’e te mau ti’aturira’a o te ’Ēkālesia. E tītauhia ia tātou ’ia ha’apa’o maita’i i hea tātou e fāriu ai nō te ’imi i te mau pāhonora’a maita’i. ’Āita hō’ē mea e noa’a mai nā roto i te tītorotorora’a i te hi’ora’a ’e te mana’o o te feiā e mea iti te ’ite e ’aore rā te feiā māuruuru ’ore. Nā te ’āpōsetolo Iakobo i hōro’a mai i te a’o maita’i a’e : « Te ’ere ra rā te hō’ē ’o ’outou i te ’ite, e ani ’oia i te Atua ra » (Iakobo 1:5).

Tītauhia te tuatāpapara’a maita’i hou a ani ai i te Atua, nō te mea, tei raro a’e tātou i te fa’auera’a mana ’ia tuatāpapa « A ’imi nā ’outou nō roto i te mau buka maita’i a’e i te mau parau nō te pa’ari » ’e ’ia « ’imi ho’i i te ’ite, ’oia ïa nā roto ho’i i te ha’api’i e nā roto ato’a i te fa’aro’o » (PH&PF 88:118). E ’auhune tao’a rahi tō teie mau buka, tei pāpa’ihia ’e te feiā fa’atere o te ’Ēkālesia, e mau aivana’a nō te parau ha’api’ira’a, tei ’itehia, te pāpū ’e te ti’aturihia. Noa atu rā i te reira, ’aore hō’ē ta’ata e nā ni’a a’e i te hanahana o te parau a te Atua i hehēuhia mai i roto i te mau pāpa’ira’a mo’a. Mai roto mai i taua mau api rairai ra, tei me’ume’u rā i te mau mana’o pae vārua, te ha’api’i mai nei tātou i te parau mau nā roto i te Vārua Maita’i e ’ua fa’arahi te reira i tō tātou māramarama.

’Ua tāparu te peresideni Thomas S. Monson ia tātou « ’ia tuatāpapa ’e ’ia feruri hōhonu nā roto i te pure, i te Buka a Moromona i te mau mahana ato’a ». (« Te pūai o te Buka a Moromona », Liahona, Mē 2017, 87).

E rave rahi matahiti i ma’iri a’e nei, a tāvini ai au ’ei peresideni nō te misioni nō Fiji Suva, ’ua fāri’i te tahi mau misionare i te hō’ē ’itera’a o tei ha’apūai i roto ia rātou te mana fa’afāriu o te Buka a Moromona. I te hō’ē mahana ve’ave’a ’e te haumi, ’ua tae mai e piti ’orometua i te fare i roto i te hō’ē pupu iti i Labasa.

E ta’ata ruhiruhia tei pāhono mai i te pātotora’a i ni’a i te ’ōpani, ’e ’ua fa’aro’o māite ’a fa’a’ite ai nā misionare i te ’itera’a pāpū nō ni’a i te parau mau o te Buka a Moromona. ’Ua hōro’a rāua i te hō’ē buka e ’ua ani manihini iāna ’ia tāi’o ’e ’ia pure nō te ’ite, mai ia rāua ē, e parau teie nā te Atua. E mea poto roa tāna pāhonora’a : « Ananahi e ho’i au e tāi’a. E tāi’o vau i te reira i ni’a i te moana, ’e ’ia ho’i mai au, e ti’a ia ’ōrua ’ia haere fa’ahou mai e fārerei iā’u ».

A reva atu ai oia, ’ua tupu te tauiuira’a misionare, ’e tau hepetoma i muri iho, ’ua ho’i e piti nā misionare ’āpī e fārerei i te ta’ata tāi’a. I taua taime ra, ’ua hope iāna i te tāi’o i te Buka a Moromona, ’ua fāri’i i te ha’apāpūra’a nō tōna ti’a mau, ’e ’ua hina’aro mau ’oia ’ia ’ite atu ā.

Nā te Vārua Maita’i i fa’afāriu i teie ta’ata, tei ’ite i te parau mau o te mau parau faufa’a rahi i ni’a i te api tāta’itahi o te mau ’ōhipa i tupu e o te ha’api’ira’a tumu i ha’api’ihia e rā ē te tau, e ’ua fa’ahereherehia nō tō tātou nei anotau, i roto i te Buka a Moromona. E roa’a ato’a teie ha’amaita’ira’a ’ia tatou tata’itahi.

’Ua riro te fare ei vāhi fa’ahiahia nō te mau ’utuāfare ’ia tuatāpapa e ’ia fa’a’ite i te mau mana’o faufa’a nō roto mai i te mau pāpa’ira’a mo’a, te mau parau a te mau peropheta ora, e ’ia roa’a mai te mau materia a te ’Ēkālesia i ni’a i te LDS.org. E ’iteahia ia ’outou i reira te mau ha’amāramaramara’a e rave rahi nō ni’a i te mau tumu parau o te ’evanelia mai te mau ’ā’amu nō te Orama Mātāmua. Mai te mea ē, e tuatāpapa tātou i te mau buka maita’i a’e, e pāruru ïa tātou ia tātou iho i te mau ta’a ri’ari’a e ’imi nei ’ia amu i tō tātou mau a’a vārua.

Nā roto i tā tātou pure, ’e te ferurira’a hōhonu, e riro te tahi mau uira’a i te vai noa ā ’ei mau uira’a tei tītau ’ia pāhonohia, eiaha rā tātou e vaiiho i te reira ’ia ha’amou i te ama o te fa’aro’o e tupu ra i te rahi i roto ia tātou. Teie mau uira’a, e anira’a manihini ïa ’ia patu i tō tātou fa’aro’o, e eiaha te reira ’ia fa’a’amu i te hō’ē taime tapitapi. ’O te huru mau ïa o te ha’apa’ora’a, ’oia ho’i, ’āita e pāhonora’a pāpū i te mau huru uira’a ato’a, i te mea ē, o te hō’ē teie tumu o te fa’aro’o. Nō reira, ’ua ha’api’i mai Elder Jeffrey R. Holland ia tātou ē, « ’ia tae mai taua huru taime ra, ’e ’ia tupu mai te mau fifi ’e ’āitā ho’i i ’itehia te mau rave’a, a tāpe’a māite i ni’a i te mau mea tā ’outou i ’ite a’e na, ’e ‘a vai pāpū noa e tae atu i te taime e tae mai ai te ’ite ’āpī », « Lord, I Believeaore rā », Liahona, Mē 2013, 94).

Te ’ite nei tātou ’ati a’e ia tātou, i te ’oa’oa o te mau ta’ata e rave rahi ’o tē ti’a pāpū nei nā roto i te fa’a’amu-tāmau-ra’a i tō rātou mau a’a vārua. ’Ua nava’i tō rātou fa’aro’o e tō rātou ha’apa’o nō te hōro’a ia rātou i te fa’aro’o rahi i roto i tō rātou Fa’aora, e nā roto i te reira, e tae mai te poupou rahi. ’Āita rātou e parau nei ē, ’ua ’ite rātou i te mau mea ato’a, terā rā, ’ua aufau rātou i te ho’o ’ia nava’i te ’ite nō te fāri’i i te hau ’e nō te ora ma te fa’a’oroma’i, ’a ’imi noa ai i te ’ite hau atu. Te a’o nā ni’a iho i te a’o, ’ua tīmāhia tō rātou fa’aro’o i roto i te Mesia, ’e tē ti’a nei rātou ma te pa’ari ’ei feiā ai’a i pīha’i iho i te Feiā Mo’a.

E mata na tātou i te ora ’ia ’ore ’ia ’itehia te hō’ē vāhi nō te vaha ri’ari’a o te mau hape pupuni, eiaha i teie nei, eiaha ho’i a muri noa atu, i roto i tō tātou orara’a, ’ia ti’a ia tātou ’ia « tāmau māite … i te fa’aro’o ’ia Iesu ra e tae noa atu i te hōpe’a ra » (Alama 27:2). I te i‘oa o Iesu Mesia, amene.