ʼUa faʼaea ānei te mahana o te mau temeio ?

Nā Elder Donald L. Hallstrom

Nō te Hitu ’Ahuru

E tiʼa ’ia faʼatumuhia tā tātou fā hopeʼa roa i niʼa i te mau temeio vārua e vai nei i te mau tamariʼi atoʼa a te Atua.

Hōʼē matahiti i maʼiri aʼenei, i roto i te hōʼē tere ʼohipa i te tufaʼa fenua nō California, ʼua haere au ʼe te hōʼē peresideni titi e fārerei ia Clark ’e Hollly Fales ʼe tō rāua ʼutuāfare i tō rātou fare. ʼUa parauhia mai iāʼu ē ’ua fāriʼi iho nei rāua i te hōʼē temeio. I tō māua taeraʼa atu, ʼua fifi ʼo Clark i te tiʼa mai nō te fāriʼi ia māua nō te mea tē ʼahu ra ʼoia i te hōʼē hātua tāpeʼa tua, te hōʼē hātua tāpeʼa ʼaʼī ʼe te mau hātua tāpeʼa rima.

E piti noa ʼāvaʼe nā mua atu, ʼua tere atu ’o Clark, tāna tamaiti ’o Ty, ʼe fātata 30 atu feiā ʼāpī ʼe feiā faʼatere nō te hōʼē faʼanahoraʼa titi, e paʼumaraʼa i niʼa i te tupuaʼi mouʼa nō te Mouʼa Shasta, e 4 322 mētera te teitei, te hōʼē ïa o te mau mouʼa teitei roa aʼe i California. I te piti o te mahana o te paʼumaraʼa fifi, ’ua tae atu te rahiraʼa o te mau taʼata paʼuma i niʼa i te upoʼo mouʼa—te hōʼē ʼohipa tei noaʼahia i te rave maoti te mau ʼāvaʼe faʼaineineraʼa.

Te hōʼē ʼo te mau taʼata mātamua i niʼa i te upoʼo mouʼa i taua mahana ra ʼo Clark ïa. I muri aʼe i te hōʼē faʼafaʼaearaʼa poto i te hiti o te upoʼo mouʼa, ’ua tiʼa ʼoia ’e ’ua haʼamata i te haere. ’A nā reira ai ʼoia, ʼua turori ʼe ’ua marua atu ʼoia nā te tua nā niʼa atu i te hiti o te hōʼē paʼipaʼi mato, fātata e 12 mētera te teitei ʼe ’ua heʼe atu e 91 mētera i raro nā niʼa i te hōʼē tuaʼāivi tei paʼari i te hiona. Te mea faʼahiahia, ’ua ora mai ʼo Clark ’e ’ua pēpē-’ino-roa rā ʼoia ʼe ʼaita i nehenehe iāna ’ia hāʼutiʼuti.

ʼO te haʼamataraʼa noa ïa o te mau temeio tā Clark i ʼite i roto i teie ’ati rahi. « ’Aua’a a’e » te tahi o te mau taʼata mātāmua tei tae atu iāna ra, ʼo te hōʼē ïa pupu taʼata paʼuma tei roto ia rātou te mau ārai faʼaʼora nō te mouʼa ʼe te mau taote nō te rapaʼauraʼa rū. ʼUa rapaʼau ʼoiʼoi rātou ia Clark nō tōna maruaraʼa ʼe ’ua hōroʼa atu i te ʼahu ’ia vai māhanahana noa ʼoia. « ’Aua’a a’e » tē tāmatamata atoʼa ra hoʼi teie pupu i te hōʼē taoʼa ʼāpī nō te paraparauraʼa ʼe ’ua hāpono atu i te hōʼē aniraʼa rū i te tauturu mai teie atu vāhi ’aita te mau niuniu paraparau taʼitaʼi e haru. ’Ua tono-ʼoiʼoi-hia atu te hōʼē manureva tautau nā te reva naʼinaʼi i te Mouʼa Shasta, hōʼē hora i te ātea. I muri aʼe e piti tāmataraʼa ataata ʼe te manuia ʼore ’ia tau i te hōʼē vāhi teitei e fifi roa hoʼi nō temanureva i te tau atu, ʼe i muri aʼe i te ʼaroraʼa i te mau huru ataata o te mataʼi, ’ua haʼamata te pairati i te toru ʼe te hopeʼa o te tāmataraʼa. ʼA haʼafātata atu ai te manureva tautau nā te reva mai te tahi ’ē atu vāhi, « ’aua’a a’e » ’ua taui te mataʼi ’e ’ua tau te manureva tautau ’ia nehenehe i te pupu ’ia tuʼu ʼoiʼoi atu ia Clark i roto i te vāhi naʼinaʼi i muri noa mai i te pārahiraʼa o te pairati.

I tō Clark hiʼopoʼaraʼahia iroto i te hōʼe fare nō te feiā pēpē, ’ua faʼaʼite mai te mau hiʼopoʼaraʼa ē e rave rahi tōna mau vāhi fatifati i tōna ʼaʼī, tōna tua, te mau ivi ʼaoʼao, ʼe te mau fatiraʼa rima ; te hōʼē māhāhā tei puta ; ʼe e rave rahi mau mutu ʼe mau pēpē. « ’Aua’a a’e » tē rave ra te hōʼē taote pēpē nēreve (neuro) i te ʼohipa i taua mahana ra ; i te tahi noa ho’i mau taime i te matahiti ’oia i te fare ma’i. ʼUa parau mai te taote i muri mai ē ʼaita ā ʼoia i ʼite i te hōʼē taʼata tei pēpē rahi i te puo ivi tuamo’o ʼe te mau aratere ʼarapoʼa ʼo tei ora mai. ʼAita ʼo Clark i manaʼohia ē e ora mai ʼe ’ia hoʼi faʼahou mai te huru mātāmua ra. E hōʼē taʼata tei ʼore i tiʼaturi ē tē vai nei te hōʼē Atua, ’ua parau te taote tāpū ē ʼaita te huru o Clark e tūʼati ra i te mau haʼapiʼraʼa atoʼa a te mau ʼaivānaʼa nō niʼa i te mau pēpē nēreve ʼe e nehenehe te huru o Clark e faʼarirohia ’ei temeio.

I muri aʼe i tō Clark ʼe Holly faʼatiʼaraʼa i teie ʼāʼamu pūai, ʼaita i noaʼa iāʼu i te paraparau. E ʼere nō te mau temeio noa tei ʼitehia, nō te hōʼē rā temeio rahi aʼe. ʼUa fāriʼi au i te hōʼē faʼaʼiteraʼa hōhonu—te hōʼē faʼaʼiteraʼa a te Vārua ē—e faʼaroʼo rahi mau tō Holly ʼe tō teie nā tamariʼi nehenehe e pae tei pārahi i roto i te piha faʼaearaʼa i pīhaʼi iho i tō rātou mau metua, ’e ’āhani noa atu e fa’ahope’ara’a ’ē i taua mahana ra, e fāriʼi ïa rātou ʼe e tāmau noa rātou i te tupu i te pae vārua. Tei ’ō nei i rotopū ia tātou i te pū ’āmuira’a nei ʼo Clark ’e Holly ʼe tā rāua nā tamariʼi paʼari a’e, ’o Ty ’e ’o Porter.

Nā roto i te feruri-hōhonu-raʼa i te ʼohipa i tupu nō te ʼutuāfare Fales, ’ua feruri rahi au i te huru oraraʼa o te tahi atu mau ʼutuāfare e rave rahi. E aha ïa te parau nō te Feiā Moʼa tei ʼī i te faʼaroʼo, tei fāriʼi i te hōʼē haʼamaitaʼiraʼa autahuʼaraʼa, tei fāriʼi i te mau pure tei pūpū-tāmau-noa-hia nō rātou, tei haʼapaʼo i tā rātou mau fafauraʼa ʼe tei ’ī i te tiʼaturiraʼa ʼe ʼaita roa aʼe e temeio tei tupu ? I tā rātou a’e hi’ora’a i te hōʼē temeio. I te huru a’e ’a fāriʼi ai vetahi ’ē i te mau temeio.

ʼE te feia ʼe māuiui nei i te mau ’ati teimaha—i te pae tino ānei, i te pae feruriraʼa, i te pae manava—e rave rahi matahiti ’e ’ahurura’a matahiti ʼaore rā i te tāʼātoʼaraʼa o tō rātou oraraʼa tāhuti nei ? ʼE te mau taʼata tei pohe i tō rātou ra ʼāpī-roa-raʼa ?

E piti noa iho ʼāvaʼe i mairi aʼenei, e piti tāne ʼe tā rāua vāhine faʼaipoipo tei mau i te parau faʼatiʼa nō te hiero, ʼe e toru tamariʼi misiōnare rave tāmau ʼe e pae atu tamariʼi i rotopū ia rātou, tei paʼuma i roto i te hōʼē manureva naʼinaʼi nō te hōʼē tere poto noa. Tē tiʼaturi nei au ē ’ua pure rātou ’ia pāruruhia rātou hou te revaraʼa ʼe ’ua pure ’ūʼana rātou ’a fārerei ai tō rātou manureva i te fifi mātini hou ’a perehī atu ai. ʼAore roa te hōʼē i ora mai. E aha ïa tō rātou parau ?

E tumu ānei tō te mau taʼata maitaʼi ʼe tō rātou mau fētiʼi here ’ia ui i te uiraʼa tei uihia e Moromona : « ʼUa faʼaea ānei te mahana o te mau temeio ? »¹

Eʼita e nehenehe i tōʼu ʼite iti e tātara nō te aha i te tahi mau taime tē vai nei te tautururaʼa a tō te raʼi ʼe i te tahi atu mau taime ʼaita e tautururaʼa. Penei aʼe rā tē ʼere nei tātou i te māramaramara’a e aha mau te hōʼē temeio.

E mea pinepine tātou i te parau i te hōʼē temeio ’ei faʼaorara’a ʼaore hoʼi e tātararaʼa a te mau ʼaivānaʼa ʼaore rā ’ei ʼaperaʼa i te ʼati pohe nā roto i te faʼaroʼoraʼa i te hōʼē faʼa’araraʼa pāpū. E riro rā te tātararaʼa i te temeio mai « te hōʼē ʼohipa maitaʼi tei tupu nā roto i te mana o te raʼi e ʼore e māramaramahia e te taʼata »² i te hōro’a i te hōʼē hiʼoraʼa ʼāʼano nō niʼa i te mau mea nātura mure ʼore a’e. E faʼatiʼa atoʼa teie tātararaʼa ia tātou ’ia feruri hōhonu i te ʼohipa faufaʼa rahi a te faʼaroʼo i te fāriʼiraʼa i te hōʼē temeio.

’Ua haʼapiʼi Moroni : « ’E i te mau tau atoʼa ʼaore roa te taʼata i rave i te temeio ē ’ia tupu tō rātou faʼaroʼo ».³ ’Ua poro ’o Amona : « ʼE ʼua nā reira te Atua i te faʼaineine i te hōʼē rāveʼa e tiʼa ai i te taʼata ’ia rave i te mau temeio rarahi nā roto i te faʼaroʼo ».⁴ ʼUa heheu mai te Fatu ia Iosepha Semita : « Nō te mea ʼo vau nei te Atua … ʼe e faʼaʼite atu vau i te mau temeio … ia rātou atoʼa ʼo te faʼaroʼo i tōʼu nei iʼoa ».⁵

ʼUa ani te ariʼi Nebukanesa ē ’ia haʼamori ʼo Sadaraka, ʼe Meseka, ’e Abede-nego i te hōhoʼa ʼauro tāna i hāmani ʼei atua, mā te faʼariʼariʼa atu, « ’ia ʼore rā ʼoutou ’ia haʼamori ra, e hurihia ïa ’outou i roto i te umu auahi ʼura ra ». ’Ei reira ma te huru faʼaahaaha riʼi ’ua ani atura : « ʼE ʼo vai te Atua e faʼaora ia ʼoutou i tō’u nei rima ? »⁶

ʼUa pāhono atu teie nā pipi itoito e toru : « ’Ia hinaʼaro ʼoia iho, e tiʼa ïa i tō mātou Atua e haʼamori nei ’ia faʼaora ʼoia ia mātou i te umu auahi ʼura ra… ’Ia ʼore rā ʼoia ’ia hinaʼaro, e ʼore ā mātou e haʼamori i tō ’oe ra mau atua ».⁷

ʼUa tiʼaturi mau rātou ē e nehenehe tā te Atua e faʼaora ia rātou, « ʼia ’ore rā », e faʼaroʼo hope tō rātou i tāna ʼōpuaraʼa.

Mai te reira atoʼa, ’ua ani Elder David A. Bednar i te hōʼē taime i te hōʼē taureʼareʼa tāne tei ani i te hōʼē haʼamaitaiʼraʼa autahuʼaraʼa, « Mai te mea e hinaʼaro nō tō tātou Metua i te Ao ra ’ia ʼāfaʼihia atu ʼoe nā roto i te pohe i tō ʼoe ʼāpīraʼa ra i te ao vārua nō te rave i tā ʼoe tāviniraʼa, e faʼaroʼo ānei tō ʼoe ’ia auraro i tōna hinaʼaro ē ’ia ʼore ʼoe e faʼaorahia ? »⁸ E faʼaroʼo ānei tō tātou « ’ia ʼore tātou ’ia faʼaorahia » i tō tātou mau ʼati tāhuti nei ’ia nehenehe ia tātou ’ia faʼaorahia ē a muri noa atu ?

Teie ïa te hōʼē uiraʼa fifi ’ia feruri « I hea tātou e tuʼu nei i tō tātou faʼaroʼo ? » ’Ua faʼatumuhia ānei tō tātou faʼaroʼo i niʼa i te hinaʼaro noa ē ’ia ʼīritihia te māuiui ʼe te ʼoto, ʼaore rā ʼua haʼamau-pāpū-hia ānei i niʼa i te Atua te Metua ʼe i tāna ʼōpuaraʼa moʼa ’e ia Iesu te Mesia ʼe tāna tāraʼehara ? Te faʼaroʼo i te Metua ʼe i te Tamaiti, e faʼatiʼa ïa te reira ia tātou ’ia māramarama ʼe ’ia fāriʼi i tō rāua hinaʼaro ʼa faʼaineine ai tātou nō te tau mure ’ore.

Tē faʼaʼite nei au i teie mahana i tōʼu ʼiteraʼa pāpū nō niʼa i te mau temeio. Te riroraʼa ʼei tamariʼi nā te Atua e temeio ïa.⁹ Te fāriʼiraʼa i te hōʼē tino ’ia au i tōna ra hōhoʼa ʼe te huru e temeio ïa.¹⁰ Te hōroʼaraʼa o te hōʼē Faʼaora e temeio ïa.¹¹ Te tāraʼehara a Iesu Mesia e temeio ïa.¹² Te noaʼaraʼa te ora mure ʼore e temeio ïa.¹³

Noa atu ē e mea maitaʼi ’ia pure ʼe ’ia haʼa ’ia pāruruhia ’e ’ia faʼaorahia tātou i te pae tino i roto i tō tātou oraraʼa tāhuti nei, e tiʼa i tā tātou fā hopeʼa roa ’ia faʼatumuhia i niʼa i te mau temeio vārua e vai nei nō te mau tamariʼi atoʼa a te Atua. Noa atu e aha tō tātou ʼiri, noa atu e aha tō tatou tiʼaraʼa pātireia, noa atu e aha te mea tā tātou i rave mai te mea ʼua tātarahapa tātou, noa atu e aha te mea tei ravehia i niʼa ia tātou—e noaʼa ia tātou pā’ātoʼa teie mau temeio. Tē ora nei tātou i te hōʼē temeio, ʼe tē vai ra ā te mau temeio i mua ia tātou. I te i’oa o Iesu Mesia, ’āmene.