Mga Tingog sa mga Santos sa Ulahing mga Adlaw
Mga Tubag sa mga Pag-ampo sa Usag Usa
Paghulagway pinaagi ni Allen Garns
Hapit na mahuman ang akong misyon didto sa Illinois Chicago South Mission sa dihang nakadawat ko og espesyal nga pagtugot sa pagbisita sa miaging area ug manihapon uban sa pamilyang Tremillo. Nakaserbisyo ko sa ilang ward sulod sa usa ka tuig ug nasuod ngadto nila.
Atol sa panihapon si Brother Tremillo miawhag nako sa pagpakigbahin og bisan usa ka mensahe sa kalipay sa akong pagpauli. Mingon siya nga ang Ginoo mobutang og usa ka tawo sa akong biyahe nga magkinahanglan sa akong tabang. Misaad ko niya mga ako motabang.
Gikan nianang higayuna hangtud sa panahon nga mibiya ko sa Chicago, nag-ampo usab ako nga makadawat og kumpirmasyon nga ang Ginoo modawat sa akong sakripisyo sa pagserbisyo og misyon.
Paglabay sa tulo ka semana, misakay ko sa eroplano nga modala nako sa pagpauli. Sa akong pagduol sa akong lingkuranan, ang tawo sa sunod lingkuranan mitan-aw. “Dili ni tinuod!” miingon siya. “Dili ako makatuo niini!
Ang una nakong nahunahuna mao, “Maayo, nasilag siya sa mga Mormon!” Sa akong paglingkod, misulti siya nako nga ang iyang ngalan mao si Kelly ug nga siya bag-ong kinabig. Mipadayag siya sa iyang kalipay nga usa ka misyonaryo naglingkod tupad niya. Misulti si Kelly nako nga ang katapusan nga tawo nga iyang gikatupad usa ka anti-Mormon ug dili mabination sa iyang pagpadayag sa iyang opinyon sa bag-ong nakaplagan nga tinuohan ni Kelly. Nahasol si Kelly ug dunay mga pangutana. Nag-ampo siya alang sa mga tubag ug kahupayan.
Nag-ampo ko sa akong kasingkasing ug mipamatuod sa kamatuoran sa ebanghelyo ug sa gugma sa Dios alang sa Iyang mga anak, lakip na kaniya. Gisultihan nako siya sa tambag nga akong nadawat gikan ni Brother Tremillo. Miingon ko nga ang Dios miandam niining espesyal nga higayon alang lang kaniya.
Uban sa mga luha sa iyang mga mata, nagpasalamat si Kelly kanako. Miingon usab siya, “Makasulti ko nga ikaw usa ka maayong misyonaryo ug nga ang Ginoo midawat sa imong sakripisyo.” Nianang higayona akong nabati ang dakong gugma sa Dios kanako. Ako na usab ang mihilak. Uban sa mga luha sa akong mga mata, nagpasalamat ko ni Kelly ug misulti kaniya nga siya ang tubag sa akong pag-ampo. Gitubag nako ang dugang pipila niya nga mga pangutana, ug nagbinaloay kami og email addresses.
Miabut na ang among eroplano ug nanamilit kami sa usag usa sa iyang paglakaw padulong sa iyang sunod nga biyahe. Kanunay akong mapasalamaton nga ang Langitnong Amahan andam nga mopanalangin kanato sa malumong paagi.