Tan-aw ug Mabuhi

Ni Elder W. Mark Bassett

Sa Seventy

Kon moduol kita ngadto sa Ginoo, makakuha kita og kanunay nga tinubdan sa espirituhanong pagbag-o.

Sa nagtubo pa ko, usa ka regular nga kalihokan sa akong pamilya ang pagdrayb sa California ug ngadto sa Utah, USA. Dili ang biyahe agi sa desierto ang among nalingawan, ang pag-abut namo sa destinasyon ug ang kalipay nga nakabisita sa mga sakop sa pamilya didto.

Ang summer sa wala pa ako mobiya para sa akong full-time nga misyon, mibiyahe na usab ako aron mobisita sa mga kabanay didto sa Utah. Apan niining higayona ang akong manghud nga lalaki nga si David ug ako lang ang nagbiyahe. Anaa pa kami sa 16 ug 18 nianang higayuna. Pirme mi mobiyahe og tag 10 ka oras uban sa among pamilya nga nakahatag ni namo og dakong pagsalig sa among abilidad sa pagbiyahe.

Gibisitahan namo ang among Tiyo Kay, Antie Dianne, ug ig-agaw nga si Michelle. Dayon, samtang si David nagpabilin, kinahanglan kong mobalik ngadto sa California nga ako ra alang sa usa ka dental appointment.

Hapit na mogabii sa dihang mibiya ko sa Spanish Fork, Utah, sa pagsugod sa gabii nga pagdrayb. Maayo ra ang tanan sa sinugdanan. Sa wala madugay mibiya ko sa highway nga padulong sa habagatan ug sa amihanan ug misubay sa dalan nga padulong sa silangan ug kasadpan. Gipasiga nako ang mga headlight ug nagdali nga mitabok sa habagatang Utah. Paghuman sa pipila ka milya ug ang kagabhion sa desierto nagkangitngit, namatikdan nako nga naglisud nako pagkakita sa dalan. Sa katapusan, naamgohan nako nga ang akong mga headlight nagkaawop. Napalong na gyud kini, ang makina wala na moandar, ug ang sakyanan mihunong sa daplin sa highway.

Ang bateriya namatay. Ang sakyanan dili na makalarga. Bisan og nagmabinantayon ko sa pagsiguro nga duna koy daghang gasolina ug nagplano gani asa ko mohunong aron magpagasolina, wala ko makaandam sa kompleto nga pagkapalong sa kuryente.

Unsa ang Alternator?

Gipadako ko sa usa ka amahan kinsa mapagarbuhon sa iyang kaugalingon nga mangunay sa pagpang-ayo sa mga sakyanan sa pamilya. Gitudloan mi niya bahin sa auto mechanics, mao nga kahibalo ko nga ang maayo nga bateriya dili mamatay samtang ang sakyanan nagdagan gawas kon dunay problema sa alternator. Ang alternator usa ka electrical generator nga mousab sa mechanical energy ngadto sa electrical energy. Naggamit kini og kinetic energy sa nag-andar nga makina aron makahimo og magnetic energy nga mahimong electric current nga padayong mo-recharge sa bateriya. Makapahimo kini sa mga headlight, radio, air conditioning, ug ubang mga electrical device sa pag-operate nga walay pagkabalda. Mapadayon usab nga moandar ang makina niini.

Karon dunay problema ang alternator sa akong sakyanan. Kinahanglan kining ilisdan o ayuhon sa dili pa ko makapadayon sa akong biyahe.

Sa panahon nga wala pay mga cell phone, ang bugtong nakong mahimo mao ang pagsugod og lakaw. Maayo gani, dunay usa ka tawo nagpasakay nako ug gidala ko sa sunod nga lungsod. Sa pay phone mitawag ko og tow truck. Naglingkod ko sa sakyanan uban sa drayber sa usa ka oras nga biyahe balik ngadto sa akong sakyanan. Dayon milingkod na usab ako pag-usab sa among pagbalik ngadto sa gamay nga lungsod nga giguyod ang akong sakyanan. Sa katapusan, upat ka oras human kong unang mibiya sa akong sakyanan, diha na ako sa sulod niini, natulog atubangan sa service station hangtud mangabli kini.

Sa dihang miabut ang manager nakakatawa siya sa ideya nga ang iyang gamay nga lungsod duna niana nga pisa nga akong gikinahanglan. Maka-order siya, apan dili kini moabut sa duha o tulo ka adlaw. Dayon nalooy siya nako. Miingon siya nga mahimong iyang i-charge ang akong bateriya sulod sa tulo ka oras. Tingali makahatag kana og igong kuryente sa pagdrayb sa sakyanan ngadto sa sunod nga lungsod. Tingali duna na silay pisa nga akong gikinahanglan.

Sa nahuman na ang pag-charge sa bateriya, milarga ko nga walay gi-on bisan unsa nga makausik sa bililhong kuryente. Nakaabut ko sa sunod nga lungsod, apan wala gihapon silay pisa nga akong gikinahanglan. Kini nga saykol nagpadayon—ang tulo ka oras nga pag-charge alang sa duha ka oras nga pagdrayb gikan sa usa ka lungsod ngadto sa sunod. Human makakita og mabination nga mga tawo sa mga lungsod nga akong naagian, sa katapusan miabut ko sa balay sa akong mga ginikanan, gikapoy human sa 30 ka oras nga biyahe apan luwas rang nakapauli.

Espirituhanon nga Mana

Adunay kapareha sa akong biyahe ug sa panaw sa mga Israelite agi sa kamingawan sa panahon sa Daang Tugon. Sulod sa 40 ka tuig ang mga Israelite kanunay nga gihatagan og pagkaon gikan sa langit nga gitawag og mana. (Tan-awa sa Exodo kapitulo 16 ug Numeros kapitulo 11.)

Sa atong panahon kita adunay susama nga panginahanglan sa pagkaon gikan sa langit, espirituhanong pagkaon. Maayo gani, makahimo kita og “espirituhanong alternator” nga “makahatag” sa “espirtuhanong mana” nga atong gikinahanglan. Tungod kay ang atong espirtuhanong mga panginahanglan maangkon pinaagi sa pagmintenar sa atong relasyon uban sa atong Amahan sa Langit ug sa Iyang Anak, nga si Jesukristo, nan sama sa mga Israelite nga gigahin ang matag adlaw sa pagpanguha og pisikal nga mana, kita karon kinahanglan nga manguha og espirituhanon nga mana pinaagi sa pag-ampo, pagtuon sa ebanghelyo, ug pagpaningkamot sa kanunay nga pakig-uban sa Espiritu Santo.

Ang mga Israelite sa kadugayan gikapoy sa pagpanguha og pisikal nga mana ug “mibatig kaibug” sa mga butang nga ilang gibiyaan (Numeros 11:4). Kon tugutan nato ang atong kaugalingon nga kapuyon sa pagpanguha sa espirituhanon nga mana, makita nato ang atong mga kaugalingon nga naghandom sa mga butang nga dili alang sa atong labing maayong espirituhanong interes. Sama sa nahigawad nga mga Israelite, girisgo nato ang pagkawala sa atong orihinal nga katuyoan—sa pag-abut ngadto sa gisaad nga yuta. Tingali naghandom kita nga wala na lang unta mobiya sa atong “Ehipto” (tan-awa sa Numeros 11:5–6). Sa katapusan, ang atong espirituhanon nga alternator mohunong sa paghatag og kuryente, ug kita dili molambo. Makita nato ang atong kaugalingon nga natanggong gigutom, ug naghandom nga maluwas.

Ang Pagkakita sa Milagro

Si Presidente Spencer W. Kimball (1895–1985) mitudlo, “Usahay dili lang kaayo nato mahatagan sa gibug-aton ang mga kasulatan tungod kay dili hingpit ang atong pagkasabut kon unsa ka talagsaon nga butang ang pag-angkon niini, ug unsa ka dako ang atong panalangin tungod kay kita aduna niini. Maingon og igo na kaayo alang kanato ang atong mga kasinatian niining kalibutan ug naanad nga maminaw lang sa ebanghelyo nga gipanudlo kanato nga lisud alang kanato ang paghunahuna nga sukad dili lang unta kana maoy himoon.”¹

Kinahanglan nga dili nato ibaliwala ang paghatag og gibug-aton sa atong panginahanglan sa kanunay nga pagtuon sa kasulatan, pag-ampo, ug pagkamasulundon tungod kay makatabang kini nato nga magpadayon ang pakig-uban sa Espiritu Santo. Kon atong ibaliwala ang mga kalihokan sa kinabuhi nga makapalig-on sa espirituhanon, gilaayan niini, o mobuhat lang nga walay pagbati, nan ang atong espirituhanong alternator wala kaayo maglihok sa hingpit. Hinay-hinay kitang mawad-an sa gahum sa espirituhanong paagi, tingali hinay kaayo nga dili nato kini mabantayan. Sa maong higayon, ang bugtong paagi nga makabawi mao ang pagduol ngadto ni Jesukristo ug maghinulsol. Pinaagi sa Pag-ula ni Jesukristo ug tinud-anay nga paghinulsol, mahimong mahibalik ang tanan.

Tan-aw ug Mabuhi

Sa dihang ang mga Israelite nagbagulbol, nawala ang ilang pasalamat sa mga panalangin sa pagkaon. Isip silot, “ug ang katawhan gipadad-an sa Ginoo og mga bitin nga mapintas ug sila nagpamahit sa katawhan ug nangamatay ang daghan nga katawhan sa Israel” (Numeros 21:6).

Sa katapusan, “ang mga katawhan ming-adto kang Moises, ug nanag-ingon, Nakasala kami tungod kay kami nagsulti batok sa Ginoo ug batok kanimo. Mag-ampo ka sa Ginoo, nga kuhaon niya kanamo kining mga bitina. Ug si Moises nag-ampo tungod sa katawhan.

“Ug ang Ginoo miingon kang Moises, Magbuhat ka og usa ka bitin nga mapintas; ug kini ibutang mo sa ibabaw sa usa ka bandila, ug mahitabo nga bisan kinsa nga pahiton, sa diha nga motan-aw niini, mabuhi siya.

“Ug si Moises nagbuhat og usa ka bitin nga tumbaga, ug gibutang niya sa ibabaw sa bandila. Ug mahitabo nga dunay bitin nga makapahit sa bisan kinsa, sa diha nga siya makatan-aw sa bitin nga tumbaga, mabuhi siya” (Numeros 21:7–9).

Moderno nga mga Bitin nga Tumbaga

Ang tumbaga nga bitin usa ka simbolo ni Kristo nga gilansang sa krus (tan-awa sa Juan 3:14–15). Sa atong pagtan-aw sa tambag sa moderno nga mga propeta, nagtan-aw kita ngadto ni Kristo tungod kay sila naggiya nato sa pagbalik ngadto sa plano sa Amahan ug ngadto sa importante nga tahas ni Jesukristo. Sama sa mabination nga mga tawo kinsa mitugot nga maka-recharge ko sa akong bateriya, ang buhi nga mga propeta, mga manalagna, ug mga tigpadayag molig-on nato sa espirituhanong pinaagi sa pagpahinumdom nato nga kita mga anak sa atong Amahan sa Langit ug nga kini ang Iyang “buhat ug … himaya—sa pagpahinabo sa pagka-imortal ug kinabuhi nga dayon sa tawo” (Moises 1:39). Piho silang mitambag nato nga kon mosimba kita sa epektibong paagi sa adlaw nga Igpapahulay, molambo ang atong pagtuo sa Langitnong Amahan, sa Iyang plano sa kalipay, ug ni Jesukristo ug sa Iyang Pag-ula.

Ang istorya ni Moises ug ang bitin nga tumbaga gihisgutan usab diha sa Basahon ni Mormon, diin kita giingnan nga “daghan ang mitan-aw ug nabuhi” (Alma 33:19; tan-awa usab sa mga bersikulo 20–22). Hinoon, ang uban, nagdumili sa pagtan-aw. “Ang buhaton diin sila kinahanglan mobuhat mao ang pagtan-aw; ug tungod sa pagkayano sa paagi, o sa kasayon niini, adunay daghan kinsa namatay” (1 Nephi 17:41). Ikasulti ba kaha kini kanato sa umaabut nga nagdumili kita sa pagtan-aw ngadto sa mga propeta ug sa ilang tambag tungod sa kasayon sa agianan?

“Kon kamo mamaayo pinaagi lamang sa pagpunting sa inyong mga mata aron kamo mamaayo, dili ba kamo motan-aw diha-diha[?] …

“… Diha niana ipunting ang inyong mga mata ug sugdi ang pagtuo sa Dios” (Alma 33:21, 22).

Mapasalamaton ako sa mga panalangin nga moabut samtang magsubay kita sa atong “dalan ngadto sa langit” ug moawhag sa uban sa pagbuhat sa ingon. Mapasalamaton usab ako alang sa oportunidad, kon kita mahisalaag, sa paghinulsol, sa pagbiya sa dili maayo nga mga kinaiya, ug mobalik ngadto sa angay nga dalan. Dili masukod ang mga panalangin.

Laing tudling sa kasulatan sa Basahon ni Mormon nga naghisgot sa kasinatian sa mga Israelites mitapos, “Ug kutob sa motan-aw niana nga bitin mabuhi, bisan pa ingon ka daghan sa motan-aw sa Anak sa Dios uban sa hugot nga pagtuo, nga magbaton og mahinulsulon nga espiritu, mabuhi, gani ngadto niana nga kinabuhi nga walay katapusan” (Helaman 8:15).

Ang pagpaminaw sa tambag sa moderno nga mga propeta nagbansay sa atong mga kasingkasing nga magbaton og hugot nga pagtuo. Naglig-on kini nato sa pagbuntog sa mga babag sa atong pagpanaw, sama nga kinahanglan kong mopadayon nianang gabii sa summer sa desierto. Mopamatuod ko nga kon kita motan-aw ngadto sa atong Amahan sa Langit ug sa Iyang Anak, nga si Jesukristo, makakaplag kita og kahulugan ug katuyoan sa atong panaw.

Makakita kamo og mga ideya sa family home evening alang niini nga artikulo sa lds.org/go/11811.