Kalinaw kang Kristo

Sa Kinatibuk-ang Kapangulohan sa Young Women ug Young Men

Bisan unsa ang inyong mga kahimtang, makakaplag kamo og kalinaw kang Jesukristo.

Sa kalibutan nga puno sa kasamok, nagkompetinsyahay og mga hunahuna, mga tintasyon, ug makalibug nga mga pilosopiya, ang pagpangita og kalinaw dili kanunay sayon. Apan ang saad sa Manluluwas nga makita sa Doktrina ug mga Pakigsaad 19:23 (ang 2018 nga tema sa Mutual) naghatag og piho nga dalan sa kalinaw: “Pagkat-on kanako, ug paminaw sa akong mga pulong; lakaw diha sa kaaghup sa akong Espiritu, ug ikaw makabaton og kalinaw ngari kanako.”

Isip Kinatibuk-ang Kapangulohan sa Young Women ug Young Men, mopamatuod kami nga tinuod kana. Nakita namo kana sa kaugalingon namong kinabuhi, ug kon sundon ninyo kini nga pattern, tumanon usab sa Dios ang iyang gisaad nga kalinaw.

Daghan kaninyo mobati og kahingawa ug kabalaka kon unsa kaha ang inyong umaabut. Daghan kaninyo naghunahuna mahitungod sa inyong panagway, mga abilidad, ug inyong potensyal. Apan bisan unsay inyong kasinatian, makakaplag kamo og kalinaw. Wala kana magpasabut nga kadtong tanang pangutana o kabalaka mahanaw lang dayon, apan bation ninyo ang siguradong kasiguroan nga mahapsay ra ang tanan. Ang pinakaimportante, nga mabati ninyo ang gugma ni Jesukristo para ninyo sa personal, ug magdala kana og talagsaong kalinaw.

Hisgutan nato ang matag elemento niini nga bersikulo.

Pagkat-on Kanako

Ang pagkaila sa Langitnong Amahan ug kang Jesukristo mahinungdanon kaayo nga bahin sa inyong panaw sa kinabuhi. Miingon ang Ginoo, “Ug ang kinabuhing dayon mao kini, ang ilang pagpakaila kanimo nga mao ang bugtong tinuod nga Dios, ug kang Jesukristo nga imong gipadala” (Juan 17:3). Samtang magkadugang ang inyong pagkaila kang Kristo, inyong masabtan ang Iyang pagkamaayo, pagkamaalamon, pagkamabination, ug pagkamahigugmaon. Modako ang inyong pagtuo Kaniya, ug mabatunan ninyo ang mas dakong tinguha sa pagsunod Kaniya ug sa Langitnong Amahan.

Paminaw sa Akong mga Pulong

Mamulong si Jesukristo kanato pinaagi sa mga kasulatan, sa buhing mga propeta, ug sa Espiritu Santo. Kinahanglan kitang magbusog, mamalandong, ug mo-apply niining mga pulonga sa atong kinabuhi. Sa inyong pagtuon sa mga pulong sa Manluluwas, tutuki ang Basahon ni Mormon tungod kay kini “ang labing tukma sa bisan hain nga basahon dinhi sa yuta, ug ang sukaranan sa atong tinuohan,” mitudlo si Joseph Smith, “ug ang tawo labi pa nga maduol sa Dios pinaagi sa pagsunod sa iyang mga lagda, kay sa bisan hain nga basahon.”¹ Ang puno sa impluwensya nga imbitasyon ni Presidente Thomas S. Monson sa Abril 2017 nga kinatibuk-ang komperensya nga kita kinahanglang mobasa sa Basahon ni Mormon matag adlaw makatabang aron atong mapaminaw ug masabtan ang mga pulong ni Kristo.²

Lakaw diha sa Kaaghup sa Akong Espiritu

Ang pagpaminaw sa mga pulong sa Manluluwas magsugod lamang sa pag-usab kanato kon andam kitang mosunod niini. Nagkinahanglan kini og kaaghup sa atong bahin. Nagkinahanglan kini nga dili na nato buhaton ang kaugalingon natong pamaagi apan sundon ang Iyang pamaagi. Usahay magtuo ta nga mas maayo ang atong pamaagi. Apan kon magmaaghup kita ug mosunod Kaniya bisan asa kita Niya paadtoa, sa kanunay anaa kita sa pinakamaayong dalan.

Ikaw Makabaton og Kalinaw ngari Kanako

Mao kini ang talagsaong saad: kon buhaton ninyo kining tulo ka butang—magkat-on, maminaw, ug makig-uban sa Manluluwas—may kalinaw kamo sa inyong kinabuhi. May kasiguroan kamo nga maanaa ang Dios sa inyong kiliran ug magbantay Siya kaninyo, bisan sa unsang makahadlok, sa kawalay kasiguroan, o mga kahuyang nga inyong gibati. Maangkon ninyo ang pagsalig—dili lang sa inyong kaugalingon apan diha usab kang Jesukristo ug sa Iyang gugma ug gahum.

Dapiton namo ang tanang batan-on sa Simbahan nga memoryahon kini nga bersikulo. Gamita kini nga giya sa inyong kinabuhi. Kon ang gabon sa kangitngit mohuros liyok kaninyo ug daw dili madaog, hunahunaa ninyo kini nga bersikulo, sunda ang pattern niini, ug i-angkla ang inyong kaugalingon ngadto sa sigurado ug piho nga pundasyon ni Jesukristo.