Prensip vizit ofwaye, Mas 2018
Priye pou chak sè nan non li
Lanmou nou ak enspirasyon nou konsènan moun nou vizite yo ap ogmante si nou enbleman priye pou chak grenn sè nan non li.
Lafwa, Fanmi, Sekou
Ekriti yo pataje anpil egzanp sou gason ak fi ki te priye pou lòt nan non yo. Youn nan priyè ki pi ekstraòdinè sa yo se priyè papa Alma, pi jèn nan. Yon zanj te pale avèk Jèn Alma, li te di l ke papa l “te priye avèk anpil lafwa pou ou … ; se poutèt sa, m vini pou m konvenk ou, pou w konnen pouvwa ak otorite Bondye, pou konnen priyè sèvitè l yo kapab gen repons dapre lafwa yo” (Mozya 27:14).
Lè nou youn priye pou lòt, sa ouvri kè nou pou n resevwa benediksyon Senyè a vle banou. “Objektif lapriyè se pa pou chanje volonte Bondye, men se pou sekirize benediksyon Bondye deja vle banou yo, pou tèt pa nou ak pou lòt moun, men nou bezwen mande pou nou kapab jwenn yo.”1
Yon sè te rakonte kijan, pandan yon peryòd difisil nan lavi l, li te konn souvan resevwa yon apèl telefòn oubyen yon senp mesaj tèks enstriktris ofwaye l yo te konn voye ba li pandan kèk “jounen patikilyèman fènwa.” Se kòmsi yo te konnen egzakteman lè l te bezwen yon ankourajman. Li te konnen ke yo t ap priye pou li, ni lè yo te vizite l ni lè yo te poukont yo.
Julie B. Beck, ansyèn Prezidant Jeneral Sosyete Sekou a te di: “Panse a fòs nou t ap genyen si chak sè te fè priyè sensè chak maten ak chak swa, oubyen pi bon toujou, si chak te priye san rete jan Senyè a kòmande a.”2 Priyè pou moun nou vizite yo fòtifye nou endividyèlman epi antanke fi Sen Dènye Jou.
Prezidan Henry B. Eyring, Premye Konseye nan Premye Prezidans lan te di: “Priye pou nou ka konn kè yo. … N ap bezwen konn kisa Bondye ta renmen nou fè pou ede yo epi pou nou fè l osi byen nou kapab, pandan n ap santi lanmou Bondye pou yo.”3
© 2018 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/17. Apwobasyon tradiksyon: 6/17. Tradiksyon Visiting Teaching Principles, March 2018. Haitian Creole 97929 036