Mesaj Premye Prezidans lan, Mas 2018

Pawòl Bondye pou pitit li yo

Prezidan Dieter F. Uchtdorf

Dezyèm Konseye nan Premye Prezidans lan

Ekriti yo di nou premye bagay Bondye te fè apre l te fin kreye gason ak fi a se te pale avèk yo.¹ Li te gen enfòmasyon enpòtan ak enstriksyon presye pou L te ba yo. Objektif li se pa t pou l te mete fado so yo oubyen pou l te enkyete yo men sete pou l te gide yo al nan bonè ak lagwa etènèl.

Epi sa sete sèlman kòmansman an. Depi jou sa a rive jodia, Bondye kontinye kominike avèk pitit li yo. Disip li nan chak jenerasyon te toujou prezève, cheri, ak etidye pawòl li yo. Moun k ap chèche konnen volonte Bondye yo venere pawòl sa yo, epi yo rann temwanyaj sou verite sa a, ke: “Bondye pa fè anyen, san l pa revele sekrè l bay sèvitè l pwofèt yo.”²

Sa sete yon modèl depi nan kòmansman an, epi modèl sa a kontinye jodia. Se pa sèlman yon bèl istwa biblik, se fason Bondye etabli pou kominike mesaj esansyèl bay pitit li yo. Li chwazi kèk moun nan pami nou, li aple yo pou yo vin pwofèt, epi l ba yo pawòl pou yo di, ke yo envite nou pou nou “resevwa, kòm si sete bouch pa [l].”³ Sovè a te deklare: “Kit se avèk pwòp vwa pa m oubyen avèk vwa sèvitè m yo, se menm bagay la.”⁴

Sa se youn nan mesaj ki pi gloriye, pi ankourajan, e ki pote plis espwa nan Retablisman an—Bondye pa fè silans! Li renmen pitit Li. Li pa kite nou pou n ap mache nan fènwa.

Defwa chak ane, an Avril ak an Oktòb, nou gen opòtinite pou n tande vwa Senyè a atravè sèvitè l yo nan bèl konferans jeneral nou yo.

Mwen rann nou temwanyaj pèsonèl mwen ke, byen lontan avan yon oratè nan konferans jeneral fè mach long sa a al sou chè a, li envesti anpil efò, lapriyè, ak etid an repons pou tach yo ba li pou l fè diskou a. Chak mesaj konferans reprezante anpil èdtan preparasyon ak priyè sensè pou moun nan ka konprann kisa Senyè a vle Sen l yo tande.

Kisa ki ta ka rive si nou menm, antanke moun k ap tande, nou ta fè menm kalite preparasyon oratè yo fè a? Kijan nou ta kapab gen yon apwòch diferan konsènan konferans jeneral si nou te konsidere konferans kòm yon opòtinite pou n resevwa mesaj nan men Senyè a li menm? Atravè pawòl ak mizik konferans jeneral yo, nou kapab atann pou nou resevwa repons pèsonèl konsènan kèlkeswa kesyon oubyen pwoblèm nou gen dwa ap rankontre.

Si nou janm mande tèt nou si Papa nou ki nan Syèl la ap pale avèk nou toutbon, mwen ta fè nou sonje pawòl senp men pwofon sa yo timoun Primè nou yo chante yo: “[Ou se] yon pitit Bondye, epi li voye [w] isit la.” Objektif li se pou ede w retounen “al viv avèk li yon jou.”

Si w apwoche Papa nou ki nan Syèl la antanke pitit li, ou kapab mande l avèk yon kè sensè: “Dirije m, gide m, mache bò kote m, ede m jwenn chemen an.” Anseye m tout sa m dwe fè.” L ap pale avèk nou atravè Sentespri l la, epi apresa, se nou menm k ap deside si n ap fè “volonte l.” Mwen pwomèt nou si nou fè sa, “gen gran benediksyon ki rezève pou nou.”⁵

Nou bezwen gidans Senyè a jodia plis pase nou te janm bezwen l nan istwa mond lan. Pandan n ap prepare nou pou nou tande pawòl Bondye a, se pou nou chèche Lespri verite a ak dilijans pou lè Senyè a pale atravè sèvitè l yo, nou kapab konprann, vin edifye, epi rejwi ansanm.⁶

Mwen temwanye ke “lè nou fè sa, pòt lanfè yo p ap gen viktwa sou [nou]; wi, epi Senyè Bondye a ap dispèse pouvwa tenèb yo devan [nou], epi l ap fè syèl yo souke pou byen nou, ak pou laglwa non li.”⁷

© 2018 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/17. Apwobasyon tradiksyon: 6/17. Tradiksyon First Presidency Message, March 2018. Haitian Creole 15049 036