Mensahe sang Unang Pangulohan, Abril 2018

Sa Aton Pagpadayon sing Ulolupod

Ni Pangulong Russell M. Nelson

Tanda sang editor: Si Pangulong Russell M. Nelson, nga gin-set apart bilang ika-17 nga Pangulo sang Ang Simbahan ni Jesucristo sang mga Santos sa Ulihing mga Adlaw sang Enero 14, 2018, naghatag sining pamulong-pulong sang Enero 16, 2018 sa isa ka live nga brodkast gikan sa annex sang Templo sang Salt Lake. Iya ginpangabay nga ang iya mga ginhambal ipagwa sa sini nga isyu.

Mga pinalangga kong kauturan, mapainubuson ako nga makaupod kamo sini nga aga. Apat ka adlaw ang nagligad ginpahamtang naton sa iya palahuwayan ang isa ka dako nga tawo, isa pa propeta sang Dios—si Pangulong Thomas S. Monson. Wala sang mga tinaga nga lubos nga makalaragway sa kadako kag katahum sang iya kabuhi. Tubtob sa katubtuban ko nga huptan ang amon pag-abyanay nga may pagpasalamat sa iya mga gintudlo sa akon. Karon dapat kita nga magtulok sa palaabuton nga may bug-os nga pagtuo sa aton Ginuong Jesucristo, kon kay sin-o ining Simbahan.

Duha ka adlaw ang nagligad ang tanan nga buhi nga mga Apostoles nagtipon sa naibabaw nga kuwarto sang Templo sang Salt Lake. Didto naghimo sila sang nagaisa nga desisyon, una, sa pag-organisa liwat sang Unang Pangulohan sa karon kag, ikaduwa, nga ako ang magaserbe nga Pangulo sang Simbahan. Kulang ang mga tinaga agud isugid sa inyo kon ano ang pamatyagan nga ang akon Kauturan—Kauturan nga nagakapot sang tanan mga yabi sang priesthood nga ginpanumbalik paagi kay Propetang Joseph Smith sa sini nga dispensasyon—nagbutang sang ila mga kamot sa akon ulo agud ordinan ako kag i-set apart bilang Pangulo sang Simbahan. Isa yadto ka sagrado kag makapaubos nga eksperiyensya.

Nangin akon responsibilidad ang hibaluon kon sin-o ang ginhanda sang Ginuo nga akon mangin mga manuglaygay. Ngaa bala duha lang ang pilion ko sa Napulo’g Duha ka iban nga Apostoles, nga ang tagsa palangga ko gid katama? Nagapasalamat gid ako sing dako sa Ginuo sa pagsabat sang akon hanuot nga mga pangamuyo. Nagapasalamat gid ako nga si Pangulong Dallin H. Oaks kag Pangulong Henry Bennion Eyring handa nga mag-alagad kaupod ko bilang Una kag Ika-duhang Manuglaygay, sing pasunod. Si Pangulong Dieter F. Uchtdort nagbalik sa iya lugar sa Korum sang Napulo’g Duha ka mga Apostoles. Nakabaton na sia sing mayor nga mga buluhaton nga pinasahi gid sia nga kalipikado.

Ginapasidunggan ko sia kag si Pangulong Eyring sa ila maukod nga pag-alagad bilang mga manuglaygay kay Pangulong Monson. May ikasarang sila, matutom, kag inspirado. Nagapasalamat gid kita bangud sa ila. Ang kada isa handa sa pag-alagad kon sa diin sia ginakinahanglan gid.

Bilang Apostoles nga ikaduha sa kadugayon, si Pangulong Oaks man ang mangin Pangulo sang Korum sang Napulo’g Duha ka mga Apostoles. Ugaling, bangod sang iya calling sa Unang Pangulohan kag ugyon sa kahusay sa Simbahan, si Pangulong M. Russell Ballard, ang madason sa kadugayon, ang magaalagad bilang Akting nga Pangulo sinang korum. Ang Unang Pangulohan magatrabaho nga kaupod ang Napulo’g Duha ka mga Apostoles agud hibaluon ang kabubut-on sang Ginuo kag idugon ang Iya sagrado nga buluhaton pasulong.

Nagapasalamat kami sa inyo mga pangamuyo. Ginhalad ang mga ini sa bug-os nga kalibutan para sa amon. Sang aga pagkatapos sang pagtaliwan ni Pangulong Monson, ang isa ka subong nga pangamuyo ang ginhalad sang isa ka apat-ka-tuig nga bata nga lalaki nga ginhingadlan Benson. Sambiton ko ang pila ka bahin sang sulat sang iya nanay nga ginpadala sa akon asawa, nga si Wendy. Si Benson nagpangamuyo, “Amay nga Langitnon, salamat nga makita na liwat ni Pangulong Thomas S. Monson ang iya asawa. Salamat sa amon bag-o nga propeta. Buligi sia nga mangin maisog kag indi mahadlok nga bag-uhan sia. Buligi sia nga magtubo nga maayo ang lawas kag mabaskog. Buligi sia nga makaangkon sang gahum bangod may yara sia sang priesthood. Kag buligi kami pirme nga mangin mabuot.”

Nagapasalamat ako sa Dios tungod sang kasubong nga mga kabataan kag sa mga ginikanan nga seryoso sa ila pangako sa matarong, hungod nga pagkaginikanan—para sa kada ginikanan, titser, kag miyembro nga nagadala sang mabug-at nga palaligban pero sa gihapon nagaalagad sing wala kataka. Sa iban nga pulong, sa kada isa sa inyo, mapainubuson ako nga nagapasalamat.

Ang Ginuo Amo ang Nagakapot sang Timon

Sa aton pagsulong sing ulolupod, ginaagda ko kamo nga pamensaron ang katahum sang pagpalakat sang Ginuo sa Iya Simbahan. Kon magtaliwan ang isa ka Pangulo sang Simbahan, wala sang misteryo kon sin-o ang madason nga pagatawgon sa sina nga palangakuan. Wala sang eleksyon, wala sing kampanyahanay, kundi ang malinong lamang nga paghikot sang diosnon nga plano sang pagbuslanay, nga ginpahamtang sang Ginuo Mismo.

Ang tagsa ka adlaw sang pag-alagad sang isa ka Apostoles isa ka adlaw sang pagtuon kag pagpanghanda para sa mas dako nga responsibilidad sa palaabuton. Nagalab-ot sang dinekada sang pag-alagad para ang isa ka Apostoles magsaka gikan sa pulungkuan sang bag-uhan padulong sa pulungkuan sang dumaan sa bilog. Sa sina nga tion, nagaangkon sia sing kaugalingon nga eksperiyensya sa kada aspeto sang buluhaton sa Simbahan. Mangin pamilyar man sia sa mga katawhan sang kalibutan, lakip na ang ila mga kasaysayan, mga kultura, mga lenggwahe samtang ginadala sia sang iya mga takay nga buluhaton sa bug-os nga kalibutan. Ining proseso sang pagbuslanay sa pagkalider sa Simbahan pinasahi. Wala na ako sing may nahibal-an nga pareho sini. Indi kita dapat makibot sini, tungod ini amo ang Simbahan sang Ginuo. Wala Sia nagahikot suno sa pamaagi sang tawo.

Nag-alagad na ako sa Korum sang Napulo’g Duha ka mga Apostoles sa idalom sang lima ka nagliligad nga mga Pangulo sang Simbahan. Nakita ko ang tagsa ka Pangulo nga nagbaton sang bugna kag nag-akto sa sina nga bugna. Ang Ginuo pirme kag padayon nga magatulin kag magainspirar sang Iya mga propeta. Ang Ginuo amo ang nagakapot sang timon. Kami nga gin-ordinan nga magsaksi sa Iya balaan nga ngalan sa bug-os nga kalibutan magapadayon sa paghibalo sang Iya pagbuot kag sundon ini.

Magpabilin sa Dalan sang Kasugtanan

Karon, sa tagsa ka miyembro sang Simbahan ginasiling ko, magpabilin sa dalan sang kasugtanan. Ang inyo pangako nga sundon ang Manluluwas paagi sa paghimo sang mga kasugtanan sa Iya kag dayon pagtuman sining mga kasugtanan ang magabukas sang pwertahan sang tagsa ka espirituhanon nga bugay kag pribelihiyo nga yara para sa mga lalaki, mga babayi, kag kabataan sa bisan diin.

Bilang bag-o nga Pangulohan, luyag namon magsugod nga ginapamensar ang katumanan sini. Sa sini nga rason, nagapakighambal kami sa inyo subong gikan sa templo. Ang katumanan nga ginatinguhaan sang tagsa sa aton amo ang masangkapan sang gahum sa puluy-an sang Ginuo, maselyuhan bilang mga pamilya, mangin matiutom sa mga kasugtanan nga ginhimo sa templo nga magahimo sa aton nga kalipikado para sa pinakadako nga regalo sang Dios—ang kabuhi nga wala’y katapusan. Ang mga ordinansa sa templo kag ang mga kasugtanan nga ginahimo ninyo didto amo ang yabi sa pagpabakod sang inyo kabuhi, sang inyo pag-asawahay kag pamilya, kag sang inyo ikasarang nga pakigbatuan ang mga pag-atake sang kaaway. Ang inyo pagsimba sa templo kag ang inyo pag-alagad didto para sa inyo mga katigulangan magabugay sa inyo sang mas dako nga personal nga gabay kag katawhay kag magapabakod sang inyo pangako nga magpabilin sa dalan sang kasugtanan.

Karon, kon nagliw-as kamo sa dalan, ginaagda ko kamo upod ang tanan nga paglaum nga yara sa akon tagipusuon nga palihog magbalik na. Kon ano man ang inyo mga palaligban, ano man ang inyo mga hangkat, may lugar para sa inyo sa diri, sa Simbahan sang Ginuo. Kamo kag ang wala pa mabun-ag nga mga henerasyon pagabugayan sang inyo aksyon sa karon sa pagbalik sa dalan sang kasugtanan. Ang aton Amay sa Langit nagapalangga sang Iya mga anak, kag luyag Niya nga ang tagsa sa aton makabalik sa Iya. Amo ini ang pinakadako nga lalab-uton sang Ang Simbahan ni Jesucristo sang mga Santos sa Ulihing mga Adlaw—ang buligan ang tagsa sa aton nga makabalik pauli.

Ginapahayag ko ang akon dako nga pagpalangga sa inyo—pagpalangga nga nagtubo sa dinekada nga pagpakigkita sa inyo, pagsimba upod ninyo, kag pag-alagad sa inyo. Ang aton diosnon nga mandato amo ang magkadto sa kada nasyon, kaliwatan, hinambalan, kag katawhan, nga nagabulig sa paghanda sang kalibutan para sa Ika-duhang Pagkari sang Ginuo. Ini himuon naton nga may pagtuo sa Ginuong Jesucristo, nga nagahangop nga Sia ang nagapamuno. Ina ang Iya buluhaton kag ang Iya Simbahan. Iya kita mga alagad.

Ginapahayag ko ang akon debosyon sa Dios ang aton Wala’y Katapusan nga Amay kag sa Iya Anak, nga si Jesucristo. Kilala ko Sila, palangga ko Sila, kag nagapangako sa pag-alagad sa Ila—kag sa inyo—upod sa nabilin nga ginhawa sang akon kabuhi. Sa sagrado nga ngalan ni Jesucristo, amen.

© 2018 iya sang Intellectual Reserve, Inc. All rights reserved. Ginbalhag sa Pilipinas. Pagtugot sa Ingles: 6/17 Petsa sang pagtugot sa paglubad: 6/17. Paglubad sang First Presidency Message, April 2018. Hiligaynon.15048 861

Ang Bulanan nga Mensahe sang Unang PANGULOHAN PAGAUNTATON

Ang ining mensahe amo ang katapusan nga Mensahe sang Unang Pangulohan nga pagabalhagon sing bulanan. Sa palaabuton, ang Unang Pangulohan magapaambit sang importante nga mga mensahe kon kinahanglanon paagi sa nagkalain-lain nga pamaagi sang Simbahan, lakip na sa mga magasin sang Simbahan kag LDS.org.