Poraus seni ewe Aewin Presetensi, April 2018

Nupwen Sia Feinno Fengen

Seni Preseten Russell M. Nelson

An chon apungu esinesin: Preseten Russell M. Nelson, a ewis ngeni ewe engon me fisuwen Presetenin Ewe Mwichefenin Jises Kraist ren Aramas mi Pin non Fansoun Soponon non January 14, 2018, a wau ekkei kapas non January 16, 2018, fansoun ew porous me chewno non ewe chok fansoun seni ewe neni mi pachengeni ewe Salt Lake Tempel. A tingor pwe an kewe kapas repwe makketiw non ei kinikinin mak.

Pwii me fefinei achengicheng, ua mefi tekison ai nonnom remi non ei soran. Ruanu ran a no sia peiasenano emon mwan mi napanap, emon soufosun Kot—Preseten Thomas S. Monson. Ese wor kapas ra tongeni pung ngeni watten me amwararen manauan. Upwe aucheani am chiechi fengen feinfeino ren kinisou ren met i a aitiei. Iei sipwene neneno ngeni mwach fiti unusen nuku non ach Samon Jises Kraist, ewe an ei Mwichefen.

Ru ran a no meinisin ekkewe Aposel mi manau ra chufengen non ewe rum asan ewe Salt Lake Tempel. Me ikena ra tipew fengeni meinisin ne finata, aewin, ne etetteni sefani ewe Aewin Presetensi iei me, aruwan, pwe ngang upwe Presetenin ewe Mwichefen. Kapas ese naf ai upwe urenikemi ifa usun ewe memef ren Pwi Kewe Nouwis Tekia—Nouwis Tekia ekkewe ra amwochu ekkewe kiien pristut meinisin mi niwinsefanito me ren ewe Soufos Joseph Smith me non ei kinikinin fansoun—wata pour won mokurei ne seikaeita me ewisa ngeniei pwe Presetenin ewe Mwichefen. A ew mettoch mi monomon me tekisoson.

Iwe mwirin a winiti wisei ne esinna ion ewe Samon a amonnata pwe repwe nei chon aninnis. Ifa usun uwa tongeni chok finata ruemon me nein ekkewe Engon me Ruemon Aposel, emon me emon ua fokkun tongei? Ua ennetin kinisou ngeni ewe Samon ren an ponuweni ai ennetin iotek. Ua fokkun kinisou pwe Preseten Dallin Harris Oaks me Preseten Henry Bennion Eyring ra mochen angang rei pwe repwe Aemonun me Aruemonun Chon Aninnis, non ena tetten. Preseten Dieter F. Uchtdorf a angei sefani nenian we non ewe Mwichen ekkewe Engon me Ruemon Aposel. A fen angei ekkoch wis mi fokkun watte ren minne i chok a tongei fori.

Ua kinisou ngeni i me ngeni Preseten Eyring ren ar angang mi amwarar ren wiser chon aninnis ngeni Preseten Monson. Ra fen ennetin tufich ngeni, nikitu ngeni, me angei aurour seni nang. Sia fokkun kinisou rer. Emon me emon a mochen angang iei ikewe i mi auchea me ia.

Pokiten i aruemonun Aposel non tettenin watte, Preseten Oaks a pwan winiti Presetenin ewe Mwichen ekkewe Engon me Ruemon Aposel. Nge inamo, pokiten wisan ngeni ewe Aewin Presetensi me fiti chok ewe tettenin ewe Mwichefen, Preseten M. Russell Ballard, i mwirin non tettenin watte, epwe angang ren an epwe Acting Preseten ren ena mwich. Ewe Aewin Presetensi epwe angang fengen me ekkewe Engon me Ruemon ne esinna mochenin ewe Samon me amwokutu An Angang mi pin.

Aua kinisou ren ami iotek. A fen wor iotek fan item me non unusen ewe fonufan. Non ewe sosoran mwirin an Preseten Monson mano, ew iotek a fen fis me ren emon at ruanu ierin itan Benson. Upwe apasa sefani ekkoch kinikinin noun inan we toropwe ngeni punuwei we, Wendy. Benson a iotek, “Semach won Nang, kinisou ngonuk pwe Preseten Thomas S. Monson a tongeni kuna sefan punuwan we. Kinisou ren noum we minafo soufos. Anisi pwe epwe pwaracho me esap nuokus pwe i minafo. Anisi an epwe marita pwe aionan epwe och me pochokun. Anisi i pwe epwe wor an manaman pokiten mi wor ren ewe pristut. Me anisi kich fansoun meinisin pwe sipwe kirekiroch.”

Ua kinisou ngeni Kot ren semirit usun ei me ngeni sam me in ekkewe ra ennet non ar nikitu ngeni wenechar, ennetin tumunun semirit—fan iten sam me in, sense, me chon ewe mwichefen meinisin ekkewe mi chou oser nge inamo ra mochen angang. Non ekkoch kapas, ren emon me emon ami, ua unusen kinisou.

Ewe Samon a Wisen Sou Penu

Nupwen sipwe feino fengen, ua tingor ngeni kemi ne ekieki usun ewe napanap mi amwarar ren minne ewe Samon a emweni An Mwichefen. Nupwen emon Presetenin ewe Mwichefen a mano, ese wor aurekin usun ion mwirin epwe kokko an epwe angang non ena wis. Ese wor pekin utut, ese wor tingorfetanin sekita, nge ewe chok angangen ew kokkoten etetten mi pin, a fis me ren Pwisin ewe Samon.

Iteiten ranin an emon Aposel angang a ew ranin kaeo me amonneta ngeni ekkoch wis non ekkan ran mwach. Ekan ukukun engon ierin angang ren an emon Aposel epwe mwokut seni ewe neni kukkun ngeni ewe neni watte non ewe mwich. Non ena fansoun, a pwisin angei an sinei non ew me ew kinikinin angangen ewe Mwichefen. I a pwan sineochu ekkewe aramasen ewe fonufan, mi pachenong uruor, ar oreni, fosun fonuer nupwen wisan a uweiano i fan chommong won ewe fonufan. Ei mwokutukutun tetten non ewe mwichen chon nemenemen ewe Mwichefen mi sokkono. Ese wor mettoch ngang mi sinei pwe mi usun chok. Esap amairu kich, pokiten iei an ewe Samon Mwichefen. Ese angang mwirin ewe napanap an aramas.

Ua fen angang non ewe Mwichen ekkewe Engon me Ruemon fan nimmon akkom Presetenin ewe Mwichefen. Ua fen katon emon me emon Preseten an angei pwarata me pwonueni ena pwarata. Ewe Samon a fen me epwe chok soun auroura me pesei Noun kewe soufos. Ewe Samon a Wisen Sou Penu. Am ekkewe aua fen seikita pwe aupwe pwarata usun Itan mi pin non unusen ewe fonufan aupwe sopweno ne kutta ne sinei Mochenin me apwonueta.

Nom won ewe Aanen Pwon mi pin

Iei, ngeni emon me emon chon ewe Mwichefen ua apasa, nom won ewe aanen pwon mi pin. Ami nikitu ne tapweno mwirin ewe Chon Amanau ren ami fori pwon mi pin ngeni I iwe mwirin apwonueta ekkena pwon epwe suki asam ngeni feiochun ngun meinisin me tufich mi fich ngeni mwan, fefin, me semirit ekis meinisin.

Ren ew minafon Presetensi, aua mochen poputa ren nesopun non am ekiek. Ren ei popun, aua kapas ngeni kemi ikenai seni ew tempel. Ewe nesopun ren minne emon me emon kich sia achocho ngeni ina ach sipwe feioch ren manaman non ew imwen ewe Samon, riri fengen ren famini, nukuchar ngeni pwon mi pin a for non ew tempel minne a atufichi kich ngeni ewe niffang mi nap an Kot—ewe niffangen manau esemuch. Ekkewe angangepinin ewe tempel me ekkewe pwon mi pin oua fori ikewe ir ekkewe kii ne apochokuna manauemi, ami pupunu me famini, me ami tufichin ungeni ekkewe feiengawen ewe chon ungenikich. Ami fen me non ewe tempel me ami angang ikewe fan iten ami kewe neuo epwe efeiochu kemi ren napenon ami pwisin pwarata me kinamwe me epwe apochokuna ami nikitu ne nom won ewe aanen pwon.

Iwe, ika oua ipwe seni ewe aan, upwe tingor ngeni kemi ren unusen ewe apinukunuk non netipei pwe ouse mochen oupwe niwin sefan. Met chok ami noninen, met chok ami osukosuk, mi wor ew neni fan itemi non ei, an ewe Samon we Mwichefen. Ami me tappin aramas rese mwo uputiw repwe feioch ren ami foffor iei ne niwin ngeni ewe aanen pwon. Semach won Nang a aucheani Noun semirit, me I a mochen emon me emon epwe niwino neimw Ren. Iei ewe mettoch sipwe ekita mi kon auchea an ewe Mwichefenin Jises Kraist ren Aramas mi Pin non Fansoun Soponon—ne anisi emon me emon kich ne niwino non imwach.

Ua apasa ai ennetin tong ngeni kemi tong a fen marino non ekkewe kinikinin engon ier ai churi kemi, fiti kemi ne fen ngeni, me angang ngeni kemi. Annukum seni nang pwe aupwe no ngeni muu, einang, sokopaten kapas, me aramas meinisin, ne aninnis ne amonnata ewe fonufan ngeni ewe Aruwen Wareton ewe Samon. Ei sipwe fori ren nuku non ewe Samon Jises Kraist, ren ach sinei pwe I chon nemenem. Iei An angang me An Mwichefen. Kich Noun chon angang.

Ua affata ai nikitu ngeni Kot Samach Esemuch me ngeni Noun we, Jises Kraist. Ngang mi sinei Ir, tongei Ir, me pwon ne angang ngeni Ir—me ami—ren nussun ngasangasen manauei. Non iten Jises Kraist mi pin, amen.

© 2018 seni Intellectual Reserve, Inc. All rights reserved. A för non Merika. Kapungunon non fosun Merika: 6/17. Kapungunon awewen: 6/17. Chiakun First Presidency Message, April 2018. Chuukese. 15048 901

Porous seni Aewin Presetensi Iteiten Maram epwene Kouno

Ei porous epwe iei ewe amuchunon Porous seni Aewin Presetensi epwe foruno iteiten maram. Non fansoun mwach, ewe Aewin Presetensi epwe awora porous mi auchea ngeni aramas seni an ewe Mwichefen kewe sokopaten kinikinin katon, mi pachenong an ewe puken porousen Mwichefen me LDS.org.